Tantara 107

Stefana Nitorahan-drô Vato

STEFANA lelahy mandohaliky io. Izio mpianatra Jesosy mafatoky. Zahava lelahy aby io nitora-bato izy! Nan̈ino ma irô nan̈ano zen̈y?

Zan̈ahary nan̈ampy Stefana nan̈ano fahagagan̈a maro. Lelahy aby io tsy ravoravo nahita zen̈y, ke irô nimalo tamy Stefana mikasiky ny marin̈y nampianariny. Zan̈ahary nan̈amia sain̈y Stefana, ke Stefana nivolan̈a fa irô nampianatra raha diso. Irô koa fa naharen̈y zen̈y, nahaineloko fo. Izy nisamborin-drô, aviô irô nan̈iraka olo nivolan̈a vandy mikasiky izy.

Mpisôron̈obe tao amy zay nan̈ontany Stefana: ‘Ikenao raha jiaby zen̈y?’ Stefana nan̈azava raha boaka amy Baiboly. Farany, izy nivolan̈a fa, efa rango ela nisian’olo ratsy jery sady tsy tia mpaminan̈in’i Jehovah. Volan̈iny: ‘Anarô miran̈a olo aby zen̈y fo. Jesosy mpanompon’ny Zan̈ahary nivonenarô, lalàn̈an’ny Zan̈ahary tsy nijirenarô.’

Mpitaondra fivavahan̈a aby io rômotro koa fa naharen̈y zen̈y! Stefana nizaha irô tsarabe, sady nivolan̈a: ‘Zahava! Zaho mahita Jesosy mitsangana ankavanan̈a Zan̈ahary an-dan̈itry.’ Lelahy ratsy fan̈ahy aby io nanampin̈y sofin̈y, baka iô nilomoay mare hanambotro izy sady nitaondra izy tambelan̈a tanàna.

Nadoson-drô lamban-drô ambelan̈a, nampitanan-drô Saoly. Hitanao Saoly io? Sasany tamy lelahy aby in̈y amy zay nitora-bato Stefana. Izy nandohaliky, nivavaka tamy Zan̈ahary: ‘Aza amian̈a tsin̈y irô Jehovah amy raha ratsy ataon-drô ty.’ Hainy fa mpitaondra fivavahan̈a aby io fo nandrisiky sasany tamin-drô han̈ano raha io. Tafaran’izen̈y, Stefana naty.

Izikoa misy olo man̈ano ratsy anao, hamaly anao? Anao hangataka amy Zan̈ahary hamaly izy? Stefana ndreky Jesosy tsy nan̈ano zen̈y. Irô tsara fan̈ahy ndray olo tsy tia irô. Atsika koa mila tsara fan̈ahy.

Asan’ny Apostoly 6:8-15; 7:1-60.