Tantara 110

Timoty Naman’i Paoly Vaovao

TIMOTY tsaikilelahy miaraka amin’apostoly Paoly io. Timoty nipetraka ta Lystra niaraka tamy mamany ndreky babany ndreky dadiny. Eonika an̈aran̈a mamany, Loisa an̈aran̈a dadiny.

Intelo tamin’io Paoly ta Lystra. Kadiriny taon̈o araiky talohan’izen̈y, Paoly ndreky Barnabasy nan̈ano diabe nitory tan̈y voanalohany. Iziô Paoly nimpody tan̈y, niaraka tamy Silasy kamaradiny.

Hainao raha volan̈in’i Paoly amy Timoty io? Izy nan̈ontany: ‘Anao han̈araka zahay ndreky Silasy? Anao mety mitatahy zahay mitory amy tany farany lavitry.’

Timoty nivolan̈a: ‘Zaho andeha.’ Tsy elan’izin̈y amy zay, Timoty niala ry havany, nan̈araka Paoly ndreky Silasy. Alohan’ny atsika hianatra mikasiky diabe nataon-drô zen̈y, atsika hizaha ino raha nahazo Paoly. Efa 17 taon̈o tamin’io Jesosy niboaka taminany tamy làlan̈a mengo Damaskosy in̈y.

Alaiva onon̈o fa Paoly nandeha ta Damaskosy nampijaly mpianatra Jesosy aby in̈y, fa izy iziô fa mpianatra Jesosy! Tsy elan’izin̈y, nisy olo nan̈ano tetiky hamono Paoly, fôtony irô tsy tia izy mampianatra mikasiky Jesosy. Kanefa mpianatra sasany nampilefa Paoly. Izy nataon-drô tan̈aty tanty maventy be, baka iô nahoatran-drô tambelan̈a tanàna.

Paoly boaka tiô nandeha nitory ta Antiokia. Tan̈y voanalohany nikahian̈a mpianatra Jesosy aby io Kristianin̈y zen̈y. Paoly ndreky Barnabasy amy zay nirahin̈y han̈ano diabe hitory tamy tanàna farany lavitry Antiokia. Lystra, tany nahabe Timoty, an̈isan’ny tanàna nandihanan-drô.

Taon̈o araiky tafaran’izin̈y, Paoly nimpody ta Lystra. Timoty amy zay koa fa nan̈araka Paoly ndreky Silasy, hainao tany nimboan-drô? Zahava sarin-tany io, atsika hianatra maomba tany sasany.

Irô antsendriky nandeha tamy tanàna tsy lavitry Ikonioma, ndreky ta Antiokia hafa koa. Irô baka iô nandeha ta Troasy, ta Filipy, ta Tesalonika ndreky ta Beria. Hitanao amy sarin-tany io Atena zen̈y? Paoly nitory tan̈y. Irô boaka tan̈y, nitory ta Korinto. Taon̈o araiky sy sasany irô tan̈y. Farany amy zay, irô nidôko hely ta Efesosy. Irô baka tiô nimpody, nandeha sambo ziska ta Kaisaria, nandeha ta Antiokia, ke Paoly nipetraka tan̈y.

Tamy dia lavitry jiaby zen̈y, Timoty nitatahy Paoly hitory “vaovao tsara” ndreky nanangana fiangonan̈a kristianin̈y maro. Lera anao be an̈y, mba hanjary mpanompon’ny Zan̈ahary mafatoky karaha Timoty edy?

Asan’ny Apostoly 9:19-30; 11:19-26; toko faha-13 ziska toko faha-17; 18:1-22.

[Sarintany]

(Jereo ny boky)

Roma

Malta

Tesalonika

Beria

Korinto

Filipy

Atena

Kreta

Troasy

Efesosy

Mileto

Kolosia

Antiokia

Ikonioma

Lystra

Antiokia

Kyprosy

Damaskosy

Kaisaria

Jopa

Jerosalema

RANOMASIN̈Y BE (MEDITERANE)