Tantara 61

Ampanjaka Davida

SAOLY mbala mitetiky hanambotro Davida fo. Navoriny maramilanany 3 000 lahy, baka iô irô niaraka hitady Davida. Izikoa fa ren̈in’i Davida zen̈y, nan̈iraka olo izy hitsikilo tany hitobian’i Saoly ndreky olonany aby io, andra koa fa alin̈y. Davida nan̈ontany aroe tamin’olonany aby io. Volan̈iny: ‘Azôvy aminarô hiaraka aminakahy, handeha amy tobin’i Saoly an̈y?’

Abisay namaly: ‘Zaho pare.’ Abisay io zanaka anabavin’i Davida, Zeroia an̈arany. Saoly ndreky lelahy niaraka taminany aby io koa fa nandry, Davida ndreky Abisay nijôkojôko niditry tamy toby. Nalain-drô saboa ndreky sajoa fasian̈a rano narikitry lohan’i Saoly tiô. Tsisy olo nahita ndreky naharen̈y raha jiaby zen̈y, fôtony irô jiaby fa nierotro.

Zahava baka Davida ndreky Abisay io. Irô iziô tody an̈abon’ny bongo, tsisy raha navoa irô. Davida nandronton̈o sefon’ny maramilan’Israely: ‘Ah Abnera, nan̈ino ma anao tsy niaro tômpo ampanjakanao, anao nandry fo. Mindao zahava, aia saboanany ndreky sajoanany izikoa hainao?’

Saoly taitry in̈y, nifoha. Hainy fiôn’i Davida, ke izy nan̈ontany: ‘Davida ma zen̈y?’ Hitanao Saoly ndreky Abnera ambany io?

Davida namaly: ‘Ia, zaho ty tômpoko anao.’ Davida baka tiô nan̈ontany izy: ‘Nan̈ino ma zaho hian̈inao fo? Ino ma ratsy nataoko anao? Indray saboanao, ampanjaka. Ampavia atỳ olonao araiky hangala izy.’

Saoly amy zay nifôno: ‘Diso zaho. Ten̈a tsy nety raha nataoko in̈y.’ Irô baka iô nisaraka tsisy mariadriatra. Davida nanohy dianany, Saoly nody an-tany misy izy. Kanefa volan̈in’i Davida tan̈aty jerinany: ‘Andra araiky an̈y, zaho io mbala hivonen’i Saoly fo. Zaho hilefa amy tanànan’ny Filistiny foeky.’ Zen̈y amy zay raha nataony. Nifitahin’i Davida Filistiny aby io, beky irô mieritreritry fa Davida naman-drô.

Tsy ela tafaran’izen̈y, Filistiny aby io niady tamin’Israely. Tamy zen̈y, Saoly ndreky Jonatana naty. Davida nalahelo oe, ke izy namôron̈o hira. Volan̈iny amy hira io: ‘Malahelo anao zaho zen̈y Jonatana. Fitiavanao zaho zay!’

Tafaran’izen̈y, Davida nimpody ta Hebrona, an’Israely. Tamy zen̈y, olo aby nifidy Isboseta, zanaka Saoly, atao ampanjaka ndreky olo aby nifidy Davida niady. Farany, olon’i Davida nandresy. Telopolo taon̈o Davida tamin’izy natao ampanjaka. Izy nanjaka ta Hebrona, tan̈atin’ny fito taon̈o. Davida nanan-janaka lelahy. Amnona, Absaloma aviô Adonia an̈aran-drô io.

Navy amy zay lera hangalan’i Davida ndreky olonany tanànan’i Jerosalema, tanàna tsara. Tamy zen̈y, Joaba, zanaka anabavin’i Davida, nitariky tamy ady. Koa fa vita ady, Davida nahatsiaro Joaba, ke Joaba nataony sefon’ny maramilanany. Davida iziô hanjaka a Jerosalema amy zay.

1 Samoela 26:1-25; 27:1-7; 31:1-6; 2 Samoela 1:26; 3:1-21; 5:1-10; 1 Tantara 11:1-9.