Tantara 70

Jona Natelin̈y Laoko

ZAHAVA lelahy an̈aty ranomasin̈y io. Sahiran̈a mare izy io, tsy zen̈y? Laoko maventy be io andeha hanelin̈y izy! Hainao an̈aran̈a lelahy io? Jona. Alô zahavatsika antony nampasahiran̈a izy.

Jona io mpaminan̈in’i Jehovah. Tsy ela, tafaran’ny nahafatesan’ny mpaminan̈y Elisa, Jehovah nan̈iraka Jona. Volan̈iny: ‘Indao anao mandeha Ninive. Maro loatra raha ratsy ataon’olo an̈y, ke anao hirahiko hivolan̈a irô.’

Jona nalain̈y andeha tan̈y. Izy amy zay nitenginy sambo andeha an-tany hafa, fa tsy ta Ninive. Jehovah tsy faly tamy raha nataon’i Jona io. Izy baka tiô nandefa tsiko mare. Sambo in̈y tamy zen̈y fa kalokalo ho dobo. Olo aby tamy sambo tao navozo mare, ke irô niafatrafatra, nangataka vonjy tamy zan̈aharin-drô.

Farany, Jona nivolan̈a tamin-drô: ‘Zaho mivavaka amy Jehovah, Zan̈ahary niasa lan̈itry ndreky tany. Jehovah koa fa nan̈iraka zaho, zaho nilefa atỳ.’ Olo aby tan̈aty sambo tao nan̈ontany izy: ‘Ino basy raha ataonay anao, beky tsiko ty mijanon̈o?’

Jona nivolan̈a: ‘Atsipianarô an̈aty ranomasin̈y ao zaho, fa mandry edy rano io.’ Olo aby tamy sambo io tao tsy nety antsendriky. Tsiko koa fa nahainare fo, natsipin-drô tan̈aty rano Jona. Niaraka tamy zen̈y, tsiko in̈y nijanon̈o, ranomasin̈y nandry.

Jona koa fa nideky tan̈aty rano tao, nisy laoko maventy be nanelin̈y izy, fa izy tao tsy naty. Izy telo andra, telo alin̈y tan̈aty kibon’ny laoko. Jona nanen̈iny mare tsy nan̈araka volan̈a Jehovah, andeha ta Ninive. Hainao amy zay raha nataony?

Jona nangataka vonjy tamy Jehovah. Nirahin’i Jehovah naloan’ny laoko in̈y tan-tety Jona. Izikoa izy fa tafiboaka, lôso ta Ninive. Misy fianaran̈a azotsika boaka amy zen̈y. Atsika tôkony man̈araka zay raha volan̈in’i Jehovah, tsy zen̈y?

Bokin’i Jona an̈aty Baiboly.