Tantara 67

Josafata Natoky Jehovah

HAINAO azôvy lelahy aby io? Ino raha ataon-drô? Irô io handeha hiady, aviô lelahy aby aloha io mihirahira. Anao iziô mety hivolan̈a: ‘Nan̈ino ma olo aby io mihirahira fo fa tsy mitaondra saboa na raha hafa findesin̈y miady?’ Alô zahavatsika.

Josafata ampanjaka tamy foko aroen’Israely. Izy velon̈o tamy faha Ahaba ndreky Jezebela ampanjakan’ny foko folon’Israely. Fa Josafata ampanjaka tsara fan̈ahy miran̈a babany. Asa an̈arany. Tan̈atin’ny taon̈o taon̈o, nilamin̈y fiain̈an’olo tamy foko aroe atsimo.

Fa iziô, misy raha nampavozo irô. Nisy olo nampindesin̈y hafatra handeha amy Josafata. Nambarany: ‘Misy maramila maro boaka amy tany Moaba, Amona ndreky Bongo Seira avy ao hanafiky anarô.’ Tamy zen̈y, maro Israelita nandeha ta Jerosalema, hitady vonjy tamy Jehovah. Irô nandeha tamy tempoly tao, baka iô Josafata nivavaka: ‘Ah Jehovah Zan̈aharinay, fa tsy hainay eky raha hataonay. Izikoa zahay fo tsy masaky maramila maro be aby zen̈y. Ke zahay mangataka vonjy aminao.’

Jehovah nitandren̈y vavaka in̈y. Izy nan̈iraka mpaminan̈y araiky hivolan̈a tamin’olo: ‘Tsy ninarô ady io fa nin’ny Zan̈ahary. Ndray anarô tsy mila miady aby. Ambesa, zahava karakôry hataon’i Jehovah hamonjy anarô.’

Kiaka marandrain̈y, Josafata nivolan̈a kara’ty tamin’olo: ‘Matokisa Jehovah!’ Izy amy zay nangala mpihira sasany nataony talohan’ny maramilanany aby io, mandeha sady mihira han̈amezan̈a voninahitry Jehovah. Irô koa fa narikitry tany fiadivan̈a, hainao ino raha niboaka? Jehovah nan̈ano raha, beky fahavalo aby io fo nifamono. Israelita aby io koa fa navy, fahavalo jiaby fa naty!

Nahay Josafata natoky Jehovah, sa karakôry? Atsika koa tsy hanen̈iny, izikoa man̈ano karaha zen̈y.

1 Mpanjaka 22:41-54; 2 Tantara 20:1-30.