Tantara 113

Paoly Ta Roma

ZAHAVA Paoly voafehy silisily, ndreky maramila romanin̈y miambin̈y izy io. Paoly nigadra ta Roma. Izy iziô miambin̈y ino tapakan’i Kaisara romanin̈y mikasiky raha atao izy. Tamin’izy nigadra, nety nivangin̈y.

Telo andra naviany ta Roma, Paoly nandefa volan̈a tamy mpitaondra jiosy sasany, hizaha izy. Maro Jiosy ta Roma navy, namangy izy. Paoly nikoran̈a tamin-drô mikasiky Jesosy ndreky fanjakan̈an’ny Zan̈ahary. Sasany nan̈eky ke nanjary Kristianin̈y, fa sasany tsy nijery.

Paoly nitory tamy maramila niambin̈y izy tao koa. Tamy Paoly nigadra, izy mbala nitory fo. Nata sasany tamy havan’i Kaisara mba naharen̈y vaovao tsara mikasiky Fanjakan̈a zen̈y, ke nanjary Kristianin̈y.

Azôvy fo lelahy manoratra io? Mba hainao edy? Timoty. Timoty koa nigadrain̈a, fôtony nikoran̈a Fanjakan̈an’ny Zan̈ahary, fa izy efa nafaka. Izy hitanao io navy hitatahy Paoly. Hainao ino raha nisoratan’i Timoty io? Alô zahavatsika.

Azonao onon̈o tanànan’i Filipy ndreky Efesosy, nikoran̈itsika tamy Tantara 110 in̈y? Paoly nitatahy irô tao, han̈ôrin̈y fiangonan̈a kristianin̈y. Ke iziô Paoly nigadra, izy nanoratra taratasy maro handeha amy Kristianin̈y aby io. Efesianina ndreky Filipianina ikahian̈a taratasy aby zen̈y, an̈aty Baiboly. Paoly io mivolan̈a amy Timoty raha soratan̈a, halefa amy naman-drô kristianin̈y ta Filipy.

Filipianin̈y aby io tsara fan̈ahy tamy Paoly. Irô nandefa raha maro, ke Paoly nan̈ano mersỳ irô. Epafrodito nirahin-drô nitaondra raha zen̈y taminany. Kanefa, izy koa fa navy tan̈y narary fatatra, tseky naty. Izy koa fa tsaratsara, nody. Izy nitaondra taratasy aby nisoratan’i Paoly ndreky Timoty in̈y, lera izy nimpody ta Filipy.

Tamy Paoly nigadra koa, nanoratra taratasy aroe hafa. Hitatsika amy Baiboly ao raha zen̈y. Araiky handeha amy Kristianin̈y ta Kolosia. Hainao an̈aran̈a taratasy io? Kolosianina. Nisy taratasy koa nisoratany handeha amy kamaradiny marikitry, nipetraka ta Kolosia. Filemona an̈aran̈a taratasy io amy Baiboly. Taratasy io mikoran̈a Onesimosy, ampiasan’i Filemona.

Onesimosy tamin’io nilefa Filemona, ke izy nandeha ta Roma. Ren̈in’Onesimosy fa Paoly nigadra tan̈y. Izy navy namangy Paoly, ke Paoly nitory taminany. Tsy ela, Onesimosy nanjary Kristianin̈y koa. Onesimosy nanen̈iny nilefa in̈y. Hainao raha nisoratan’i Paoly halefa tamy Filemona?

Paoly nangataka Filemona han̈ambela adisovan̈an’i Onesimosy. Volan̈in’i Paoly: ‘Zaho nan̈irak’izy impody aminao an̈y. Fa izy iziô tsy ampiasanao fo, fa rahalahy kristianin̈y mafatra-pô koa.’ Onesimosy koa fa nody ta Kolosia, nitaondra taratasy aroe in̈y, araiky namian̈a irô ta Kolosia, araiky nin’i Filemona. Misaora ravoravo Filemona naharen̈y fa ampiasanany iziô nanjary Kristianin̈y!

Paoly koa fa nanoratra tamy Kristianin̈y ta Filipy ndreky tamy Filemona, izy nandefa vaovao tsara. Volan̈iny tamin-drô: ‘Timoty nalefako aminarô an̈y. Fa zaho mbala ho avy.’ Baka iô nisoratiny tamy Filemona: ‘Ataova pare tany mety hipitrahako.’

Paoly koa fa nafaka gadra, nizaha Kristianin̈y tamy tany aby io. Tsy elan’izen̈y, Paoly nigadra ndreky ta Roma. Tamy zen̈y, hainy izy hivonen̈a. Ke izy nanoratra tamy Timoty, nampavy izy malakilaky. Volan̈in’i Paoly: ‘Zaho nafatoky tamy Zan̈ahary. Haiko fa Zan̈ahary hamaly ny tsara nataoko.’ Tafara helin’ny nifatesan’i Paoly, Romanin̈y aby io nandravan̈a Jerosalema.

Baiboly mikoran̈a raha maro hafa koa. Zan̈ahary Jehovah nampanoratra apostoly Jaona taratasy farany amy Baiboly. Apokalypsy an̈aran̈a boky zen̈y. Boky io mikoran̈a raha mbala ho avy. Atsika iziô hianatra zen̈y.

Asan’ny Apostoly 28:16-31; Filipianina 1:13; 2:19-30; 4:18-23; Hebreo 13:23; Filemona 1-25; Kolosianina 4:7-9; 2 Timoty 4:7-9.