Tantara 66

Jezebela, Ampanjakavavy Ratsy Fan̈ahy

AMPANJAKA Jeroboama koa fa naty, ratsy fan̈ahy areriky ampanjaka nitaondra foko folon’Israely. Ampanjaka Ahaba ten̈a ratsy fan̈ahy tamin-drô jiaby io. Hainao ino namparatsy fan̈ahy izy? Boaka tamy vadiny. Jezebela an̈arany. Izio ampanjakavavy ratsy fan̈ahy.

Jezebela io tsy Israelita. Izio zanak’ampanjakan’i Sidona. Izy nivavaka tamy Bala zan̈ahary tsy izy, sady nitariky Ahaba ndreky Israelita maro koa hivavaka tamy Bala. Jezebela tsy tia Jehovah, ke maro mpaminan̈in’i Jehovah nivoneny. Sasany nisitriky tan̈aty lava-bato foeky, beky tsy hofoaty. Jezebela koa fa misy raha tadiaviny, sakiny mamono olo beky azony raha io.

Andra araiky, Ampanjaka Ahaba nalahelo mare. Jezebela amy zay nan̈ontany izy: ‘Nino raha mampalahelo anao ma?’

Ahaba nivolan̈a: ‘Izio volan̈a Nabota taminakahy fo. Zaho mila hivanga tanin’ny rezainany. Izy nivolan̈a fa tsy alafony aminakahy raha io.’

Jezebela nivolan̈a: ‘Anao kaza miasa loha fa ataoko zay azahoanao raha io.’

Jezebela baka iô nanoratra taratasy andeha amy sefo aby amy tanàna misy Nabota io. Volan̈iny tamin-drô: ‘Mangalà olo sasany ratsy fan̈ahy tsarabe, hivolan̈a fa Nabota nan̈ozon̈o Zan̈ahary ndreky ampanjaka. Indesa ambelan̈a tanàna izy, baka iô toraha vato zisk’izy maty.’

Niaraka Jezebela naharen̈y fa Nabota naty, izy nivolan̈a tamy Ahaba: ‘Anao iziô io mandihana, alaiva ninao taninazy zen̈y.’ Ten̈a tôkony sazin̈a Jezebela amy haratsiam-pan̈ahinany zen̈y, sa karakôry?

Jehovah amy zay nan̈iraka lelahy araiky han̈asazy izy. Jeho an̈arany. Jezebela koa fa naharen̈y fa Jeho ho avy, masonany nataony goena, izy nisanjy be. Jeho koa fa navy, nahita izy tamy lafenaitara tarỳ, izy nandronton̈o lelahy aby tamy tran̈on’ampanjaka tao: ‘Alatsahanarô atỳ izy!’ Zen̈y raha ataon’ny lelahy aby amy sary io. Koa izy fa latsaka tambany tarỳ, naty. Zen̈y niafaran’i Jezebela, ampanjakavavy ratsy fan̈ahy io.

1 Mpanjaka 16:29-33; 18:1-4; 21:1-16; 2 Mpanjaka 9:30-37.