Vaovao Tsara Nisoratin’i Matio 18:1-35
18 Tamy leran’izen̈y, irô mpianatran’i Jesosy aby io nan̈aton̈o izy sady nivolan̈a: “Azôvy ma farany be amy Fanjakan̈an’ny lan̈itry?”
2 Ke izy nikaiky tsaiky hely araiky, aviô tsaiky io nampitsanganiny tan̈ivondrô tiô,
3 baka iô karaha ty ho izy: “Ambarako anarô mazava tsarabe fa tsy hiditry amy Fanjakan̈an’ny lan̈itry foeky anarô izikoa anarô tsy man̈aova toe-tsain̈inarô,* ke manjary karaha tsaiky hely.
4 Lan̈iany olo manetry ten̈a karaha tsaiky hely ty, izy ny farany be amy Fanjakan̈an’ny lan̈itry;
5 baka iô lan̈iany olo mandray tsaiky hely karaha araiky ty, baka amy fan̈ajany an̈aran̈anaka, mandray zaho koa.
6 Fa izikoa misy olo man̈ano raha hahavy araiky amindrô madiniky mino zaho aby ty hiala amy finoan̈a,* tsaratsara aminany asian̈a vato maventy fandisanan̈a vary* amy tendanany, baka iô izy hatsipy amy ranomasin̈y lalin̈y be an̈y.
7 “Ho azon-draha donia ty, fôtony izity man̈ano raha hahavy olo hanota!* Marin̈y fa tsy maintsy ho hisy raha fo hahavy olo araiky hanota, kanefa ho azon-draha lan̈iany olo man̈ano raha hahavy olo hafa hanota!
8 Ke izikoa tan̈ananao na vitinao mahavy anao hanota, tapaha izio baka iô aria lavitry anao. Sitrany anao tapaka tan̈ana na tapaka vity kanefa mahazo fiainan̈a, tozay anao manan̈a tan̈ana aroe na vity aroe kanefa anao hatsipy amy môtro mirehitry mandrakizay.*
9 Baka iô izikoa masonao mahavy anao hanota, ipoaha an̈y izio aviô aria lavitry anao. Sitrany anao tsisy maso ilany kanefa mahazo fiainan̈a, tozay manan̈a maso aroe kanefa hatsipy amy Gehena* mirehitry.
10 Mitandrema tsao anarô tsy man̈isy fôtiny araiky amindrô madiniky aby io, fôtony zaho man̈ambara anarô fa anjelindrô an-dan̈itry an̈y mifandray amy Babako an-dan̈itry an̈y fo.*
11 ——
12 “Akôry hevitrinarô? Izikoa olo araiky manan̈a ôndrikôndriky 100 kanefa araiky amindrô io very, tsy ambelany amy bongo iô antsendriky irô 99 aby io, baka iô lôso izy mitsakaraka araiky very in̈y?
13 Ambarako anarô mazava tsarabe fa, ôndrikôndriky araiky in̈y koa fa hitany, in̈y ny ten̈a mamparavoravo izy mandilatra irô 99 tsy very aby io.
14 Karaha zen̈y koa fa, tsy tian’ny Babako* an-dan̈itry an̈y hisy ho very foeky na araiky amindrô madiniky aby io.
15 “Rahalahinao koa manota, anao mandihana aminany an̈y, ke anarô koa fa mitaokan̈a, ambarà izy hadisovan̈anany.* Izikoa izy mitandren̈y anao, dikan’izen̈y efa vitanao nan̈arin̈y rahalahinao.
16 Fa izikoa ndraiky izy tsy mitandren̈y anao, anao mitondrasa olo araiky na aroe miaraka aminao, amy zen̈y ho voamarin̈y tsarabe raha jiaby baka amy raha volan̈in’ny* vavolombelon̈o aroe na telo.
17 Izikoa izy tsy mitandren̈y irô, koràn̈a fiangonan̈a. Izikoa mbala tsy tandrin̈esany fo fiangonan̈a, ataova karaha olon’ny donia ty ndreky karaha mpamory hetra izy.
18 “Ambarako anarô mazava tsarabe fa, zay raha hifihezinarô ambony tany eto efa voafehy koa an-dan̈itry an̈y, aviô zay raha hivahanarô ambony tany eto efa voavaha koa an-dan̈itry an̈y.
19 Ambarako anarô mazava tsarabe ndraiky koa fa, izikoa misy aroe aminarô ambony tany eto mifan̈araka fa hivavaka momba raha araiky matomboko, hivalian’ny Babako an-dan̈itry an̈y vavakandrô zen̈y.
20 Fôtony izikoa misy olo aroe na telo mivory amin’ny an̈aran̈anaka, ndray aia ndray aia tany misy irô, zaho efa an̈ivondrô iô edy.”
21 Petera baka tiô nan̈aton̈o izy sady nivolan̈a karaha ty: “A Tômpo, izikoa rahalahiko manota aminaka, impiry ma zaho tôkony han̈ambela hadisovan̈anany? Impito?”
22 Ho Jesosy taminany: “Aha! Tsy im-7 fo fa im-77.
23 “Ke Fanjakan̈an’ny lan̈itry mety ampiran̈iny amy mpanjaka araiky mitaky traosa amy mpanomponany.
24 Izikoa izy fa nanomboko nitaky volanany, nirahiny nindesin̈y taminany tiô mpanompo araiky nanan̈any 10 000 talenta.*
25 Kanefa tsy avoaefan’ny mpanompo io traosanany, ke nirahin’ny mpanjaka io nalafo lelahy io ndreky vady aman-janakanany baka iô raha jiaby nanan̈any, baka traosa io ho voaefa.
26 Ke mpanompo io nandohaliky sady nankôhoko nan̈oloan̈a izy, ke nivolan̈a karaha ty: ‘Mafadiana kony tômpoko anao ô, ambesa hely fo fa hifaiko volanao jiaby.’
27 Nahinakinaka izy mare mpanjaka io, ke nifoan̈any traosan’ny mpanompo io, baka iô izy nambelany nandeha.
28 Fa mpanompo io koa fa niala tiô, izy nahita mpanompo araiky hafa nanan̈any 100 denaria. Mpanompo io nisambôriny aviô nikindainy, ke ho izy taminany: ‘Ifà volanaka jiaby aminao an̈y!’
29 Ke mpanompo hafa io nandohaliky sady niangavy izy karaha ty: ‘Ambesa hely fo fa hifaiko volanao ô!’
30 Fa izy tsy nan̈eky foeky. Ke nampidiriny ta prizon tan̈y mpanompo io firaka traosanany jiaby avoaefany.
31 Nalahelo mare irô mpanompo hafa aby io izikoa fa nahita raha zen̈y, ke nandeha nitantaraindrô tamy mpanjaka tan̈y raha jiaby nandalo.
32 Mpanjaka io koa fa baka nan̈iraka olo nikaiky izy, ho izy taminany: ‘Mpanompo ratsy fan̈ahy ty! Anao koa fa nilafidafiky taminaka, nifoan̈ako aby traosanao jiaby.
33 Ke anao tsy mba tôkony namindra fô tamy mpanompo namanao, karaha nataoko namindra fô taminao in̈y?’
34 Neloko mare mpanjaka io, ke nirahiny nisambôrin̈y izy baka iô nigadrain̈a,* firaka traosanany jiaby avoaefany.
35 Karaha zen̈y koa raha handeha hataon’ny Babako an-dan̈itry an̈y aminarô, izikoa anarô tsy man̈ambela hadisovan̈an’ny rahalahinarô amy fô madio.”
Lamariky amy Pazy Ambany
^ Abt: “tsy mimpody.”
^ Abt: “ho voatsikon̈o.”
^ Na: “vato fandisanan̈a vary ahodin̈in’ny borìky.”
^ Abt: “ho voatsikon̈o.”
^ Tsy ino zen̈y fa fandripahan̈a mandrakizay. Zahava F.V. “Gehena.”
^ Abt: “mahita saoran’ny Babako an-dan̈itry an̈y fo.”
^ Na mety ho: “Babanarô.”
^ Abt: “anara izy.”
^ Abt: “amy vavany.”
^ Volafotsy 10 000 talenta = 60 000 000 denaria.
^ Abt: “ke natôndrony tamy mpiambin̈y prizon.”
