Vaovao Tsara Nisoratin’i Marka 13:1-37
13 Izy koa fa niboaka baka tamy tempoly tao, araiky tamy mpianatranany nivolan̈a taminany: “A Mpampianatra, zahava baka! Maro tsara tran̈o ndreky vato aby io ay!”
2 Kanefa ho Jesosy taminany: “Hitanao tran̈o maro maventy aby io? Tsisy vato hambela hifampitenginy eky iô, fa handeha harongana aby irô jiaby io.”
3 Tamin’izy nipetrapetraka tamy Bongo Olivy, tamy tany nahatazan̈any tempoly, Petera, Jakoba, Jaona, ndreky Andrea nan̈ontany izy mitaokan̈a karaha ty:
4 “Ambarà zahay ombian̈a raha aby zen̈y hiboaka, baka iô ino raha hahaizan̈a fa efa marikitry faran’ny raha jiaby zen̈y?”
5 Ke Jesosy nanomboko nivolan̈a tamindrô: “Mitandrema tsao hisy olo hamitaka anarô.
6 Maro olo ho avy hisandoko an̈aran̈anaka ke hivolan̈a: ‘Zaho izy’, ke maro olo ho voafitakandrô.
7 Lera anarô maharen̈y lagera, aviô lera misy olo mivolan̈a aminarô fa misy lagera amy tany hafa an̈y, anarô aza mavozo. Raha aby zen̈y tsy maintsy handalo, kanefa mbala tsendriky avy ny farany.
8 “Fôtony hisy firenena hiady amy firenena, aviô hisy fanjakan̈a hiady amy fanjakan̈a. Hisy hôrohôron-tany koa amy tany isan-karazany, baka iô hisy mosary. Raha aby zen̈y mbala vo fanombohan’ny fijalian̈a* fo.
9 “Fa anarô ndraiky mitandrema, fôtony hisy olo hitory anarô amy fitsaran̈a, baka iô anarô handeha hipopòndrô an̈atin’ny synagoga. Tsy zen̈y fo fa, fôtony anarô mpan̈ara-dia zaho, anarô hindesin̈y man̈oloan̈a governera ndreky mpanjaka, am’izen̈y anarô hahavita hikoran̈a amindrô momba raha inoanarô.*
10 Baka iô, vaovao tsara io tsy maintsy hitorian̈a amy firenena jiaby antsendriky.
11 Lera anarô sambôrin̈y ke hindesindrô amy manam-pahifan̈a an̈y, anarô aza miasaloha amy raha handeha hivolan̈inarô; zay raha hambara* anarô amy leran’io fo tôkony hivolan̈inarô, fôtony tsy anarô mivolan̈a fa fan̈ahy masin̈y.
12 Sôsoko zen̈y koa, lelahy araiky hanolotro rahalahiny am’izen̈y rahalahiny io hivonen̈a, karaha zen̈y koa handeha hataon’ny baba amy zanany; aviô zanaka hanohitry olobendrô ke han̈ano raha hahavy olobendrô hivonen̈a.
13 Anarô ho halan’olo jiaby fôtony anarô mpan̈ara-dia zaho, kanefa zay olo miaritry firaka amy farany fo ho voavonjy.
14 “Kanefa, izikoa fa hitanarô mitsangana amy tany tsy tôkony hitsanganany raha mampangaroharo mahavy fandravan̈ana io (mila mandiniky tsarabe lan̈iany olo mamaky),* lan̈iany olo a Jodia mila milefa amy bongo an̈y.
15 Baka iô, lan̈iany olo an̈abo tafontran̈o* tsy tôkony hijotso na hiditry an-tran̈onany ao eky ke hangala raha ao,
16 aviô lan̈iany olo an-tsabo tsy tôkony himpody amy raha efa ningiany ke hangala lambanany ambelan̈a.
17 Amin’ny andra aby zen̈y, hidiran’andra man̈angy mavesatra ndreky mampinono!
18 Aza vôly mivavaka foeky baka tsy amin’ny andra ririn̈iny raha zen̈y hiboaka,
19 fôtony amin’ny andra aby zen̈y, hisy fahorian̈a mbala tsiary nisy ambaka izy rango nanombohan’ny donia* niforôn̈in’ny Zan̈ahary ty firaka amy fotoan̈a zen̈y, sady tsy ho hisy eky.
20 Izikoa tsy nahen̈in’i Jehovah andra aby io, tsisy olo* ho voavonjy, fa baka amindrô olo nifidiny aby io nahavy andra aby zen̈y nahen̈iny.
21 “Aviô koa, izikoa misy olo mivolan̈a aminarô: ‘Atỳ Kristy!’ na ‘Arỳ izy!’, aza mino zen̈y.
22 Fôtony hisy Kristy sandoko ndreky mpaminan̈y sandoko ho avy, ke irô han̈ano famantaran̈a ndreky fahagagan̈a fôtony irô mitady fomba hamitahan̈a irô olo voafidy aby io, izikoa vitandrô.
23 Ke anarô mitandrema. Efa nambarako anarô tsialohaloha raha jiaby zen̈y.
24 “Kanefa amin’ny andra aby zen̈y, afaran’ny fahorian̈a zen̈y, hahiziky masoandra, fanjava tsy han̈amia hazavan̈a,
25 baka iô lakintan̈a ho latsaka baka an-dan̈itry, aviô handeha hozongozon̈iny angôvo amy lan̈itry.
26 Zanak’olo ho hitan’olo* ho avy an̈atin’ny rôndro, miaraka amin’ny angôvo maventy ndreky voninahitry.
27 Ke izy han̈iraka anjelinany handeha hamory irô olo nifidiny aby io baka amy farany avaratra firaka amy farany atsimo, ndreky baka amy farany antin̈iana firaka amy farany andrefa, aviô baka amy faran’ny tany firaka amy faran’ny lan̈itry.
28 “Anarô mangalà fianaran̈a baka amy fan̈oharan̈a momba kakazo aviavy ty: Izikoa fa hitanarô maniry tan̈antan̈an’izio, ke efa manomboko mandravim-bao, hainarô baka am’izen̈y fa efa marikitry asara.
29 Karaha zen̈y koa, izikoa fa hitanarô miboaka raha aby zen̈y, tsara hainarô fa izy* efa marikitry, ia, izy efa am-baravaran̈a ao.
30 Ambarako anarô marin̈y tsarabe fa, tsy ho lany foeky taranaka ty firaka raha jiaby zen̈y miboaka.
31 Lan̈itry ndreky tany ho ravan̈a, fa volan̈anaka ndraiky tsy ho ravan̈a foeky.
32 “Tsisy olo mahay andra ndreky lera zen̈y foeky, na anjely an-dan̈itry an̈y zen̈y, na Zanaka, izikoa tsy Baba fo.
33 Anarô mitandrema fo ndreky miambesa fo, fôtony tsy hainarô ombian̈a fotoan̈a voatôndro.
34 Izio mety hampitovisin̈y amy lelahy araiky nandeha an-tany lavitry. Talohan’izy nandeha, tran̈onany nankin̈iny tamy mpanomponany,* ke samby namezany asa irô tsiaraikiaraiky, aviô mpiambin̈y varavaran̈a nirahiny niambin̈y fo.
35 Ke anarô miambesa fo, fôtony tsy hainarô ombian̈a tômpin-tran̈o ho avy: Na hariva zen̈y, na sasakalin̈y, na man̈ena akôho, na maraindrain̈y be.
36 Am’izen̈y lera izy avy tampoko in̈y, anarô tsy hitany mandry.
37 Fa raha volan̈iko aminarô ty, ambarako olo jiaby: Anarô miambesa fo.”
Lamariky amy Pazy Ambany
^ Abt: “tehotehokon’ny man̈angy pitihin’ny tsaiky.”
^ Abt: “am’izen̈y anarô ho vavolombelon̈onaka man̈oloan̈a irô.”
^ Abt: “hamian̈a.”
^ Na: “mamaky faminanian̈an’i Daniela.”
^ Ankamaraozan’ny tafontran̈on’olo tam’izen̈y nisy terasy nan̈anaovandrô raha isan-karazany.
^ Na: “famoraon̈ana.”
^ Abt: “nôfotro.”
^ Abt: “hitandrô.”
^ Na: “Zanak’olo.”
^ Abt: “mpanomponany namezany fahifan̈a.”
