Anjely Namangy Maria
Tantara 84
Anjely Namangy Maria
MARIA man̈angy tsara be io. Izy Israelita, nipetraka tamy tanànan’i Nazareta. Zan̈ahary nahay fa izy olo ten̈a tsara fan̈ahy. Zen̈y nahavy izy nan̈iraka anjely Gabriela nikoran̈a taminany. Hainao raha nivolan̈in’i Gabriela tamy Maria? Alô zahavatsika.
Gabriela nivolan̈a taminany: ‘Mbala tsara anao. Anao zaraiky ten̈a nankasitrahan̈a. Jehovah tsy hiala anao.’ Maria tsy mahay olo io foeky. Izy niasa loha, fôtony tsy hainy dikan’ny raha nivolan̈in’olo in̈y. Gabriela nan̈ano raha, beky izy tsy mavozo.
Izy nivolan̈a: ‘Anao Maria kaza mavozo. Jehovah ten̈a tia anao. Zen̈y nahavy izy han̈ano fahagagan̈a aminao. Anao hiteraka, Jesosy ataonao an̈arany.’
Gabriela koa nan̈azava kara’ty: ‘Tsaiky io hanjary olo hajain̈y, Zanaka Zan̈ahary Farany An̈abo ikahian̈a izy. Jehovah han̈ano izy ampanjaka, karaha natao Davida in̈y. Jesosy fo hanjaka mandrakizay, ke fanjakan̈anany tsy ho ravan̈a!’
Maria nan̈ontany: ‘Karakôry eky hampamety zen̈y? Ndray zaho tsendriky manambady. Zaho tsiary niaraka amy lelahy, ke zaho hiteraka?’
Gabriela nivolan̈a: ‘Angôvon’ny Zan̈ahary han̈aloko anao. Ke Zanaka Zan̈ahary ikahian̈a tsaiky io.’ Izy baka tiô nivolan̈a tamy Maria: ‘Tsaraova Elizabeta havanao. Olo nivolan̈a fa izy fa matoe loatra, ke fa tsy miteraka eky. Kanefa izy iziô fa tsy ela teraka. Hitanao amy zen̈y fa tsisy raha tsy vitan’ny Zan̈ahary.’
Niaraka tamy zen̈y Maria nivolan̈a: ‘Zaho mpanompon’i Jehovah! Irarian̈a raha jiaby nivolan̈inao zen̈y hoavy aminakahy.’ Anjely in̈y amy zay lôso.
Maria nilomoay tamy Elizabeta tan̈y. Elizabeta koa fa naharen̈y fiôn’i Maria, tsaiky tan̈aty kibonany nihetsiky, fôtony ravoravo. Elizabeta feno fan̈ahy masin̈in’ny Zan̈ahary, nivolan̈a tamy Maria: ‘Tsisy man̈angy nahazo rady mandilatra ninao.’ Tan̈atin’ny telo fanjava Maria nidôko tamy Elizabeta tan̈y. Izy baka tiô nody ta Nazareta.
Maria tamy zen̈y fa tsy ela hanambady Josefa. Josefa koa fa naharen̈y fa Maria mavesatra, izy nieritreritry tsy hangala vady izy. Nisy anjelin’ny Zan̈ahary amy zay nivolan̈a taminany: ‘Kaza mavozo anao hangala vady Maria. Zan̈ahary nan̈amia izy zanaka lelahy.’ Maria ndreky Josefa baka tiô nanjary fivadiany, ke irô niambin̈y andra hitirahan’i Jesosy.
