Vaovao Tsara Nisoratin’i Matio 21:1-46
-
Jesosy niditry ta Jerosalema tamy voninahitry (1-11)
-
Jesosy nan̈adio tempoly (12-17)
-
Jesosy nan̈ozon̈o kakazo aviavy (18-22)
-
“Fahifan̈a baka amin-jôvy an̈anaovanao raha aby io?” (23-27)
-
Fan̈oharan̈a momba zanaka aroe lahy (28-32)
-
Fan̈oharan̈a momba mpambôly namono olo (33-46)
-
Vato fehizoro farany maventy tsy nasiandrô mpan̈amboatra tran̈o aby io fôtiny (42)
-
21 Irô koa fa narikitry ho avy ta Jerosalema, irô nidôko ta Betifaga tamy Bongo Olivy. Jesosy nan̈iraka mpianatranany aroe lahy,
2 ke ho izy tamindrô: “Mindao anarô mandeha amy tanàna hely irỳ. Ao anarô hahita borìky mirohy, zanany miaraka aminany iô. Vahà irô io, baka iô indesa aminaka atỳ.
3 Izikoa misy olo man̈ontany anarô, karaha ty volàn̈a: ‘Ilain’ny Tômpo irô ty.’ Direkty hambelany hindesinarô edy irô io.”
4 Niboaka ankitin̈y raha zen̈y, baka ho tanteraka raha nirahan̈a nambaran’ny mpaminan̈y ty:
5 “Volàn̈a amy zanakan’i Ziona man̈angy: ‘Navy indriô mpanjakanao man̈aton̈o anao. Izy manetry ten̈a, aviô izy mitenginy borìky, ia, zanakan’ny borìky, tsy ino zen̈y fa zanakan’ny biby mpitondra entan̈a.’ ”
6 Ke lôso mpianatranany aroe lahy in̈y, aviô nataondrô aby raha nan̈irahan’i Jesosy irô.
7 Nindesindrô roe lahy borìky io ndreky zanakanany, aviô napetrakandrô tan̈abon’ny borìky aby io lambandrô ambelan̈a. Jesosy baka tiô amizay nitenginy tan̈abon’ny zanakan’ny borìky io.
8 Nisy olo marobe koa tiô, ke ankamaraozandrô namelatra lambandrô ambelan̈a tamy lalan̈a, baka iô nisy koa nanapaka sampan̈a palmie, ke namelatra zen̈y tamy lalan̈a.
9 Baka iô koa nisy olo marobe nandeha talohanany ndreky nan̈araka tafaranany, ke irô tsy vôly nandronton̈o karaha ty: “A Zan̈ahary e, miangavy anao zahay, mba vonjia kony Zanakan’i Davida e! Irarian̈a hahazo hatsaran̈a araiky avy amin’ny an̈aran̈an’i Jehovah! A Zan̈ahary amy lan̈itry an̈abo an̈y e, mba vonjia kony izy e!”
10 Jesosy koa fa niditry ta Jerosalema, nialamboetry olo jiaby tan-tanàna tao, ke ho irô: “Azôvy eky io?”
11 Ho irô olo dia araiky taminany aby io: “Izio Jesosy baka Nazareta a Galilia. Izy mpaminan̈y nampan̈antinain̈y in̈y!”
12 Jesosy niditry tamy tempoly tao, ke nitoravany olo jiaby nivarotro ndreky nivanga raha tao. Narongadrongany koa latabatrandrô mpanakalo vola aby io ndreky sezindrô mpivarotro pizon aby io.
13 Ke ho izy tamindrô: “Ty raha efa voasoratra: ‘Tran̈o fivavahan̈a hikahian̈a tran̈onaka’, kanefa ndraiky izity ataonarô lavaka fisitrihan’ny mpangalatra.”
14 Nisy olo gila ndreky olo malemy vity koa nan̈aton̈o izy tamy tempoly tao, ke irô nitahany.
15 Neloko irô lohandohan’ny mpisôron̈o ndreky mpanoratra lalàn̈a aby io, izikoa fa nahita raha maro mahagaga nataony ndreky naharen̈y irô tsaiky lelahy tamy tempoly tao nandronton̈o karaha ty: “A Zan̈ahary e, mba vonjia kony Zanakan’i Davida e!”
16 Ke ho irô tamy Jesosy: “Mba ren̈inao ma raha volan̈indrô tsaiky aby io?” Ho izy tamindrô: “Ia, ren̈iko. Izio ma tsiary nivakianarô volan̈a aby ty: ‘Ataonao raha mahavy vavan’ny tsaiky ndreky vavan’ny zaza hidera anao’?”
17 Irô baka tiô nialàny, aviô niala tamy tanàna io izy ke lôso izy nandeha ta Betania. Tan̈y izy nandry alin̈y.
18 Kiakandran’izin̈y, maraindrain̈y be, tamin’izy tan-dalan̈a himpody a Jerosalema in̈y, izy naharen̈y mosary.
19 Nahita kakazo aviavy izy tamôron-dalan̈a; izy koa fa nan̈aton̈o izio, zahany, tsisy voany foeky aviavy io fa raviny fo. Ke ho izy tamy kakazo io: “Anò tsy hamoa eky anao mandrakizay!” Ke tiô ny iô aviavy io nalazo.
20 Izikoa fa hitandrô mpianatranany aby io raha zen̈y, lany fan̈ahy irô. Ke ho irô: “Tamy fomba akôry ma nahavy aviavy io direkty nalazo?”
21 Ke ho Jesosy tamindrô: “Ambarako anarô mazava tsarabe fa, izikoa anarô manan̈a finoan̈a sady tsy misalasala, anarô hahavita han̈ano raha mitovy amy raha nataoko tamin’ny aviavy io. Tsy zen̈y fo fa, ndray anarô hivolan̈a amy bongo irỳ: ‘Mitsangàna, baka iô mitandatsaha an-dranomasin̈y an̈y’, ho tanteraka edy raha zen̈y.
22 Izikoa anarô manan̈a finoan̈a, ho azonarô aby zay raha hangatahanarô amy vavaka.”
23 Jesosy baka tiô nandeha tamy tempoly tao. An̈atin’izy mbala mampianatra in̈y, nan̈aton̈o izy irô lohandohan’ny mpisôron̈o ndreky irô anti-pan̈ahin’ny vahoaka aby io, ke ho irô taminany: “Fahifan̈a baka amin-jôvy an̈anaovanao raha aby io? Aviô azôvy nan̈iraka anao han̈ano irô io?”
24 Ke ho Jesosy tamindrô: “Zaho koa mba misy raha araiky han̈ontaniako anarô. Izikoa ambaranarô zaho valiny, hambarako anarô edy fahifan̈a baka amin-jôvy an̈anaovako raha aby io.
25 Baka taia nazahoan’i Jaony fahifan̈a han̈ano batisa? Baka an-dan̈itry sa baka amin’olombelon̈o?” Ke irô nifampikoran̈a karaha ty: “Izikoa atsika mivolan̈a: ‘Baka an-dan̈itry’, izy hivolan̈a amintsika: ‘Ke nan̈ino fo anarô tsy nino izy?’
26 Fa izikoa ndraiky atsika mivolan̈a: ‘Baka amin’olombelon̈o’, atsika ho azon-draha amy vahoaka, fôtony irô jiaby mihevitry fa Jaony in̈y mpaminan̈y.”
27 Ke ho irô tamy Jesosy: “Tsy hainay.” Ke ho izy tamindrô: “Tsy ambarako anarô koa basy fahifan̈a baka amin-jôvy an̈anaovako raha aby io.
28 “Akôry hevitrinarô? Nisy lelahy araiky nanan-janaka aroe lahy. Lôso izy nan̈aton̈o araiky talan̈olo, ke karaha ty ho izy: ‘A zanako, mindao anao miasa amy tanin’ny rezain an̈y niany.’
29 Ho zanany io taminany: ‘Zaho tsy avy an̈y ay!’ Kanefa izy baka tiô nanen̈iny ke izy nandeha fo.
30 Nan̈aton̈o faralahinany koa izy baka tiô, ke mitovy fo raha nivolan̈iny taminany. Ho zanany io taminany: ‘Ia, zaho handeha papa’,* fa izy baka tiô tsy nandeha aby.
31 Aia amindrô roe io nan̈ano sitrapôn’ny babany?” Ho irô: “Araiky talan̈olo.” Ho Jesosy tamindrô: “Ambarako anarô mazava tsarabe fa, irô mpamory latety ndreky makorely aby io hiditry amy Fanjakan̈an’ny Zan̈ahary alohalohanarô.
32 Tamy Jaony navy taminarô tiô baka, anarô nampianariny lalan̈an’ny fahamarin̈ana fa anarô tsy nino izy. Kanefa irô mpamory latety ndreky makorely aby io ndraiky nino izy. Ary ndray efa hitanarô raha zen̈y, anarô tsy nanen̈iny sady tsy nino izy foeky.
33 “Tandrin̈esa koa fan̈oharan̈a araiky ty: Nisy lelahy araiky nanan̈a tany, ke tany io namboliany rezain. Nasiany lakoro man̈odidin̈y izio. Nangady lavaka koa izy nataony famihazan̈a rezain, baka iô izy nanangana tilikambo. Aviô, tanin’ny rezain io nafôndrony tamy mpambôly, baka iô lôso izy nandeha tan-tany hafa.
34 Izikoa fa nasaka rezain, mpanomponany nirahany nangala anjaranany tamindrô mpambôly aby io.
35 Kanefa mpanomponany aby io nisambôrindrô, ke araiky nibomahandrô, araiky nivonendrô, aviô araiky nitorahandrô vato firaka izy naty.
36 Nimpody nandefa mpanompo hafa maromaron’ny tamy voanalohany koa izy, kanefa mbala nataondrô karaha zen̈y fo koa irô io.
37 Farany, izy nandefa zanany lahy tamindrô mpambôly aby io tan̈y, fôtony ho izy: ‘Irô tsy maintsy han̈aja zanako.’
38 Izikoa fa hitandrô mpambôly aby io zanakanany, irô nifampikoran̈a karaha ty: ‘Navy in̈y mpandova ay! Alô vonentsika izy, aviô alaintsika lovanany!’
39 Ke nisambôrindrô izy, baka iô nantsoritsoritindrô tambelan̈an’ny tanin’ny rezain io, aviô izy nivonendrô.
40 Ke izikoa fa avy tômpin’ny tanin’ny rezain io, hataony akôry irô mpambôly aby io?”
41 Ho irô lohandohan’ny mpisôron̈o ndreky irô anti-pan̈ahy aby io taminany: “Haripany irô, fôtony irô ratsy fan̈ahy. Fa tanin’ny rezain io ndraiky hafôndrony amy mpambôly hafa han̈amia izy anjaranany, izikoa fa avy fotoan̈a famorian̈a vokatra.”
42 Baka iô, ho Jesosy tamindrô: “Soratra Masin̈y mivolan̈a: ‘Vato tsy nasiandrô mpan̈amboatra tran̈o aby io fôtiny edy nanjary vato fehizoro farany maventy. Baka amy Jehovah raha zen̈y salakady maharikian̈a atsika.’ Mbala tsiary nivakianarô raha zen̈y?
43 Zen̈y mahavy zaho mivolan̈a aminarô: Fanjakan̈an’ny Zan̈ahary io hadoso aminarô, ke hamezan̈a firenena mamoa vokatran’ny Fanjakan̈a io.
44 Ho folapolaka lan̈iany olo latsaka amy vato io, baka iô ho tôrotôro lan̈iany olo ilatsahan’izio.”
45 Izikoa fa ren̈indrô lohandohan’ny mpisôron̈o ndreky Fariseo aby io fan̈oharan̈a nataony aby in̈y, direkty haindrô fa irô izy tian’i Jesosy koran̈iny io.
46 Irô tihanambotro izy, fa irô fo navozo vahoaka, fôtony irô olo aby io nihevitry fa Jesosy io mpaminan̈y.
Lamariky amy Pazy Ambany
^ Abt: “ramose.”
