Vaovao Tsara Nisoratin’i Marka 5:1-43
5 Irô baka tiô navy tandaforehin’ny ranomasin̈y, tamy faritry nisy irô Gerasianin̈y aby io.
2 Niaraka Jesosy nijotso baka tamy sambo, nisy lelahy nisazaohan’ny demony nan̈aton̈o izy. Lelahy io niboaka baka tam-pasan̈a.
3 Izy nipetraka tamy fasan̈a io tao. Teky koa, tsiary nisy olo nahavita namehy izy, ndray tamy silisily.
4 Matetiky izy nifihezin̈y tamy silisily ndreky nasian̈a gadra vy, kanefa silisily io nitosahany aviô gadra vy io nitorotoroeny. Tsisy olo nanan̈a angôvo nahavitan̈a nifehy izy.
5 Matsan̈a alin̈y, izy tsy vôly niafatrafatra tam-pasan̈a ndreky tamy bongo, aviô ain̈inany nididididiany tamy vato.
6 Jesosy koa fa hitan’ny lelahy io baka lavitry, izy nilomoay baka iô izy nankôhoko nan̈oloan̈a Jesosy.
7 Ke izy nandronton̈o mare karaha ty: “Ino ma dianao atỳ, Jesosy Zanakan’ny Zan̈ahary Farany An̈abo? Zaho man̈iraka anao hifanta amy Zan̈ahary fa anao tsy hampijaly zaho.”
8 Fôtony Jesosy efa nivolan̈a taminany: “Miboaha baka amy lelahy io anao demony ty!”
9 Fa Jesosy nan̈ontany izy: “Azôvy an̈aranao?” Ho izy: “An̈aran̈anaka Andian-tafiky, fôtony maro zahay ato.”
10 Ke izy tsy vôly niangavy baka Jesosy tsy handroaka irô demony aby io hiala amy faritry io.
11 Nisy komankory marobe nihinan̈a tsy lavitry bongo io tiô.
12 Ke irô demony aby io niangavy izy karaha ty: “Alifasa miditry amindrô komankory aby irỳ kony zahay e.”
13 Ke irô nimboany han̈ano zen̈y. Irô demony aby io baka tiô niboaka, aviô irô niditry tamy komankory aby io. Komankory aby io kadiriny 2 000 tiô. Irô io am’izay nilomoay namarantan̈a tamy fampan̈a, ndreky farany irô latsaka tan-dranomasin̈y ke naty.
14 Irô tsiman̈ajan’ny komankory aby in̈y ndraiky nilefa, ke lôso irô nitantara raha zen̈y tamin’olo tan-tanàna tao ndreky tambanivolo. Ke navy olo nizaha raha nandalo.
15 Irô koa fa navy tamy Jesosy tiô, hitandrô lelahy nisazaohan’ny demony in̈y, tsy azôvy zen̈y fa araiky nisy Andian-tafiky in̈y, nipetraka, efa misikin̈y lamba sady efa ao tsara jerinany. Ke irô navozo.
16 Nitantaraindrô olo aby nahita raha nandalo tiô tamindrô koa raha nandalo tamy lelahy nisazaohan’ny demony in̈y ndreky tamindrô komankory aby in̈y.
17 Ke irô niangavy Jesosy hiala tamy faritry nisy irô.
18 Jesosy koa fa nanonga tamy sambo, lelahy efa navy nisazaohan’ny demony in̈y niangavy izy han̈ambela izy hiaraka aminany.
19 Kanefa izy tsy nimboan’i Jesosy, fa ho izy taminany: “Modia amin-drỳ havanao an̈y, baka iô tantarà amindrô raha jiaby nataon’i Jehovah taminao ndreky fomba namindrany fô taminao.”
20 Ke lôso lelahy io nandeha tamy faritry Dekapolisy,* aviô izy nanomboko nitory momba raha jiaby nataon’i Jesosy taminany. Ke olo jiaby lany fan̈ahy.
21 Tafaran’i Jesosy niondran̈a sambo ndraiky koa ke nandeha nitsaka tandaforehy, nisy vahoaka marobe nivory taminany tiô; izy tam’izen̈y tamôron-dranomasin̈y.
22 Jairo, araiky tamindrô mpiandraikitry synagoga aby io, navy. Niaraka izy nahita Jesosy, izy nandohaliky nan̈oloan̈a vitinany.
23 Impirimpiry izy niangavy Jesosy karaha ty: “Marary mare* zanako man̈angy hely ao. Mba mavia kony, azafady e! An̈apitraha tan̈ana izy baka izy ho janga ke ho velon̈o.”
24 Ke Jesosy niaraka taminany, baka iô nisy vahoaka marobe nan̈araka izy sady nifanefisefy taminany tiô.
25 Nisy man̈angy zay nandeha lio tan̈atin’ny 12 taon̈o.
26 Efa maro dôkotera nandihanany, kanefa nampijaly izy aby fitahan̈a nataondrô. Ritry fanan̈ananany jiaby, fa fahasalaman̈anany tsy nahaitsara fa nahainandombolombo fo.
27 Izy koa fa naharen̈y raha momba Jesosy, lôso izy nisefatsefaka namakivaky vahoaka, baka iô izy nan̈aton̈o Jesosy baka tafara ke nikasiky lambanany ambelan̈a.
28 Fôtony ho izy: “Zaho ndray mikasiky lambanany ambelan̈a fo, zaho ho janga edy.”
29 Ke lionany nandeha in̈y direkty vôly; ren̈iny tsarabe tan̈atin’ny ain̈inany tan̈y fa izy janga tamin’ny aretin̈y nampijaly izy in̈y.
30 Tiô ny iô, nisy angôvo ren̈in’i Jesosy niala taminany, ke izy nitodiky nizaha vahoaka salakady nan̈ontany: “Azôvy nikasiky lambanaka tiô in̈y?”
31 Fa ho irô mpianatranany aby io taminany: “Hitanao tsarabe vahoaka mifanefisefy aminao io, ke anao mbala man̈ontany: ‘Azôvy nikasiky zaho?’”
32 Fa izy mbala nitoditodiky fo nizaha azôvy nikasiky izy.
33 Ke man̈angy io navozo sady nangôrohôro, fôtony hainy raha nandalo taminany. Ke izy nan̈aton̈o baka iô nandohaliky nan̈oloan̈a Jesosy, aviô nambarany izy ny marin̈y jiaby.
34 Ho Jesosy taminany: “Finoan̈anao nampajanga anao, zanako. Mindao, aza miasaloha, fa efa tsy himpody aminao eky aretin̈y nampijaly anao in̈y.”
35 An̈atin’izy mbala mivolan̈a fo, nisy lelahy sasany baka tan-tran̈on’ny lelahy mpiandraikitry synagoga io navy ke nivolan̈a: “Zanakanao naty! Ke aza tabatabain̈a eky Mpampianatra.”
36 Kanefa ren̈in’i Jesosy volan̈andrô zen̈y, ke ho izy tamy mpiandraikitry synagoga io: “Anao aza mavozo.* Manàn̈a finoan̈a.”
37 Tsisy olo nambelany han̈araka izy, izikoa tsy Petera ndreky Jakoba, aviô Jaona rahalahin’i Jakoba fo.
38 Irô koa fa navy tamy tran̈on’ny lelahy mpiandraikitry synagoga io, izy nahita olo naresaka ndreky nitomoan̈y baka iô niafatrafatra mare.
39 Izy koa fa niditry, ho izy tamindrô: “Nan̈ino ma anarô mitomoan̈y ndreky maresaka be karaha zen̈y? Tsaiky io tsy maty fa mandry.”
40 Ke izy nimoezandrô.* Fa izy koa fa baka nan̈iraka olo jiaby hiboaka, nindesiny niaraka taminany raimandrenin’ny tsaiky io ndreky irô olo niaraka taminany aby io, baka iô izy niditry tamy tany nisy tsaiky io.
41 Ke tan̈anan’ny tsaiky io nisambôriny, baka iô ho izy taminany: “Talita komỳ.” Izikoa adika, dikan’izio: “A tsaiky man̈angy ty, ho zaho aminao: Mitsangàna!”
42 Ke tiô ny iô tsaiky man̈angy io niarin̈y, baka iô nanomboko nandeha. (Tsaiky io 12 taon̈o.) Niaraka iry olobeny nahita raha zen̈y, haravoan̈a tsisy ambaka izy nindrô.
43 Kanefa impirimpiry izy namepetry irô* baka irô tsy han̈ambara raha zen̈y amin’olo, aviô nirahiny namezan̈a raha hoanin̈y tsaiky io.
Lamariky amy Pazy Ambany
^ Na: “Faritry Misy Tanàna Folo.”
^ Na: “Efa ho foaty.”
^ Na: “aza mavozo eky.”
^ Na: “nadroedroendrô.”
^ Na: “Kanefa izy namepetry irô mare.”
