Tantara 74

Jeremia, Lelahy Tsy Navozovozo

ZAHAVA tsaikilelahy io kotran̈in’olo aby io. Azôvy izy koa hainao? Jeremia. Izy mpaminan̈in’ny Zan̈ahary niavaka.

Ampanjaka Josia koa fa nanampôno nandravan̈a sampy, tsy elan’izin̈y, Jehovah nivolan̈a tamy Jeremia fa izy hataony mpaminan̈inany. Jeremia nieritreritry fa izy mbala hely loatra, koa atao mpaminan̈y. Jehovah nan̈amia toky fa han̈ampy izy.

Jeremia nivolan̈a tamin’Israelita aby io fa irô tôkony vôly eky man̈ano raha ratsy. Nambarany: ‘Tsy izy zan̈ahary aby ivavahan’ny olo aby io.’ Mbala naro fo Israelita tsy nanompo Jehovah, Zan̈ahary marin̈y, fa nanompo sampy. Jeremia koa fa nivolan̈a tamin-drô fa hisazin’ny Zan̈ahary irô izikoa tsy miova, irô nitokiky izy.

Taon̈o maro zay lôso. Josia naty, ke telo fanjava tafaran’izen̈y, Joiakima zanany nanjary ampanjaka. Jeremia mbala nivolan̈a olo aby io fo. Nambarany: ‘Anarô koa tsy miova amy raha ratsy ataonarô io, Jehovah handravan̈a Jerosalema.’ Mpisôron̈o aby io nanambotro Jeremia, baka iô nivolan̈a taminany mare be: ‘Anao mila vonen̈a fa tsy mety raha nambaranao tiô in̈y.’ Irô amy zay nivolan̈a tamy mpitaondra aby tamin’Israely: ‘Jeremia mila vonen̈a, fôtony izy nan̈ozon̈o tanànatsika.’

Han̈ano karakôry eky Jeremia? Izy tsy navozo! Nivolan̈iny tamin-drô jiaby: ‘Jehovah nan̈iraka zaho hivolan̈a raha jiaby zen̈y aminarô. Anarô koa tsy miova amy raha ratsy ataonarô io, Jehovah handravan̈a Jerosalema. Matokisa anarô amy raha volan̈iko ty: Anarô koa mamono zaho, anarô mamono olo tsisy tsin̈y.’

Mpitaondra aby io tsy namono Jeremia, fa Israelita aby io fo tsy niova tamy ratsy nataon-drô. Tsy ela amy zay, ampanjakan’i Babylona, Nebokadnezara an̈arany, navy hiady tamy Jerosalema. Tamy farany, Israelita aby io nanjary andevon’i Nebokadnezara. Arivoarivo irô nindesiny ta Babylona. Misaora ratsy izikoa an-ten̈a alain’olo tsy hain-ten̈a, indesiny faorise amy tany hafa!

Jeremia 1:1-8; 10:1-5; 26:1-16; 2 Mpanjaka 24:1-17.