Tantara 9

Noa Nan̈amboatra Sambofiara

NOA nisy vady araiky ndreky zanaka telo lahy. An̈aran-drô: Sema, Hama, Jafeta. Irô telo samy misy vady. Izikoa konten̈a, valo irô jiaby.

Zan̈ahary nan̈iraka Noa han̈ano raha karaha hafahafa. Izy nan̈iraka Noa han̈amboatra sambo maventy be. Havintesany karaha sambo, faormanany miramiran̈a boaty araiky maventy, lava. Sambofiara ikahian̈a izio. Zan̈ahary nivolan̈a ‘ataova telo etazinany, baka iô asia efitry maromaro an̈aty ao.’ Efitry aby io hipitrahan-drô jiaby, baka iô biby ndreky hanin̈y mahampy irô.

Zan̈ahary koa nivolan̈a tamy Noa fa tôkony hatao fatatra tsarabekiny sambo io beky tsy hidiran’ny rano. Volan̈iny: ‘Zaho han̈ano safodrano handravan̈a tany jiaby ty. Zay olo tsy an̈aty sambo ao hofoaty.’

Noa ndreky zanany telo lahy nan̈araka volan̈a Jehovah, ke nan̈amboatra sambo. Olo jiaby tamy zen̈y nan̈adroadro irô. Nahairatsy fo raha nataon-drô. Tsisy olo, nata araiky, nan̈eky raha nambaran’i Noa mikasiky raha hataon’ny Zan̈ahary zen̈y.

Ela sambo io vo vita, fôtony izio maventy be. Tamy farany, vita fo sambo io. Zan̈ahary amy zay nan̈iraka Noa hampiditry biby an̈aty sambofiara ao. Izy nivolan̈a fa biby sasany ampidirin̈y tsiaroeroe, lahy ndreky vavy. Sasany ampidirin̈y tsifitofito. Zan̈ahary amy zay nan̈iraka Noa hampiditry karazan̈a vôron̈o jiaby. Noa nan̈ano zay raha nirahin’ny Zan̈ahary nataony.

Baka iô Noa, ndreky vadiny ndreky ry zanany, niditry tan̈aty sambo tao. Zan̈ahary namody varavaran̈a sambofiara. Tao Noa, ndreky vadiny ndreky ry zanany niambin̈y. Iritrireta hely izikoa anao tan̈aty tao, niambin̈y. Hisy marin̈y ma safodrano nivolan̈in’ny Zan̈ahary zen̈y?

Genesisy 6:9-22; 7:1-9.