Vaovao Tsara Nisoratin’i Marka 15:1-47
15 Andra mbala nahizikiziky, irô lohandohan’ny mpisôron̈o ndreky irô anti-pan̈ahy aviô irô mpanoratra lalàn̈a, tsy azôvy zen̈y fa irô jiaby an̈isan’ny Fitsaran̈a An̈abo* aby io, niaraka nivory. Jesosy nivahaorandrô, baka iô nindesindrô ke natolotrondrô tamy Pilato.
2 Pilato nan̈ontany izy: “Anao ma Mpanjakan’ny Jiosy?” Ho Jesosy: “Efa izy edy raha volan̈inao zen̈y.”
3 Ke maro raha nan̈aratsiandrô lohandohan’ny mpisôron̈o aby io izy.
4 Pilato nimpody nan̈ontany izy ndraiky: “Anao karaha tsy mamaly? Tsy ren̈inao ma raha marobe volan̈indrô momba anao zen̈y?”
5 Fa Jesosy tsy nivolan̈a foeky. Ke lany fan̈ahy Pilato.
6 Isaka fety, efa fataon’i Pilato nankafaka gadra araiky nangatahan’ny vahoaka.
7 Tamy fotoan̈a zen̈y, nisy lelahy araiky kahian̈a Barabasy niaraka nigadra tamin’olo mpanohitry fanjakan̈a. Irô olo aby io namono olo tamin’irô nanohitry fanjakan̈a.
8 Irô vahoaka aby io navy, ke irô nanomboko nangataka tamy Pilato han̈ano eraka raha efa fataony tamindrô.
9 Ho izy tamindrô: “Tianarô hivotsaorako ma Mpanjakan’ny Jiosy?”
10 Hain’i Pilato baka fa irô lohandohan’ny mpisôron̈o aby io be fô Jesosy, ke zen̈y nahavy irô nanolotro izy taminany.
11 Fa irô lohandohan’ny mpisôron̈o aby io nandrisiky vahoaka hangataka Barabasy hivotsaoran̈a.
12 Ke karaha ty ho Pilato tamindrô: “Ataoko akôry fo basy araiky kahianarô Mpanjakan’ny Jiosy?”
13 Irô nimpody nandronton̈o: “Antaon̈a amy pôtô* an̈y izy!”
14 Fa ho Pilato tamindrô: “Raha nan̈ino? Ino ma raha ratsy nataony?” Kanefa irô nahainandronton̈o mare fo: “Antaon̈a amy pôtô* an̈y izy!”
15 Ke Barabasy nivotsaoran’i Pilato, fôtony izy tihamparavoravo vahoaka. Jesosy koa fa baka nirahiny nivilezin̈y karavasy, izy nirahiny hahanton̈o amy pôtô.*
16 Ke izy nindesindrô maramila aby io nandeha tan-dakoro, tamy tran̈on’ny governera, baka iô maramila jiaby navorindrô.
17 Izy baka tiô nampisikinindrô lamba viôlé matoe, aviô irô nan̈amboatra satroboninahitry vita tamy fatsiky, baka iô izio nataondrô tamy lohanany.
18 Irô am’izay nanomboko nandronton̈o: “Mbalatsara,* Mpanjakan’ny Jiosy e!”
19 Nipopohandrô tamy bararata koa lohanany, aviô izy nandrorandrô. Irô baka iô nandohaliky ndreky nankôhoko nan̈oloan̈a izy.
20 Farany, irô koa fa baka nan̈adroadro izy, nadosondrô taminany lamba viôlé matoe in̈y, baka iô nampisikinindrô izy ndraiky lambanany ambelan̈a. Izy baka tiô nindesindrô hifantsihin̈y amy pôtô.
21 Nisy lelahy araiky baka tambanivolo zay nandalo tiô, ke izy niforsendrô hitondra hazofijalian̈anany.* Izio Simona baka a Kyrena, baban’i Aleksandra ndreky Rofosy.
22 Ke Jesosy nindesindrô tamy tany araiky kahian̈a amin’ny an̈aran̈a Golgota. “Babakin-doha” dikan’izio izikoa adika.
23 Tan̈y irô nan̈aohatra nan̈amia izy divain naharo miora mampadonto, kanefa izy tsy nety nigiaka.
24 Irô baka tiô namantsiky izy tamy pôtô, aviô nirasaindrô lambanany ambelan̈a ke nan̈anaovandrô antsapaka, misy hahaizandrô ino anjara ho azon’ny tsiaraikiaraiky.
25 Kadiriny nevera maraindrain̈y* andra tamin’irô namantsiky izy tamy pôtô.
26 Nataondrô tan̈abo tarỳ koa soratra momba antony namonoan̈a izy ty: “Mpanjakan’ny Jiosy.”
27 Baka iô nisy dahalo* aroe lahy koa nahanton̈ondrô tamy pôtô narikitry izy tiô, ke araiky tankavanan̈anany, baka iô araiky tankavianany.
28 ——
29 Ke nanihitihy izy olo nandalo tiô sady nan̈obokobon̈o, aviô ho irô: “Akôry ke! Anao karaha handeha handrongana tempoly aviô hanangana izio an̈atin’ny telo andra,
30 avaota baka ain̈inao ke mijotsoa baka amin’ny hazofijalian̈a* iô!”
31 Nan̈adroadro izy karaha zen̈y koa irô lohandohan’ny mpisôron̈o ndreky irô mpanoratra lalàn̈a aby io, ke irô nifampikoran̈a karaha ty: “Olo hafa navaotany kanefa tsy hainy man̈avotro ain̈inany!
32 Ambilà Kristy, Mpanjakan’Israely, hijotso baka amin’ny hazofijalian̈a* iô, am’izen̈y atsika hahita ke hino izy.” Ndray irô tamy pôtô narikitry izy tiô koa mba nanihitihy izy karaha zen̈y.
33 Ke nanjary nahiziky gômon̈o nan̈eran̈a faritry io jiaby, kadiriny midỳ* firaka troazera folakandra.*
34 Izikoa fa kadiriny troazera folakandra, Jesosy nandronton̈o mare karaha ty: “Elỳ, Elỳ, lamà sabaktanỳ?”, dikan’izio izikoa adika: “A Zan̈ahariko ô, a Zan̈ahariko ô, nan̈ino ma zaho nialanao?”
35 Karaha ty hon’olo sasany nitsangana narikitry tiô izikoa fa naharen̈y zen̈y: “Zahava! Izy mikaiky Elia.”
36 Nisy olo araiky nilomoay nangala eponzy ke nan̈ajobo izio tan̈atin’ny divain matsiko, baka iô izio nataony tamy bararata araiky ke namezany izy higiahany, sady ho izy: “Ambilà izy! Alô zahavantsika izikoa ho avy iô Elia hampijotso izy.”
37 Kanefa Jesosy niafatrafatra mare, baka iô izy naty.*
38 Ridô tamy toeran̈a masin̈y tao natriaka aroe, rango baka an̈abo firaka ambany.
39 Izikoa fa hitan’ny manamboninahitry nitsangana fananjò izy tiô raha jiaby nandalo tamin’izy niala fahin̈ana, ho izy: “Zanakan’ny Zan̈ahary ankitin̈y lelahy io.”
40 Nisy man̈angy nitazan̈a baka lavitry, an̈isan’izen̈y Maria Magdalena, Maria maman’i Jakoba hely ndreky Josesy, baka iô Salome.
41 Irô io nan̈araka Jesosy ndreky nikarakara izy, tamin’izy ta Galilia. Nisy man̈angy maro hafa nanonga ta Jerosalema niaraka taminany koa tiô.
42 Efa harivariva andra tam’izen̈y, sady Andra Fan̈oman̈ana, tsy ino zen̈y fa andra alohan’ny Sabata.
43 Josefa baka Arimatia, lelahy araiky manan-kaja an̈isan’ny Filan-kevitry,* navy. Izy koa mba niambin̈y Fanjakan̈an’ny Zan̈ahary. Nanan̈a korazy izy nandeha tamy Pilato ke nangataka fatin’i Jesosy.
44 Fa tian’i Pilato ho hay asa efa maty Jesosy, ke izy nikaiky manamboninahitry araiky aviô nan̈ontany izy.
45 Pilato koa fa baka nangala antoko tamy manamboninahitry io, Josefa namezany lalan̈a hangala faty io.
46 Izy koa fa baka nivanga lamba lin tsara mare ndreky nampijotso faty io, izio nifon̈ôsiny tamy lamba lin tsara mare in̈y, baka iô napetrany tamy fasan̈a nangadin̈a tan̈atin’ny lampimbato. Izy aviô nan̈aposy vato be araiky amy fidiran̈a amy fasan̈a io.
47 Fa Maria Magdalena ndreky Maria renin’i Josesy ndraiky mbala nidôko tiô nizaha tany nan̈apitrahan̈a fatin’i Jesosy.
Lamariky amy Pazy Ambany
^ Na: “Fitsaran̈a An̈abo tamindrô Jiosy aby io; Synedriona.”
^ Na: “Vonia.”
^ Na: “Vonia.”
^ Na: “hivonen̈a.”
^ Na: “Akôry ao.”
^ Abt: “Tamy lera fahatelo.”
^ Na: “mpangalatra.”
^ Abt: “tamy lera fahatsiota.”
^ Abt: “tamy lera fahasivy.”
^ Na: “nafaka fahin̈ana.”
^ Na: “Synedriona.”
