Vaovao Tsara Nisoratin’i Marka 14:1-72
-
Mpisôron̈o aby io nan̈ano tetiky hamonoan̈a Jesosy (1, 2)
-
Menaka man̈itry nararaka tamy Jesosy (3-9)
-
Jodasy namadiky Jesosy (10, 11)
-
Pasky farany (12-21)
-
Sakafo Harivan’ny Tômpo voanalohany (22-26)
-
Jesosy nivolan̈a fa Petera han̈ano sary tsy hahay izy (27-31)
-
Jesosy nandeha nivavaka tamy zaridain’ny Getsemane (32-42)
-
Jesosy nisambôrin̈y (43-52)
-
Jesosy nitsarain̈a man̈oloan̈a Fitsaran̈a An̈abo (53-65)
-
Petera nan̈ano sary tsy nahay Jesosy (66-72)
14 Afaka andra aroe, ho avy Pasky ndreky Fetin’ny Môfo Tsisy Levira. Irô lohandohan’ny mpisôron̈o ndreky irô mpanoratra lalàn̈a aby io nitady fomba hampiasan̈a hafitsian̈a hanambaoran̈a izy aviô hamonoan̈a izy.
2 Kanefa ho irô: “Sitrany tsy amy fety tsao han̈ajima vahoaka ay!”
3 Tamin’izy nihina tan-tran̈on’i Simona boka, ta Betania, nisy man̈angy nitondra tavoangy vatosanga nisy menaka man̈itry nan̈aton̈o izy. Lafo mare vangan’ny menaka io, aviô izio narda ten̈a izy. Nivakian’ny man̈angy io tendan’ny tavoangy io, baka iô menaka io nararany tamy lohan’i Jesosy.
4 Tsy namparavoravo sasany tamindrô raha zen̈y, ke irô nifampikoran̈a karaha ty: “Nan̈ino ma menaka man̈itry in̈y nilanilanian̈a karaha in̈y?
5 Menaka tôkony nalafo mandilatran’ny 300 denaria, aviô vola namezan̈a olo masikiny!” Ke irô nahinihiny tamy* man̈angy io.
6 Kanefa ho Jesosy: “Ialanarô izy! Nan̈ino ma izy ataonarô karaha io? Tsara kony raha nataony taminaka ay!
7 Hisy olo masikiny fo aminarô iô, ke anarô afaka man̈ano ny tsara amindrô isaka anarô tihan̈ano zen̈y. Fa zaho ndraiky tsy hidôko aminarô iô fo.
8 Efa nan̈ano zay azony natao izy; efa sakavy nan̈idin̈y menaka man̈itry tamin’ny ain̈inaka izy, misy han̈oman̈ana fandiven̈ana zaho.
9 Ambarako anarô marin̈y tsarabe fa, ndray aia ndray aia hitorian̈a vaovao tsara ambony tany eto, tsy maintsy hitantarain̈a koa raha nataon’ny man̈angy io, misy ahatsiaraovan̈a izy.”
10 Jodasy Iskariota, araiky tamindrô 12 Lahy, nandeha tamindrô lohandohan’ny mpisôron̈o tan̈y, fôtony izy tihamadiky Jesosy ndreky hanolotro izy amindrô.
11 Ravoravo mare irô koa fa naharen̈y zen̈y, ke irô nampan̈anten̈a fa han̈amia izy vola volafotsy. Ke izy nanomboko nitady fotoan̈a mety tsarabe hamadihan̈a Jesosy.
12 Tamin’ny andra voanalohany hankalazan̈a Fetin’ny Môfo Tsisy Levira, tsy ino zen̈y fa andra fanoloran̈a biby atao sôron̈o amy Pasky, ho mpianatranany aby io taminany: “Aia tany tianao handihananay ke hikarakaranay raha hoanin̈y amy Pasky?”
13 Izy nan̈iraka aroe tamy mpianatranany, ke ho izy tamindrô: “Mindao mandeha an-tanàna an̈y. Hisy lelahy araiky mitondra sajoa* feno rano han̈aton̈o anarô. Areha izy,
14 firaka izy miditry an-tran̈o. Baka iô volàn̈a amy tompin-tran̈o: ‘Karaha ty ho Mpampianatra: “Aia efitry* mety ihinanako Pasky miaraka amy mpianatranaka?”’
15 Ke izy han̈aboaka anarô efitry araiky malalaka, an̈abo etazy. Efa misy entan̈a salakady efa pare izio. Ao anarô mikarakara raha hoanintsika amy Pasky.”
16 Ke lôso irô mpianatra aby io. Irô koa fa niditry tan-tanàna tao, hitandrô aby raha nivolan̈iny tamindrô in̈y. Ke nikarakaraindrô aby raha nilain̈a tamy Pasky.
17 Andra koa fa tsôfotro, navy izy niaraka tamindrô 12 Lahy aby in̈y.
18 Tamin’irô nipetraka* nan̈odidin̈y latabatra tiô sady nihinan̈a, Jesosy nivolan̈a: “Ambarako anarô marin̈y tsarabe fa, araiky aminarô miaraka mihina aminaka eto io hamadiky zaho.”
19 Nalahelo irô, ke irô samby nan̈ontany izy: “Zaho ma zen̈y?”
20 Ho izy tamindrô: “Araiky aminarô 12 Lahy izy, araiky man̈ajobo tan̈anany miaraka aminaka an̈atin’ny kapila.
21 Zanak’olo handeha, eraka raha efa voasoratra momba izy, kanefa hidiran’andra lelahy hamadiky Zanak’olo! Tsaratsara tamin’olo zen̈y aby tsy teraka foeky.”
22 Irô mbala tam-pihinanan̈a fo, izy nangala môfo. Izy nivavaka, nitapahany izio, baka iô nirasainy tamindrô. Ho izy: “Alaiva ty. Izy ty manôndro vatan̈anaka.”*
23 Nangala kôpy koa izy ke nan̈ano mersy Zan̈ahary, baka iô namezany irô kôpy io, ke irô jiaby nigiaka tam’izio.
24 Aviô ho izy tamindrô: “Izy ty manôndro lionaka,* tsy ino zen̈y fa ‘lion’ny fifan̈ikian̈a’ handeha halatsaka, baka olo maro hahazo hatsaran̈a.
25 Ambarako anarô marin̈y tsarabe fa, zaho efa tsy higiaka divain eky parapavian’ny andra higiahako divain vaovao, amy Fanjakan̈an’ny Zan̈ahary.”
26 Farany, irô koa fa baka nan̈ano hira han̈amezan̈a voninahitry Zan̈ahary,* irô nandeha tamy Bongo Olivy.
27 Ho Jesosy tamindrô: “Anarô jiaby io hiala zaho* aby, fôtony ty raha efa voasoratra: ‘Hivangoeko tsiman̈aja, ke hiparitaka ôndrikôndriky.’
28 Fa lera zaho atsangana, zaho handeha a Galilia, ke an̈y zaho miambin̈y anarô.”
29 Fa ho Petera taminany: “Ndray hiala anao* aby irô jiaby io, zaho tsy hiala anao.”*
30 Ke ho Jesosy taminany: “Niany zaho man̈ambara anao marin̈y tsarabe fa, alin̈y ty fo, akôholahy mbala tsendriky man̈ena indroe, intelo aby anao han̈ano sary tsy hahay zaho.”
31 Fa izy tsy vôly nan̈ampodimpody karaha ty: “Ndray zaho tsy maintsy ho foaty miaraka aminao, tsy honohono ho zaho foeky han̈ano sary tsy hahay anao zen̈y.” Baka iô nivolan̈a karaha zen̈y koa irô* hafa jiaby.
32 Ke irô navy tamy tany araiky kahian̈a Getsemane, aviô ho izy tamy mpianatranany aby io: “Anarô mipitraha eto fa zaho handeha hivavaka.”
33 Petera ndreky Jakoba aviô Jaona nindesiny niaraka taminany. Ke nanomboko nalahelo ndreky niasaloha mare izy.
34 Ho izy tamindrô: “Malahelo mare zaho zen̈y, karaha efa ho foaty. Midokoa eto anarô, ke miareta tôro.”
35 Niteky lavidavitry hely izy, baka iô izy nankôhoko tamy tany ke nanomboko nivavaka baka fitsapan̈a io tsy handalo aminany,* izikoa mety.
36 Ke ho izy: “Aba,* a Baba, tsisy raha tsy vitanao. Adosoa aminaka kôpy ty. Kanefa, alô tsy zay raha tiako ny hatao fa zay raha tianao.”
37 Izy baka tiô nimpody, ke irô hitany nandry. Ho izy tamy Petera: “A Simona, anao ma mandry? Anao tsy nahavita niaritry tôro lera araiky foeky?
38 Miambesa ndreky mivavaha fo am’izen̈y anarô tsy ho resin’ny fakam-pan̈ahy. Menimeny tihan̈ano,* fa nôfotro malemy.”
39 Lôso ndraiky koa izy nandeha nivavaka, ke mbala raha nivolan̈iny in̈y fo nampodiny.
40 Izy koa fa nimpody ndraiky, irô mbala hitany nandry fo, fôtony masondrô navesatra. Tsy haindrô foeky raha hambara izy.
41 Nimpody fan̈intelony ndraiky izy, ke ho izy tamindrô: “Anarô mbala mandry ndreky mangala kajo fo amy fotoan̈a karaha ty zalahy! Basy zay! Efa navy lera. Zanak’olo efa hisy hamadiky ke hatolotro am-pelantan̈anandrô mpanota aby io!
42 Mitsangàna, alô atsika handeha fa efa marikitry ao araiky hamadiky zaho.”
43 Tiô ny iô, izy mbala nivolan̈a fo, navy Jodasy, araiky tamindrô 12 Lahy. Nisy vahoaka marobe nitondra sabatra ndreky kobay niaraka taminany. Irô io irakandrô lohandohan’ny mpisôron̈o ndreky mpanoratra lalàn̈a aviô anti-pan̈ahy aby io.
44 Araiky handeha hamadiky izy io efa nan̈amia famantaran̈a irô. Ho izy: “Izy lan̈iany hirôfiko, ke sambaoranarô izy. Indesa izy, baka iô iambesa tsarabe.”
45 Direkty izy nanjohizohy nan̈aton̈o Jesosy, aviô ho izy: “Raby!”, baka iô izy nirôfiny.
46 Ke Jesosy nisambôrindrô aviô nindesindrô.
47 Araiky tamin’olo nitsangana tiô nan̈atsoaka sabatranany, baka iô nifirainy tam’izin̈y mpanompon’ny mpisôron̈obe, ke nafaka sofin̈inany ilany.
48 Ho Jesosy tamindrô: “Anarô mitondra sabatra ndreky kobay hanambotro zaho, karaha handeha hanambotro dahalo?
49 Isan’andra zaho niaraka taminarô tamy tempoly tao nampianatra, fa anarô tsy nanambotro zaho. Kanefa miboaka izy ty, baka ho tanteraka Soratra Masin̈y.”
50 Ke niala izy aby irô jiaby sady lôso nilefa.
51 Kanefa, nisy manafo lahy nisikiny lamba lin tsara mare zay nan̈araka izy marikitry. Ke irô olo aby io nan̈aohatra nanambotro izy.
52 Fa nambelany lambanany, aviô lôso izy nilefa tsy amy sikiny.*
53 Jesosy nindesindrô tamy mpisôron̈obe tan̈y. Irô lohandohan’ny mpisôron̈o ndreky anti-pan̈ahy aviô mpanoratra lalàn̈a jiaby efa nivory tan̈y tamin’io.
54 Fa Petera ndraiky nan̈araka izy baka lavitry, firaka tan-dakoron’ny mpisôron̈obe. Baka iô izy nipetrapetraka niaraka tamindrô mpiasa an-tran̈o aby io sady namindro.
55 Ke irô lohandohan’ny mpisôron̈o ndreky irô jiaby an̈isan’ny Fitsaran̈a An̈abo* aby io nitady raha han̈odian̈a Jesosy, baka izy hivonen̈a. Fa irô tsy nahita.
56 Maro vavolombelon̈o nan̈ody izy amy raha tsy marin̈y, kanefa nifanohitry raha nivolan̈indrô.
57 Aviô nisy olo sasany nitsangana, ke nan̈aratsy izy karaha ty:
58 “Zahay naharen̈y izy nivolan̈a: ‘Zaho handravan̈a tempoly niasain’ny tan̈an’olombelon̈o ty, aviô an̈atin’ny telo andra, zaho han̈ôrin̈y araiky hafa tsy niasain’ny tan̈an’olombelon̈o.’”
59 Fa ndray tam’izen̈y, mbala nifanohitry fo raha nivolan̈indrô.
60 Ke mpisôron̈obe nitsangana tan̈ivondrô tiô, aviô izy nan̈ontany Jesosy karaha ty: “Anao karaha tsy mivolan̈a! Tsy ren̈inao ma raha volan̈indrô momba anao zen̈y?”
61 Fa izy tsy namaly foeky fa jay fo. Ke mpisôron̈obe io nimpody nan̈ontany izy ndraiky: “Anao ma Kristy, Zanakan’ny Araiky Farany An̈abo?”
62 Ho Jesosy: “Zaho izy; ho hitanarô Zanak’olo hipetraka ankavanan̈an’ny Araiky Mahery* sady ho avy miaraka amy rôndron’ny lan̈itry.”
63 Ke nitriarin’ny mpisôron̈obe lambanany, baka iô ho izy: “Ino koa ma raha mbala ilavantsika vavolombelon̈o?
64 Efa ren̈inarô izy tsy nan̈isy fôtiny Zan̈ahary tiô in̈y! Ino fanapahan-kevitrinarô?”* Irô jiaby nivolan̈a fa izy man̈eva ho foaty.
65 Nisy olo nandraora taminany. Nilombofandrô saoranany, baka iô nivangoandrô tombok’ôndry izy, aviô ho irô taminany: “Aboaha iô baka anao mpaminan̈y zen̈y!” Baka iô, izy namezandrô mpiambin̈y aby io tefan-tsofin̈y, aviô izy nindesindrô.
66 Tamy Petera tambany tan-dakoro tao, araiky tamy mpanompovavin’ny mpisôron̈obe navy.
67 Petera koa fa hitany namindro, nizahany tsarabe izy, baka iô ho izy: “Anao koa mba niaraka tamy Jesosy baka a Nazareta.”
68 Fa izy nifamatra karaha ty: “Tsy haiko izy, sady tsy azoko foeky raha volan̈inao zen̈y.” Ke lôso izy nandeha tamy fidiran̈a amy lakoro io.
69 Hitan’ny mpanompovavy in̈y tiô izy, ke izy nimpody nivolan̈a tamin’olo nitsangana tiô: “Io namandrô.”
70 Fa izy mbala nifamatra fo. Tsy elan’izin̈y, irô olo aby nitsangana tiô nivolan̈a tamy Petera: “Anao zalahy namandrô ankitin̈y e, anao Galilianin̈y ke!”
71 Ke nanomboko nan̈ozon̈o ain̈inany* izy sady nifanta karaha ty: “Tsy haiko foeky lelahy volan̈inarô zen̈y ho zaho!”
72 Tiô ny iô, nisy akôholahy nan̈ena fan̈indroeny. Ke nazon’i Petera onon̈o raha nivolan̈in’i Jesosy taminany ty: “Akôholahy mbala tsendriky man̈ena indroe, intelo aby anao han̈ano sary tsy hahay zaho.” Nalahelo mare izy ke nanomboko nitomoan̈y.
Lamariky amy Pazy Ambany
^ Na: “irô nasiaka; irô nan̈amia tsin̈y.”
^ Na: “sajoa tanimanga.”
^ Abt: “efitry fandraisam-bahiny.”
^ Na: “nandry nandriran̈a.”
^ Abt: “Izy ty vatan̈anaka.”
^ Abt: “Izy ty lionaka.”
^ Na: “baka nihira salamo.”
^ Abt: “ho voatsikon̈o.”
^ Abt: “tsy ho voatsikon̈o.”
^ Abt: “ho voatsikon̈o.”
^ Na: “irô mpianatra.”
^ Abt: “baka lera io hiala lavitry izy.”
^ Izio volan̈a hebreo ndreky aramianin̈y; dikan’izio: “A Baba” na “A Papa.”
^ Na: “vôn̈ono; mazoto.”
^ Na: “an̈arany misikiny; lamba an̈atiny fo tavela.”
^ Na: “Fitsaran̈a An̈abo tamindrô Jiosy aby io; Synedriona.”
^ Abt: “ankavanan̈an’ny Angôvo.”
^ Na: “Akôry hevitrinarô?”
^ Man̈ozon̈o ain̈y zen̈y, man̈eky fa ho hisy raha ratsy havoa izy izikoa tsy marin̈y raha volan̈iny.
