Vaovao Tsara Nisoratin’i Matio 5:1-48
-
TORITENY TAN̈ABON’NY BONGO (1-48)
-
Jesosy nanomboko nampianatra tan̈abon’ny bongo (1, 2)
-
Raha sivy mampasambatra (3-12)
-
Sira ndreky hazavan̈a (13-16)
-
Jesosy han̈atanteraka Lalàn̈a (17-20)
-
Torohevitry momba heloko (21-26), fandiadiavan̈a vady (27-30), divorsy ndreky fisarahan̈a (31, 32), fanta ndreky vava natao (33-37), valifaty (38-42), fitiavan̈a fahavalo (43-48)
-
5 Jesosy koa fa nahita olo marobe, izy somary nanonga hely tamy bongo. Izy nangala fipitrahan̈a, baka iô mpianatranany nan̈aton̈o izy.
2 Ke izy nanomboko nampianatra irô. Ho izy:
3 “Sambatra lan̈iany olo mahatsiaro fa mila Zan̈ahary,* fôtony izy hahazo Fanjakan̈an’ny lan̈itry.
4 “Sambatra lan̈iany olo malahelo, fôtony izy hankahirezin̈y.
5 “Sambatra lan̈iany olo manetry ten̈a,* fôtony izy handova tany.
6 “Sambatra lan̈iany olo mosary ndreky sakara fahamarin̈ana, fôtony izy hivokisan̈a.*
7 “Sambatra lan̈iany olo man̈ampy olo sahiran̈a, fôtony lera izy sahiran̈a, hahazo fan̈ampian̈a koa izy.*
8 “Sambatra lan̈iany olo manan̈a fô madio, fôtony izy hahita Zan̈ahary.
9 “Sambatra lan̈iany olo man̈ano raha hisian’ny fihavanan̈a,* fôtony zanakan’ny Zan̈ahary hikahian̈a izy.
10 “Sambatra lan̈iany olo ampijalian̈a baka amy fahamarin̈ana, fôtony izy hahazo Fanjakan̈an’ny lan̈itry.
11 “Sambatra anarô izikoa baka aminaka mahavy anarô hankaratsian’olo ndreky hampijaliandrô, baka iô hamoraon̈andrô vandy ke han̈odiandrô fa nan̈ano raha ratsy isan-karazany.
12 Miravoravoa, ia, miravoravoa mare, fôtony be ankitin̈y hatsaran̈a ho azonarô baka an-dan̈itry.* Sady efa maro mpaminan̈y talohanarô nampijalian’olo karaha zen̈y koa.
13 “Anarô siran’ny tany. Kanefa izikoa sira edy manjary matsatso, akôry eky hampamasin̈y izy ndraiky? Sira koa natsatso efa tsy mety ampiasain̈a eky, fa hatsipy an-tany an̈y amy zen̈y hidiadiavin’olo.
14 “Anarô hazavan̈an’ny donia ty. Tanàna koa an̈abon’ny bongo, tsy mety asitriky.
15 Tsisy olo mandrehitry lalampon̈o ke handrakotro izio amy tôn̈otôn̈o,* fa izio ataony an̈abon’ny latabatra, amy zen̈y izio han̈azava olo jiaby an̈atin’ny tran̈o ao.
16 Karaha zen̈y koa, ataova raha hampazava jironarô, amy zen̈y ho hitan’olo asa tsara ataonarô, ke irô han̈amia voninahitry Babanarô an-dan̈itry an̈y.
17 “Anarô aza mieritreritry fa zaho navy han̈afoan̈a Lalàn̈a na Mpaminan̈y.* Tsy han̈afoan̈a diako atỳ fa han̈atanteraka.
18 Ambarako anarô mazava tsarabe fa, ndray ho ravan̈a lan̈itry ndreky tany, tsisy andra hamparavan̈a litera farany hely amy Lalàn̈a ao, natà tendron’ny soratra araiky, izikoa tsy efa tanteraka raha jiaby voasoratra ao.
19 Ke lan̈iany olo tsy man̈araka araiky amindrô didy farany hely aby io sady mampianatra olo han̈ano karaha zen̈y koa, tsy vain̈y hiditry* amy Fanjakan̈an’ny lan̈itry. Fa lan̈iany olo man̈araka raha koran̈indrô didy aby io, ndreky mampianatra olo han̈ano karaha zen̈y ndraiky, vain̈y hiditry* amy Fanjakan̈an’ny lan̈itry.
20 Zaho man̈ambara anarô fa, izikoa anarô tsy man̈ano ny marin̈y mandilatra irô mpanoratra lalàn̈a ndreky Fariseo aby io, anarô tsy ho tafiditry amy Fanjakan̈an’ny lan̈itry foeky.
21 “Efa ren̈inarô volan̈a nambara irô olobe taloha tan̈y ty: ‘Aza mamono olo, fôtony zay olo mamono olo tsy maintsy hitsarain̈a amy fitsaran̈a.’*
22 Fa zaho ndraiky mivolan̈a aminarô fa lan̈iany olo tsy vôly meloko amy rahalahiny, hitsarain̈a amy fitsaran̈a. Baka iô lan̈iany olo tsy man̈isy fôtiny rahalahiny sady manihitihy izy, hitsarain̈a amy Fitsaran̈a Farany An̈abo. Aviô lan̈iany olo mivolan̈a karaha ty: ‘Olo lefaka, dindery be ty!’, vain̈y halefa amy Gehena* mirehitry.
23 “Izikoa anao mitondra fan̈amezan̈a handeha haterin̈y amin’ny alitara, ke iô anao tontohitry fa rahalahinao meloko aminao,*
24 ambilà alohan’ny alitara iô fan̈amezan̈anao, ke mindao antsendriky mihavan̈a amy rahalahinao. Baka iô mimpodiana anao man̈amia fan̈amezan̈anao.
25 “Mifandamìna malaky amin’olo manan̈a ady aminao amy fitsaran̈a, diany anarô mbala an-dalan̈a handeha an̈y, tsao anao hitoriany amy fitsaran̈a. Mpitsara amizay han̈iraka mpiambin̈y hanambotro anao, ke anao higadrain̈a.
26 Tsara mazava aminao fa tsy hivotsaoran̈a foeky anao, izikoa tsy efa voaefanao vola* jiaby tôkony hifainao.
27 “Efa ren̈inarô volan̈a ty: ‘Aza mandiadia vady.’
28 Fa zaho ndraiky mivolan̈a aminarô fa lan̈iany olo tsy vôly mizaha man̈angy ke man̈iry han̈ano firaisan̈a aminany, efa nandiadia vady edy izy tan̈atin’ny fônany tan̈y.
29 Izikoa baka amy masonao ankavanan̈a mahavy anao hanota, adosoa izio ke aria lavitry anao. Sitrany anao tsisy maso ilany* tozay vatan̈anao jiaby hatsipy amy Gehena.*
30 Aviô izikoa baka amy tan̈ananao ankavanan̈a mahavy anao hanota, tapaha izio ke aria lavitry anao. Sitrany anao tsisy tan̈ana ilany* tozay vatan̈anao jiaby ho lôso amy Gehena.*
31 “Efa ren̈inarô koa volan̈a ty: ‘Izikoa lelahy araiky misaraka amy vadiny, man̈angy io tôkony hamezany taratasin’ny divorsy.’
32 Fa zaho ndraiky man̈ambara anarô fa, lan̈iany lelahy misaraka amy vadiny, izikoa tsy raha baka amy fijangajangan̈a* fo, man̈ano raha hahavy viavy io hisengy. Aviô mandiadia vady lan̈iany olo manambady man̈angy nisarahan’ny vadiny.
33 “Efa ren̈inarô koa raha efa nambara olobenarô taloha tan̈y ty: ‘Aza mifanta kanefa baka iô tsy mitana vava nataonao. Anao koa fa mifanta amy Jehovah, io tsy maintsy ifainao.’
34 Fa zaho ndraiky mivolan̈a aminarô: Aza mifanta foeky, na amy lan̈itry zen̈y, fôtony an̈y Zan̈ahary mipetraka;*
35 na amy tany, fôtony izio fipitrahan’ny vitinany; na amy Jerosalema, fôtony izio tanànan’ny Mpanjaka mahery.
36 Aviô aza mifanta amy lohanao, fôtony anao tsy mahavita man̈aova araiky amy fan̈evanao hanjary fotsy na jôby.
37 Fa volan̈anarô koa fa ‘Ia’, ia; izikoa fa ‘Ehe’, ehe. Fa ny ankoatran’izen̈y efa baka amy Devoly* edy.
38 “Efa ren̈inarô volan̈a ty: ‘Maso solon’ny maso, aviô nify solon’ny nify.’
39 Fa zaho ndraiky mivolan̈a aminarô: Izikoa misy olo man̈ano raha ratsy anao, aza mamaly. Aviô izikoa misy olo mamango tefaka anao amy fifinao ankavanan̈a, atodiha aminany koa fifinao ilany.
40 Izikoa misy olo mitory anao amy fitsaran̈a fôtony izy tihahazo lambanao,* ameza izy koa lambanao ambelan̈a.
41 Izikoa anao forsen’ny manam-pahifan̈a hitondra entan̈a amy lalan̈a mandeha kilometra araiky, mandihana miaraka aminany kilometra aroe.
42 Izikoa misy olo mangataka raha aminao, ameza izy, aviô aza lifasan̈a olo tihindran̈a vola* aminao.
43 “Efa ren̈inarô volan̈a ty: ‘Tiava namanao, fa aza tia fahavalonao.’
44 Fa zaho ndraiky mivolan̈a aminarô: Tiava fo fahavalonarô, baka iô aza vôly mivavaka nin’olo man̈enjiky anarô,
45 amy zen̈y ho hita tsarabe fa anarô zanakan’ny Babanarô an-dan̈itry an̈y. Izy mampipiriaka masoandra* amy ratsy fan̈ahy ndreky tsara fan̈ahy, aviô izy mandatsaka mahalen̈y amin’olo marin̈y ndreky amin’olo tsy marin̈y.
46 Izikoa olo mankatia anarô fo tianarô, ino edy hatsaran̈a ho azonarô? Tsy karaha zen̈y koa ma raha ataondrô mpamory latety aby io?
47 Aviô izikoa rahalahinarô fo ataonarô mbalatsara, ino edy mampiavaka raha ataonarô zen̈y? Tsy karaha zen̈y koa ma raha ataon’olo amy donia ty?
48 Babanarô an-dan̈itry an̈y lavorary, ke tsy maintsy lavorary* karaha izy koa anarô.
Lamariky amy Pazy Ambany
^ Na: “lan̈iany olo mpangataka fan̈ahy.”
^ Na: “mandefitry; malemy toetry.”
^ Na: “fôtony hatao raha hahafa-pô izy.”
^ Abt: “Sambatra lan̈iany olo mamindra fô, fôtony izy hamindran̈a fô.”
^ Na: “olo tia fihavanan̈a; olo mpampihavan̈a.”
^ Na: “hatsaran̈a hamezan’ny Zan̈ahary anarô.”
^ Na: “tôn̈otôn̈o fan̈iran̈ana raha.”
^ Na: “volan̈an’ny Mpaminan̈y.”
^ Abt: “izy farany hely.”
^ Abt: “izy ny be.”
^ Na: “tribinaly.”
^ Na: “manan̈a alahelo aminao.”
^ Na: “firaka amy vola madiniky.” Abt: “kadràna.”
^ Na: “tsisy ratsambatan̈a araiky.”
^ Na: “tsisy ratsambatan̈a araiky.”
^ Abt: “fôtony izio sezy fiandrianan̈an’ny Zan̈ahary.”
^ Abt: “amin’ny araiky ratsy in̈y.”
^ Abt: “lambanao an̈atiny.”
^ Tsy ino zen̈y fa mitraosa tsisy zana-bola.
^ Abt: “masoandranany.”
^ Na: “man̈aboaka fitiavan̈a feno na lavorary.”
