Tantara 108

Tamy Lalan̈a Mengo Damaskosy

HAINAO lelahy mandrimandry io? Izio Saoly. Izy baka araiky niambin̈y lamban’ny lelahy aby nitora-bato Stefana in̈y. Zahava amy zay raha mazavabe io! Nisy nino eky?

Stefana koa fa naty, Saoly nanjary jaolahy tamy fampijalian̈a mpianatra Jesosy aby io. Izy nitety tran̈o nitady irô, ke zay nazony nantsoritiny, baka iô nafodiny tan̈aty prizôn̈o. Naro mpianatra Jesosy nilefa, fa irô mbala nitory “vaovao tsara” fo tamy tany nilifasan-drô tan̈y. Saoly mbala nitady mpianatra Jesosy aby io tan-tany hafa fo koa. Izy iziô amy lalan̈a mengo Damaskosy. Izy mbala tamy lalan̈a fo, nisy raha nahagaga:

Tiô fo, nisy tselatra nazava boaka tan-dan̈itry nikodidin̈y Saoly. Hitanao amy sary io, izy lavo. Nisy fiô amy zay nivolan̈a: ‘Saoly, Saoly! Nan̈ino ma anao mampijaly zaho?’ Olo dia araiky tamy Saoly nahita raha nazavabe io, naharen̈y fiô in̈y, kanefa irô tsy nahay dikan’ny volan̈a in̈y.

Saoly nan̈ontany: ‘Azôvy ma anao, Tômpoko anao?’

Fiô in̈y nivolan̈a: ‘Zaho Jesosy ampijalinao io.’ Jesosy nivolan̈a zen̈y, fôtony Saoly nampijaly mpianatra Jesosy, miran̈a mampijaly Jesosy fo.

Saoly amy zay nan̈ontany: ‘Ino raha tôkony hataoko, Tômpoko anao?’

Jesosy nivolan̈a: ‘Mitsangàna, mandihana Damaskosy. An̈y an̈ambaran̈a anao raha tôkony hataonao.’ Saoly koa fa nitsangana, masonany nibin̈iafiny, izy tsy nahita foeky. Gila! Ke olo aby dia araiky taminany in̈y nitana tan̈anany, nitaondra izy ta Damaskosy.

Jesosy amy zay nivolan̈a tamin’araiky tamy mpianatranany ta Damaskosy: ‘Ananiasy, mitsangàna. Anao mindao amy lalan̈a Imahitsy. Anao koa fa avy amy tran̈on’i Jodasy, an̈ontania aia Saoly zen̈y. Zaho efa nifidy izy hataoko mpanômponakahy.’

Ananiasy nandeha. Koa izy fa tôjy Saoly, lohan’i Saoly nitanany, baka iô izy nivolan̈a: ‘Tômpo nan̈iraka zaho, beky anao mahita, ndreky feno fan̈ahy masin̈y.’ Tiô fo, nisy raha karaha isikisiky laoko boaka tamy mason’i Saoly tao. Raha io koa fa nafaka, izy nivadiky nahita.

Saoly baka tiô nirahin̈y hitory tamy firenena hafa. Apostoly Paoly amy zay nahaizan’olo izy. Atsika mbala hianatra raha maro mikasiky izy. Atsika antsendriky hizaha ino raha nirahin’ny Zan̈ahary hataon’i Petera.

Asan’ny Apostoly 8:1-4; 9:1-20; 22:6-16; 26:8-20.