Vaovao Tsara Nisoratin’i Matio 19:1-30
19 Jesosy koa fa baka nivolan̈a raha jiaby zen̈y, izy niala ta Galilia, baka iô izy nitsaka tandaforehin’ny Ten̈aranon’ny Jordany, ke nandeha tamy sisin-tanin’ny Jodia.
2 Nisy olo marobe nan̈araka izy tan̈y, ke nitahany aby lan̈iany olo narary.
3 Nisy Fariseo nan̈aton̈o izy fôtony irô tihitsapa jery izy. Ho irô taminany: “Mety misaraka amy vadiny fo ma lelahy na ino na ino antony hisarahany aminany?”
4 Ho Jesosy tamindrô: “Mbala tsiary nivakianarô ma fa tamy Zan̈ahary niasa olombelon̈o tamy voanalohany tan̈y, irô io nataony lelahy ndreky man̈angy,
5 ke ho izy: ‘Zen̈y mahavy lelahy hiala babany ndreky reniny, aviô hitambatra amy vadiny, ke hanjary nôfotro araiky fo irô roe’?
6 Ke efa tsy aroe eky irô fa nôfotro araiky. Olo koa fa natambatran’ny Zan̈ahary lazioga araiky, irô tsy tôkony hisarahan’olo.”
7 Ho irô taminany: “Ke nan̈ino fo basy Mosesy nivolan̈a fa, izikoa lelahy araiky tihisaraka amy vadiny, mila amezany taratasin’ny divorsy man̈angy io, aviô izy halefany mandeha?”
8 Ho izy tamindrô: “Nambelan’i Mosesy hisaraka amy vadinarô anarô fôtony anarô mierin̈y olo,* fa tsy karaha zen̈y tamy voanalohany tan̈y.
9 Ambarako anarô fa, lan̈iany lelahy misaraka amy vadiny ke manambady olo hafa, izikoa tsy raha baka amy fijangajangan̈a* zaraiky fo antony isarahany, izy mandiadia vady.”
10 Ke ho irô mpianatranany aby io taminany: “Izikoa karaha zen̈y edy kabaron’ny vadian̈a, sitrany tsy manambady ay!”
11 Ho izy tamindrô: “Tsy olo jiaby mahavita zen̈y, fa zay olo namezan’ny Zan̈ahary kadô io fo.
12 Misy iziô olo tsy manambady* fôtony rango izy vo teraka efa misy antsa, baka iô misy koa olo tsy manambady fôtony izy nivosirin’olo.* Misy ndraiky kinia tsy manambady amy zen̈y iro mahavita be amy Fanjakan̈an’ny lan̈itry. Tsara izikoa tsy manambady lan̈iany olo mahavita midôko tsy manambady.”
13 Baka iô nisy tsaiky nindesin’olo taminany tiô baka izy hametra-tan̈ana amindrô, ndreky hivavaka nindrô. Fa irô olo aby io nisiahan’ny mpianatranany.
14 Kanefa ho Jesosy: “Aza sakanan̈a irô tsaiky aby io fa ambilà irô han̈aton̈o zaho, fôtony nin’olo karaha irô io Fanjakan̈an’ny lan̈itry.”
15 Ke izy nametra-tan̈ana tamindrô, aviô izy lôso.
16 Baka iô nisy manafo lahy araiky nan̈aton̈o izy sady nivolan̈a karaha ty: “Mpampianatra, ino ma raha tsara tsy maintsy ataoko baka zaho hahazo fiainan̈a tsisy farany?”
17 Ho Jesosy taminany: “Nan̈ino ma anao man̈ontany zaho momba raha tsara? Araiky fo ny tsara.* Fa izikoa anao tihahazo fiainan̈a tsisy farany, areha fo didin’ny Zan̈ahary.”
18 Ho izy tamy Jesosy: “Lay karakôry aby?” Jesosy nivolan̈a: “Aza mamono olo, aza mandiadia vady, aza mangalatra, aza mitsangana ho vavolombelon̈o mavandy,
19 hajà babanao ndreky reninao, baka iô tiava namanao karaha ataonao tia ain̈inao.”
20 Fa ho manafo lahy io taminany: “Efa narehako aby didy aby zen̈y, ke ino raha mbala mila ataoko?”
21 Ho Jesosy taminany: “Izikoa anao tiho lavorary,* mindao alafaosa fanan̈ananao jiaby, baka iô vola azonao baka amy zin̈y ameza olo masikiny, amy zen̈y anao hanan̈a harian̈a an-dan̈itry an̈y. Izikoa fa vitanao raha aby zen̈y, alô han̈ara-dia zaho.”
22 Izikoa fa ren̈in’ny manafo lahy io raha zen̈y, nalahelo mare izy sady lôso nandeha, fôtony izy nanan-draha mare.
23 Ke ho Jesosy tamy mpianatranany aby io: “Ambarako anarô mazava tsarabe fa, ho sarotro amin’olo mpan̈arivo hiditry amy Fanjakan̈an’ny lan̈itry.
24 Ampodiko ndraiky, ho moramora amy shamô hiditry amy lavakan’ny fanjaitry, tozay amin’olo mpan̈arivo hiditry amy Fanjakan̈an’ny Zan̈ahary.”
25 Lany fan̈ahy irô mpianatra aby io izikoa fa naharen̈y zen̈y, ke ho irô taminany: “Ke mbala pôsibla ho hisy olo ho voavonjy edy va?”
26 Nizahavany tsarabe irô, baka iô ho izy: “Amin’olombelon̈o fo raha zen̈y tsy pôsibla, fa amy Zan̈ahary tsisy raha tsy pôsibla.”
27 Ho Petera taminany: “Zahay efa nahafoe raha jiaby baka iô nan̈araka anao, ke ino basy raha ho azonay?”
28 Ho Jesosy tamindrô: “Ambarako anarô mazava tsarabe fa, izikoa fa hampody vaovao raha jiaby, ke Zanak’olo hipetraka amy sezy fiandrianan̈anany be voninahitry, anarô nan̈ara-dia zaho io hipetraka amy sezy fiandrianan̈a 12, ke hitsara foko 12-ny Israely.
29 Ke zay olo nahafoe tran̈o, na rahalahy, na anabavy, na baba, na reny, na zanaka, na tany fôtony izy mpan̈ara-dia zaho, hahazo injaton’ny raha nahafoeny, aviô handova fiainan̈a mandrakizay.
30 “Kanefa maro amin’olo voanalohany hanjary farany, fa ny farany ndraiky ho voanalohany.
Lamariky amy Pazy Ambany
^ Abt: “fôtony anarô manan̈a fô vato.”
^ Na: “Misy iziô enìky.”
^ Abt: “fôtony nadoso voan’ny antody.”
^ Dikan’izio, Zan̈ahary zaraiky fo manan̈a zo hamaritry ino ny tsara.
^ Na: “feno.”
