Vaovao Tsara Nisoratin’i Marka 3:1-35
3 Nimpody niditry tamy synagoga tao ndraiky izy. Nisy lelahy maty* tan̈ana zay tao.
2 Nizahavandrô Fariseo aby io tsarabe Jesosy tsao izy handeha hampajanga olo io amin’ny andra sabata, misy hahitandrô antony hiampangan̈a izy.
3 Ho izy tamy lelahy maty* tan̈ana io: “Mitsangàna aviô mavia an̈ivo eto.”
4 Baka iô ho izy tamindrô: “Ino ma raha mety atao amy Sabata: Man̈ano ny tsara sa man̈ano ny ratsy, man̈avotro fahin̈ana sa mamono olo?” Fa irô tsy nivolan̈a foeky.
5 Neloko izy nizaha irô, baka iô nalahelo mare izy fôtony irô manan̈a fô vato.* Ho izy tamy lelahy io: “Vavara tan̈ananao.” Nivavarin’ny lelahy io tan̈ananany ke izio janga.
6 Ke lôso irô Fariseo aby io niboaka, baka iô irô direkty nivory niaraka tamindrô olo aby an̈isan’ny antòko mpanohan̈a Heroda, fôtony irô tihamono Jesosy.
7 Fa Jesosy niala tiô, baka iô izy ndreky mpianatranany aby io nandeha tamôron-dranomasin̈y. Nisy olo marobe baka ta Galilia ndreky ta Jodia nan̈araka izy.
8 Ary ndray olo baka ta Jerosalema ndreky Idomea, baka iô baka tandaforehin’ny Ten̈aranon’i Jordany aviô baka tamy faritry man̈odidin̈y Tyro ndreky Sidona koa mba navy nan̈aton̈o izy, fôtony ren̈indrô raha marobe nataony.
9 Ke izy nan̈iraka mpianatranany han̈oman̈a sambo hely araiky mety hiondran̈any, tsao fo olo hisarombaka handeha aminany iô ke izy ho voarônjondrô.
10 Maro ankitin̈y olo nitahany, ke vory taminany tiô aby lan̈iany olo narary mare fôtony irô tihikasiky izy.
11 Ndray irô demony aby io koa, isaka irô nahita izy, irô nankôhoko nan̈oloan̈a izy sady nandronton̈o mare karaha ty: “Anao Zanakan’ny Zan̈ahary!”
12 Kanefa matetiky irô nifeperiny mare tsy han̈ambara amin’olo azôvy izy.
13 Nanonga tamy bongo izy, baka iô nikahiany lan̈iany olo nifidiny, ke irô nan̈aton̈o izy.
14 Izy nifidy* 12 lahy; apostoly nikahiany irô io. Irô io hiaraka aminany, baka iô hirahany hitory,
15 aviô hamezany fahifan̈a han̈aboaka demony.
16 Ty aby irô 12 lahy nifidiny:* Simona, araiky namezany an̈aran̈a Petera,
17 Jakoba zanakan’i Zebedio ndreky Jaona rahalahiny (Boanerjesy koa nikahiany irô io; dikan’ny an̈aran̈a io “Zanakan’ny Varatra”),
18 Andrea, Filipo, Bartolomeo, Matio, Tomasy, Jakoba zanakan’i Alfeo, Tadeo, Simona Kananeanin̈y,*
19 baka iô Jodasy Iskariota, araiky namadiky izy tafara tatỳ in̈y.
Izy baka tiô niditry tamy tran̈o araiky.
20 Vory ndraiky koa vahoaka, ke Jesosy ndreky mpianatranany tsy tafihinan̈a foeky.
21 Izikoa fa ren̈in-dry havany raha zen̈y, navy irô hanambotro izy, fôtony ho irô: “Izy efa nanjary lefaka.”
22 Nisy mpanoratra lalàn̈a koa nijotso baka a Jerosalema, ke ho irô: “Izy misy Belzeboba,* aviô angôvo baka amy sefondrô demony aby io ahavitany man̈aboaka demony.”
23 Nikahiany taminany tiô irô; ke izy nampiasa fan̈oharan̈a hamalian̈a irô: “Akôry hataon’i Satana man̈aboaka Satana?
24 Tsy hahadin̈y ela fanjakan̈a araiky izikoa irô samby irô ao miady;
25 ho ravan̈a fianakavian̈a* izikoa irô samby irô miady.
26 Ke izikoa Satana fo miady amin’ny ain̈inany tômpiny, hisaratsaraka edy izy, ke izy tsy hahadin̈y ela fa erany iô ninany.
27 Izikoa misy olo tihamaky tran̈on’ny* lelahy fatatra mare sady tihangalatra fanan̈ananany ao, tsy maintsy fiheziny antsendriky lelahy io, zay izy vo afaka mangala zay raha tiany halain̈a ao.
28 Ambarako anarô marin̈y tsarabe fa, hahazo familan-keloko zanak’olombelon̈o, na ino na ino fahotan̈a vitandrô ndreky tihitihy* nataondrô.
29 Fa izikoa olo araiky tsy man̈isy fôtiny fan̈ahy masin̈y, tsisy andra foeky hazahoany familan-keloko; ho voaheloko mandrakizay izy baka amy fahotan̈a nataony zen̈y.”
30 Nivolan̈a zen̈y izy fôtony irô nivolan̈a: “Izy misy demony.”
31 Tam’izen̈y, navy mamany ndreky rahalahiny aby io nitsangana tan-tany tao. Irô nan̈iraka olo hikaiky izy.
32 Kanefa nisy olo maro nipetraka nan̈odidin̈y izy, ke ho irô taminany: “Mamanao ndreky irô rahalahinao aby io mitady anao an-tany ao.”
33 Fa ho izy tamindrô: “Hainarô ma azôvy mamako ndreky rahalahiko?”
34 Baka iô izy nizaha irô olo nipetraka nan̈odidin̈y izy aby io, ke ho izy: “Irô io mamako ndreky rahalahiko!
35 Lan̈iany olo man̈ano sitrapôn’ny Zan̈ahary, izy rahalahiko ndreky anabaviko, baka iô mamako.”
Lamariky amy Pazy Ambany
^ Na: “malemy.”
^ Na: “malemy.”
^ Na: “irô tsisy hinakinaka.”
^ Na: “nanendry.”
^ Na: “nitindreny.”
^ Na: “araiky mafana fô.”
^ Izio an̈aran̈a hafa ikahian̈a Satana.
^ Abt: ”tran̈o.”
^ Abt: “tihiditry an-tran̈on’ny.”
^ Mety ho volan̈a tsy man̈isy fôtiny Zan̈ahary na raha masin̈y.
