Vaovao Tsara Nisoratin’i Marka 4:1-41
-
FAN̈OHARAN̈A MOMBA FANJAKAN̈AN’NY ZAN̈AHARY (1-34)
-
Mpamafy (1-9)
-
Antony nahavy Jesosy nampiasa fan̈oharan̈a (10-12)
-
Dikan’ny fan̈oharan̈a momba mpamafy (13-20)
-
Lalampon̈o tsy atao ambanin’ny tôn̈otôn̈o (21-23)
-
“Arakaraka eran̈an-draha ampiasainarô” (24, 25)
-
Mpamafy araiky nandry (26-29)
-
Voan’ny motardy (30-32)
-
“Jesosy nampiasa fan̈oharan̈a marobe” (33, 34)
-
-
Jesosy nampangin̈y tsiko naresaka mare (35-41)
4 Nampianatra tamôron-dranomasin̈y ndraiky koa izy. Nisy vahoaka marobe vory narikitry izy tiô, ke lôso izy nanonga tan̈abon’ny sambo baka iô izy nipetraka. Somary nihataka hely sisin-dranomasin̈y izy, fa olo jiaby ndraiky tamôron-dranomasin̈y tiô.
2 Ke izy nanomboko nampianatra irô raha maro. Nampiasa fan̈oharan̈a izy izikoa fa nan̈ano zen̈y, ke ho izy tamindrô:
3 “Tandrin̈esa ty: Nisy mpamafy niboaka hamafy.
4 Izy koa fa namafy, sasany tamy voam-bary aby io latsaka tamôron-dalan̈a, ke nisy vôron̈o navy nihinan̈a irô io.
5 Sasany ndraiky latsaka tamy tany be vatovato salakady tsy ampy faotaka. Nalaky naniry voam-bary aby io fôtony tsy lalin̈y faotaka tamy tany nisy irô tiô.
6 Fa izikoa fa nanonga masoandra, tsy din̈indrô voam-bary vo naniry aby io hafanan̈a, ke naiky irô io fôtony vahatrandrô tsy lôso lalin̈y.
7 Voam-bary sasany ndraiky latsaka tan̈atin’ny raha maniry feno fatsiky; naniry mare fatsiky aby io ke rakotro tao voam-bary vo naniry aby io, ke tsy namoa foeky irô.
8 Voam-bary sasany ndraiky latsaka tamy tany tsara. Naniry irô io sady nitombo, aviô namoa mare, ke sasany nazahoan̈a voany 30, sasany 60, sasany ndraiky 100.”
9 Aviô ho izy: “Lan̈iany manan̈a sofin̈y hindesin̈y mitandren̈y, mitandrin̈esa.”
10 Izikoa fa izy zaraiky fo tiô, sasany tamy mpianatranany ndreky irô 12 Lahy aby in̈y nan̈ontany izy momba fan̈oharan̈a aby in̈y.
11 Ho izy tamindrô: “Anarô nimboan̈a hahay dikan’ny sekire masin̈y momba Fanjakan̈an’ny Zan̈ahary. Fa amin’olo hafa ndraiky, fan̈oharan̈a fo ampiasaiko izikoa fa mampianatra irô.
12 Am’izen̈y ndray irô mizaha, tsisy raha ho hitandrô; aviô ndray irô maharen̈y, tsy ho haindrô aby dikan’ny raha ren̈indrô. Ke tsisy andra himpodianandrô amy Zan̈ahary ndreky hazahoandrô familan-keloko.”
13 Ho izy tamindrô koa: “Ndray dikan’ny fan̈oharan̈a araiky in̈y fo tsy hainarô, ke akôry hahaizanarô dikan’ny fan̈oharan̈a hafa jiaby?
14 “Mpamafy io mamafy hafatra momba Fanjakan̈an’ny Zan̈ahary.*
15 Olo sasany iziô miran̈a amy voam-bary nafafy tamôron-dalan̈a, ke miaraka irô maharen̈y hafatra io, avy Satana man̈ombotro hafatra nafafy tan̈atin’ny fôndrô tao.
16 Olo sasany ndraiky mitovy amy voam-bary nafafy tamy tany be vatovato; miaraka irô maharen̈y hafatra* io, direkty irô man̈eky izio ankaravoan̈a.
17 Naniry fo irô io fa tsy nahadin̈y ela, fôtony hafatra io tsy tafiditry lalin̈y tan̈atin’ny fôndrô tan̈y; ke miaraka misy prôblemo na fan̈injehan̈a mavoa irô baka amy fan̈ikiandrô hafatra io, irô efa vôly* edy.
18 Fa sasany ndraiky miran̈a voam-bary nafafy tamy raha maniry feno fatsiky. Irô io naharen̈y hafatra io,
19 fa izio fo rakotron’ny asalohan’ny fiainan̈a amy donia ty* ndreky angôvo mamitakan’ny harian̈a aviô fan̈irian̈a isan-karazany, ke manjary tsy mamoa.
20 Farany, voam-bary nafafy tamy tany tsara aby in̈y ndraiky, lan̈iany olo mitandren̈y hafatra io sady mandray izio tsarabe; mamoa mare irô io, ke sasany nazahoan̈a voany 30, sasany 60, sasany ndraiky 100.”
21 Karaha ty koa ho izy tamindrô: “Ndraiky misy olo man̈apetraka lalampon̈o ambanin’ny tôn̈otôn̈o* na ambanin’ny fandrian̈a? Tsy an̈abon’ny latabatra* tany tôkony han̈ambilàn̈a zen̈y?
22 Tsisy raha asitriky ke tsy mbala haboaka, baka iô tsisy raha asitriky mare ke tsy mbala hibolain̈y.
23 Lan̈iany olo manan̈a sofin̈y hindesin̈y mitandren̈y, mitandrin̈esa.”
24 Aviô ho izy tamindrô koa: “Tandrin̈esa tsarabe raha volan̈iko aminarô. Arakaraka eran̈an-draha ampiasainarô, han̈iran̈ana ninarô;* ia, ndray izy aby mbala mandilatra zen̈y raha ho azonarô.
25 Fôtony lan̈iany olo manan̈a, mbala hamezan̈a beben’ny efa anan̈any; fa lan̈iany olo tsy manan̈a ndraiky, ndray raha anan̈any fo mbala hadoso aminany.”
26 Karaha ty koa ho izy: “Fanjakan̈an’ny Zan̈ahary io miran̈a lelahy araiky man̈atsipy voan-draha amy tany.
27 Mandry izy alin̈y. Maraindrain̈y izy mifaoha. Voan-draha aby in̈y maniry aviô mitombo, kanefa tsy hainy foeky amy fomba akôry.
28 Iô fo tany mamokatra ho azy tsihelihely: Voanalohany, miboaka antsendriky raviny karaha ravin’ahitry in̈y, aviô tahony, farany am’izay feno voany amy tahony in̈y.
29 Ke miaraka irô vary aby in̈y matoe, irô io didiany amy mesom-bary, fôtony navy fotoan̈a fandidian̈a vary.”
30 Karaha ty koa ho izy: “Mety ampiran̈intsika amin’ino Fanjakan̈an’ny Zan̈ahary, aviô ino fan̈oharan̈a mety an̈azavantsika izio?
31 Izio mety ampitovisin̈y amy voan’ny motardy. Lera izy afafy amy tany, izio voan-draha farany hely amy voan-draha jiaby ambony tany.
32 Fa izio koa fa baka nafafy, izio maniry ke manjary an̈ana* farany maventy amin’ny an̈ana jiaby. Maventy sampan̈an’izio, ke avy vôron̈o miasa tran̈o ambanin’ny alokalokon’izio.”
33 Jesosy nampiasa fan̈oharan̈a marobe karaha zen̈y izikoa izy fa nan̈ambara volan̈an’ny Zan̈ahary tamindrô, ke irô io nataony nifan̈araka tamy raha takatran’ny jerindrô.
34 Ia, izy tsy nikoran̈a tamindrô izikoa tsy nampiasa fan̈oharan̈a. Kanefa nazavainy tamy mpianatranany raha jiaby irô koa fa nitaokan̈a.
35 Tamin’ny andra io fo, izikoa fa hariva andra, ho izy tamindrô: “Alô atsika hitsaka andaforehy arỳ.”
36 Irô koa fa baka nandravan̈a vahoaka, direkty Jesosy nindesindrô tamy sambo; nisy sambo hafa koa dia araiky taminany.
37 Tiô fo nisy tsiko naresaka mare, ke nisy daroba tsy vôly nantreky tamy sambo io, ke sambo io efa kalikaly ho feno rano.
38 Kanefa Jesosy tam’izen̈y tamy vodin’ny sambo io, nandry tamin’ny ondan̈a.* Ke nifohazindrô izy, aviô ho irô taminany: “A Mpampianatra, tsy ahoanao foeky ma atsika ty efa ho foaty?”
39 Ke izy nitsangana, baka iô nivolan̈iny mare tsiko io ke ho izy tamy ranomasin̈y: “Basy zay! Mangìna!” Direkty vôly tsiko be in̈y, aviô nanjary kalma am’izay andra.
40 Ke ho izy tamindrô: “Ino ma raha mampavozo* anarô? Anarô ma mbala tsy manan̈a finoan̈a fo?”
41 Fa irô navozo mare, ke ho irô samby irô: “Azôvy marin̈y izy ty? Firaka amy tsiko ndreky ranomasin̈y mbala man̈araka volan̈anany fo!”
Lamariky amy Pazy Ambany
^ Abt: “mamafy volan̈a.”
^ Abt: “volan̈a.”
^ Abt: “avoatsikon̈o.”
^ Na: “tôn̈otôn̈o fan̈iran̈ana raha.”
^ Abt: “plasy fasian̈a lalampon̈o.”
^ Na: “Arakaraka raha ataonarô amin’olo raha ataondrô aminarô.”
^ Na: “feliky.”
^ Na: “kosain.”
^ Na: “mampiasaloha.”
