Vaovao Tsara Nisoratin’i Matio 27:1-66
27 Andra koa fa maraindrain̈y, irô lohandohan’ny mpisôron̈o ndreky anti-pan̈ahin’ny vahoaka jiaby niaraka nivory, nandiniky fomba hamonoan̈a Jesosy.
2 Izy koa fa baka nifihezindrô, izy nindesindrô, baka iô izy natolotrondrô tamy Pilato governera.
3 Izikoa fa hitan’i Jodasy, araiky namadiky izy in̈y, fa Jesosy voaheloko, nanen̈iny izy ke nampodiny tamindrô lohandohan’ny mpisôron̈o ndreky anti-pan̈ahy aby tan̈y sekely volafotsy 30 in̈y.
4 Ho izy tamindrô: “Zaho nanota, fôtony zaho namadiky olo tsy manan-tsin̈y.”* Fa ho irô taminany: “Ino ma hidiranay amy zen̈y? Prôblemonao zen̈y fa tsy ninay.”
5 Ke natsipin’i Jodasy tamy tempoly tao vola* aby io, baka iô lôso izy nan̈antom-bozon̈o.
6 Nalaindrô lohandohan’ny mpisôron̈o aby io vola aby io, ke ho irô: “Tsy mety izikoa vola aby ty alatsaka amy toeran̈a masin̈y fikajian̈a vola, fôtony irô io vangan’ny fahin̈anan’olo.”*
7 Irô koa fa baka nifampikoran̈a, nivangandrô tany* vola io, hatao fasan̈a fandiven̈ana vahiny.
8 Ke firaka amy ziôty, Vilon-dio ikahian̈a tany io.
9 Ke tanteraka raha nirahan̈a nambaran’ny mpaminan̈y Jeremia ty: “Irô sekely volafotsy 30 aby in̈y nalaindrô; irô in̈y vola nifan̈arahandrô zanakan’Israely aby io fa hivangan̈a lelahy io.
10 Ke vola aby io nivangandrô vilon’ny mpanefy tanimanga, eraka raha nan̈irahan’i Jehovah zaho.”
11 Jesosy nitsangana nan̈oloan̈a governera tiô, ke governera io nan̈ontany izy karaha ty: “Anao ma Mpanjakan’ny Jiosy?” Ho Jesosy taminany: “Efa izy edy raha volan̈inao zen̈y.”
12 Kanefa irô lohandohan’ny mpisôron̈o ndreky irô anti-pan̈ahy aby io koa fa nitory izy tamy governera io, izy tsy namaly foeky.
13 Ke ho Pilato taminany: “Tsy ren̈inao ma raha marobe volan̈indrô momba anao zen̈y?”
14 Fa izy tsy nivolan̈a foeky, ndray a, ke lany fan̈ahy governera io.
15 Isaka fety, efa fataon’ny governera mankafaka gadra araiky nifidin’ny vahoaka.
16 Tamy fotoan̈a zen̈y, nisy gadra araiky nalaza ratsy. Barabasy an̈aran̈anany.
17 Izikoa fa vory vahoaka, karaha ty ho Pilato: “Azôvy tianarô hivotsaorako: Barabasy sa Jesosy, araiky kahian̈a Kristy?”
18 Hain’i Pilato baka fa irô be fô Jesosy, ke zen̈y nahavy irô nanolotro izy taminany.
19 Tsy zen̈y fo fa, tamy Pilato mbala nipetraka tamy tany fitsaran̈a in̈y, nisy olo nirahan’ny vadiny hivolan̈a karaha ty taminany: “Anao aza midikiditry amy raha momba olo marin̈y io ay! Nijaly mare zaho niany fôtony nan̈inôfy izy zaho alin̈y in̈y.”
20 Fa irô lohandohan’ny mpisôron̈o ndreky irô anti-pan̈ahy aby io nandresy lahatra vahoaka hangataka Barabasy hivotsaoran̈a, fa Jesosy ndraiky hivonen̈a.
21 Nimpody nan̈ontany irô ndraiky governera io: “Azôvy amindrô roe io tianarô hivotsaorako?” Ho irô: “Barabasy.”
22 Ke ho Pilato tamindrô: “Ataoko akôry fo Jesosy, araiky kahian̈a Kristy ty?” Irô jiaby nivolan̈a: “Antaon̈a amy pôtô* an̈y izy!”
23 Fa ho izy: “Raha nan̈ino? Ino ma raha ratsy nataony?” Kanefa irô nahainandroton̈o mare karaha ty fo: “Antaon̈a amy pôtô an̈y izy!”
24 Izikoa fa hitan’i Pilato fa very bôriny fo raha nataony fôtony nahainan̈ajima fo vahoaka, nangala rano izy ke nisasany nan̈oloan̈a vahoaka tiô tan̈ananany, aviô ho izy: “Tsy zaho tômpin’andraikitry amy fandatsahan̈a lion’ny lelahy io, fa anarô.”
25 Ke irô jiaby nivolan̈a karaha ty: “Ambilà zahay ndreky zanakanay tômpin’andraikitry amy fandatsahan̈a lionany!”
26 Ke Barabasy nivotsaoran’i Pilato, fa Jesosy ndraiky nirahiny hivilesin̈y karavasy, baka iô hahanton̈o amy pôtô.*
27 Ke Jesosy nindesin’ny maramilan’ny governera nandeha tan-tran̈on’ny governera tan̈y, baka iô navorindrô nan̈odidin̈y izy tiô maramila jiaby.
28 Nadosondrô lamban’i Jesosy ambelan̈a, baka iô izy nampisikinindrô lamba mena dà.
29 Ke irô nan̈amboatra satroboninahitry vita tamy fatsiky, baka iô izio nataondrô tamy lohan’i Jesosy, aviô nasiandrô bararata tamy tan̈ananany ankavanan̈a. Irô baka tiô nandohaliky nan̈oloan̈a izy, sady nan̈adroadro izy karaha ty: “Mbalatsara,* Mpanjakany Jiosy e!”
30 Nandrorandrô izy, baka iô nalaindrô bararata in̈y namopohandrô lohanany.
31 Farany, irô koa fa baka nan̈adroadro izy, nadosondrô lamba in̈y, baka iô nampisikinindrô izy ndraiky lambanany ambelan̈a. Izy baka tiô nindesindrô hifantsihan̈a tamy pôtô.
32 Irô koa fa hiboaka tanàna, irô nahita lelahy araiky baka Kyrena. Simona an̈aran̈anany. Lelahy io niforsendrô hitondra hazofijalian̈an’i* Jesosy.
33 Irô koa fa navy tamy tany araiky kahian̈a amin’ny an̈aran̈a Golgota, na Babakindoha,
34 Jesosy namezandrô divain niaro raha mafaiky. Fa izy koa fa nan̈andran̈a izio, izy tsy nety nigiaka.
35 Irô koa fa baka namantsiky izy tamy pôtô, nirasaindrô lambanany ambelan̈a ke nan̈anaovandrô antsapaka,
36 baka iô irô nipetraka niambin̈y izy tiô.
37 Napetakandrô tan̈abon’ny lohanany tiô koa soratra momba antony namonoan̈a izy ty: “Ty Jesosy Mpanjakan’ny Jiosy.”
38 Baka iô nisy dahalo* aroe lahy koa nahanton̈ondrô tamy pôtô narikitry izy tiô, ke araiky tankavanan̈anany, baka iô araiky tankavianany.
39 Ke nanihitihy izy olo nandalo tiô sady nan̈obokobon̈o,
40 aviô ho irô: “Anao karaha handeha handrongana tempoly aviô hanangana izio an̈atin’ny telo andra, avaota baka ain̈inao! Izikoa anao Zanakan’ny Zan̈ahary, anao mijotsoa baka amin’ny hazofijalian̈a* iô!”
41 Nan̈adroadro izy karaha zen̈y koa irô lohandohan’ny mpisôron̈o ndreky mpanoratra lalàn̈a, baka iô irô anti-pan̈ahy aby io, ke nivolan̈a:
42 “Olo hafa navaotany kanefa tsy hainy man̈avotro ain̈inany! Izikoa izy Mpanjakan’ny Israely, ambilà izy hijotso baka amin’ny hazofijalian̈a* iô, amy zen̈y atsika hino izy.
43 Izy natoky Zan̈ahary; ke izikoa izy tian’ny Zan̈ahary, ambilà Zan̈ahary han̈avotro izy, fôtony izy nivolan̈a: ‘Zaho Zanakan’ny Zan̈ahary.’ ”
44 Ndray irô dahalo* tamy pôtô narikitry izy tiô koa mba nanihitihy izy karaha zen̈y.
45 Ke nanjary nahiziky gômon̈o nan̈eran̈a faritry io jiaby, kadiriny midỳ* firaka troazera folakandra.*
46 Izikoa fa kadiriny troazera folakandra,* Jesosy nandronton̈o mare karaha ty: “Elỳ, Elỳ, lamà sabaktanỳ?”, dikan’izio: “A Zan̈ahariko ô, a Zan̈ahariko ô, nan̈ino ma zaho nialanao?”
47 Karaha ty hon’olo sasany nitsangana tiô izikoa fa naharen̈y zen̈y: “Lelahy io mikaiky Elia.”
48 Direkty araiky tamindrô nilomoay nandeha nangala eponzy, najobony tan̈atin’ny divain matsiko izio, baka iô nataony tamy bararata araiky, ke izio namezany higiahan’i Jesosy.
49 Fa sasany ndraiky nivolan̈a: “Ambilà izy! Alô zahavantsika izikoa ho avy iô Elia han̈avotro izy.”
50 Nandronton̈o mare ndraiky koa Jesosy, baka iô izy naty.*
51 Ridô tamy toeran̈a masin̈y tao natriaka aroe, rango baka an̈abo firaka ambany; baka iô nisy hôrohôron-tany, ke nitresaka lampimbato.
52 Nibian̈a koa fasan̈a, ke maro fatin’olo masin̈y* nitsangana.
53 Maro olo nahita raha zen̈y. (Tafaran’i Jesosy natsangana tamy maty, niditry tamy tanàna masin̈y tao olo baka tam-pasan̈a.)
54 Izikoa fa hitan’ny manamboninahitry io ndreky olo niaraka taminany niambin̈y Jesosy tiô hôrohôron-tany ndreky raha nandalo in̈y, irô navozo mare ke ho irô: “Zanakan’ny Zan̈ahary ankitin̈y izio.”
55 Nisy man̈angy maro nitazan̈a baka lavitry. Irô io efa nan̈araka Jesosy rango ta Galilia fôtony irô tihikarakara izy.
56 An̈isan’izen̈y Maria Magdalena, Maria maman’i Jakoba ndreky Josesy, baka iô maman’ny zanakan’i Zebedio.
57 Andra koa fa harivariva, nisy lelahy mpan̈arivo baka Arimatia navy, Josefa an̈aran̈anany. Izio koa mba an̈isan’ny mpianatran’i Jesosy.
58 Lelahy io nandeha tamy Pilato tan̈y nangataka fatin’i Jesosy. Ke nirahin’i Pilato namezan̈a izy faty io.
59 Nalain’i Josefa faty io, baka iô nifon̈ôsiny lamba madio sady tsara mare.
60 Faty io napetrany tamy fasan̈anany; fasan̈a io namboarin̈y tamy lampimbato aviô izio mbala vaovao. Nangala vato be izy namodiany varavaran̈an’ny fasan̈a io, baka iô izy nandeha.
61 Fa Maria Magdalena ndreky Maria araiky in̈y ndraiky mbala nidôko tiô. Irô nipetraka nan̈oloan̈a fasan̈a io tiô.
62 Amarain’izin̈y, tafaran’ny Andra Fan̈oman̈ana, irô lohandohan’ny mpisôron̈o ndreky irô Fariseo aby io nivory nan̈oloan̈a Pilato tiô,
63 ke ho irô: “A tômpoko anao, azonay onon̈o fa mpisandoko in̈y nivolan̈a karaha ty tamin’izy mbala velon̈o: ‘Afaka telo andra zaho hivilômin̈y.’
64 Ke iraha ambesan̈a tsarabe fasan̈a zen̈y an̈y firaka amin’ny andra fahatelo, tsao irô mpianatranany aby io ho avy hangalatra fatinany, baka iô irô hivolan̈a amin’olo karaha ty: ‘Izy efa natsangana tamy maty!’ Ke ho ratsiratsin’ny tamy voanalohany vandy araiky zen̈y.”
65 Ho Pilato tamindrô: “Mangalà mpiambin̈y, ke anarô mandihana miaraka amindrô, baka iô ambesa tsarabe erakan’ny vitanarô fasan̈a zen̈y.”
66 Ke irô lôso, aviô namafisindrô tsarabe vato namody varavaran̈an’ny fasan̈a io, baka iô nan̈ambilandrô maramila tiô hiambin̈y izio.
Lamariky amy Pazy Ambany
^ Na: “namadiky lion’olo tsy manan-tsin̈y.”
^ Izio vola vita amy volafotsy.
^ Abt: “vangan’ny lio.”
^ Abt: “vilon’ny mpanefy tanimanga.” Mety tamy vilo io tao irô olo aby io nanefy tanimanga.
^ Na: “Vonia.”
^ Na: “hivonen̈a.”
^ Na: “Akôry ao.”
^ Zahava F.V.
^ Na: “mpangalatra.”
^ Na: “mpangalatra.”
^ Abt: “tamy lera fahatsiota.”
^ Abt: “tamy lera fahasivy.”
^ Abt: “kadiriny tamy lera fahasivy.”
^ Na: “nafaka fahin̈ana.”
^ Abt: “vatan̈an’olo masin̈y efa nandry (amy fahafatesan̈a).”
