Tantara 93

Jesosy Nampihinan̈a Olo Marobe

MISY raha nampavozo. Jaona Mpan̈ano Batisa vo boaka nivonen̈a. Herodiasy, vadin’ampanjaka baka tsy tia izy. Ke izy nan̈ano raha, beky ampanjaka mampan̈irak’olo hanapaka lohan’i Jaona.

Jesosy koa fa naharen̈y vaovao ratsy zen̈y, nalahelo oe. Izy nandeha tamy tany mangin̈y. Kanefa irô mbala nan̈araka izy tan̈y fo. Jesosy amy zay koa fa nahita olo marobe in̈y, nahinakinaka. Ke, izy nikoran̈a tamin-drô raha maro mikasiky fanjakan̈an’ny Zan̈ahary, aviô izy nampahivan̈a olo marary.

Andra koa fa tsôfotro, mpianatranany nan̈aton̈o izy. Volan̈in-drô: ‘Andra io fa kômansy alin̈y, tany misy atsika ty mangin̈y. Iraha mody olo aby io, beky irô mahavita mivanga hanin̈y amy tanàna marindriny eto.’

Volan̈in’i Jesosy: ‘Irô tsy mahazo mandeha. Amia hanin̈y irô.’ Volan̈iny baka tiô tamy Filipo: ‘Aia ma mety hivangatsika hanin̈y mahampy olo jiaby io?’

Filipo namaly: ‘Tsy vola helihely kony mahazo hanin̈y mahampy olo jiaby io.’ Volan̈in’i Andrea baka tiô: ‘Tsaiky io nitaondra hanin̈itsika, môfo dimy, baka iô laoko aroe. Fa izio tsy mahampy olo jiaby io.’

Jesosy baka tiô nivolan̈a: ‘Iraha mipetraka olo jiaby.’ Izy amy zay koa fa boaka nan̈ano mersỳ Zan̈ahary tamy hanin̈y io, izy nanapatapaka môfo ndreky laoko in̈y. Mpianatranany amy zay nirasa izin̈y tamin’olo jiaby. Tamy zen̈y, lelahy 5 000 tiô, aviô man̈angy ndreky tsaiky fa mandilatra arivo. Irô jiaby voky. Mpianatra Jesosy koa fa namory lambin’ny hanin̈y, 12 tanty tavela!

Jesosy baka tiô nan̈iraka mpianatranany hitenginy sambo hitsaka Ranomasin̈y Galilia. Andra koa fa tsôfotro, nisy tsiko mare. Sambon-drô nihetsiky be. Mpianatra aby io navozo. Sasak’alin̈y, irô nahita lelahy araiky mandeha vity tan̈abo ranomasin̈y in̈y. Irô nahainavozo fo, fôtony tsy hain-drô ino raha hitan-drô io.

Jesosy amy zay nivolan̈a: ‘Kaza mavozo, fa zaho fo ty!’ Irô mbala tsendriky nino. Fa volan̈in’i Petera: ‘Izikoa anao marin̈y io Tômpo, iraha man̈aton̈o anao zaho.’ Jesosy namaly: ‘Mavia!’ Petera baka iô nandeha vity tan̈abo rano! Izy nahainavozo, ke saiky dobo. Jesosy amy zay namonjy izy.

Tafara tatỳ, Jesosy mbala nan̈amia hanin̈y olo tsy ela arivo koa. Tamy zen̈y, môfo fito ndreky laoko hely fo taminany. Kanefa, raha io nahampy olo jiaby. Tsy mamparavoravo mahay fa Jesosy tia mikarakara olo? Jesosy mbala hitaondra, fôtony izy ampanjaka nifidin’ny Zan̈ahary. Amy leran’izen̈y, tsisy raha eky ampiasa loha atsika!

Matio 14:1-32; 15:29-38; Jaona 6:1-21.