Tantara 102

Velon̈o Jesosy

HAINAO man̈angy ndreky lelahy aroe io? Man̈angy io kamaradin’i Jesosy. Maria Magdalena an̈arany. Lelahy aby man̈ano lamba malandy io anjely. Jesosy koa fa naty, naterin̈y tamy tran̈o hely tsidihin’i Maria io. Fasan̈a an̈aran’izio. Faty in̈y iziô fa tsy tao! Azôvy eky nangala izy tao? Alô zahavatsika.

Jesosy koa fa naty, mpisôron̈o aby io nivolan̈a tamy Pilato: ‘Tamy Jesosy mbala velon̈o nivolan̈a fa izikoa izy maty, izy ho velon̈o afaka telo andra. Ke anao man̈iraha olo hiambin̈y fasan̈anany, beky mpianatranany aby io tsy mangalatra fatinany, ke hivolan̈a fa izy natsangana!’ Pilato amy zay nan̈iraka mpisôron̈o aby io handefa maramila, hiambin̈y fasan̈a io.

Tamy fahatelon’andra nifatesan’i Jesosy, mbala naraindrain̈y be, nisy anjelin’i Jehovah navy. Nadosony vatobe namody fasan̈a in̈y. Maramila aby in̈y navozo loatra, ke tsy tafihetsiky. Irô amy zay koa fa nitsidiky tan̈aty fasan̈a tao, zahan-drô faty in̈y fa tsy tao! Naman-drô sasany nandeha tan-tanàna, nivolan̈a tamy mpisôron̈o aby io. Hainao raha nataon-drô mpisôron̈o ratsy fan̈ahy aby io? Namian-drô vola maramila aby io, beky man̈eky havandy. Mpisôron̈o aby io nivolan̈a tamy maramila aby io: ‘Volàn̈anarô kara’ty: Zahay koa fa tafandry alin̈y in̈y, mpianatranany navy, nangalatra faty in̈y.’

Tamy zen̈y koa, nisy man̈angy maromaro, kamaradin’i Jesosy, namangy fasan̈a. Irô taitry nahita fa foan̈a fasan̈a Jesosy! Tiô fo, nisy anjely aroe nan̈ano lamba nangilangilatra niboaka. Irô nan̈ontany: ‘Nan̈ino ma anarô mitady Jesosy atỳ? Izy kony fa natsangana e. Anarô iziô io mindao mivolan̈a amy mpianatranany.’ Man̈angy aby in̈y nilomoay mare! Irô mbala tan-dalan̈a fo, nisy lelahy araiky nisakana irô. Azôvy zen̈y koa hainao? Jesosy! Izy nivolan̈a: ‘Mindao volàn̈a mpianatranakahy.’

Man̈angy aby in̈y nitantara tamy mpianatra Jesosy aby io fa irô nahita Jesosy. Mpianatra Jesosy aby io tsy nino tsarabe. Petera ndreky Jaona nilomoay nandeha tamy fasan̈a tan̈y nangala famatra, ke irô nahita fa fasan̈a in̈y foan̈a ankitin̈y! Petera ndreky Jaona boaka tiô nandeha, fa Maria Magdalena nidôko. Izy koa fa nizaha tan̈aty tao, nahita anjely aroe.

Hainao nan̈ano karakôry fatin’i Jesosy in̈y? Zan̈ahary nan̈ano raha tsy nahitan̈a izy. Zan̈ahary koa fa namelon̈o Jesosy, tsy vatan̈anany tamin’izy naty in̈y namiany izy. Izy nan̈amia Jesosy vatan̈a vaovao tsy hita maso, karaha nin’anjely an-dan̈itry an̈y. Jesosy fo nangala vatan̈an’olombelon̈o, beky mpianatranany aby io mino fa izy velon̈o ankitin̈y. Atsika mbala hianatra mikasiky zen̈y.

Matio 27:62-66; 28:1-15; Lioka 24:1-12; Jaona 20:1-12.