Tantara 76

Ravan̈a Jerosalema

FOLO taon̈o mandilatra zay nitondrasan’i Nebokadnezara Israelita farany mahay taratasy jiaby ta Babylona. Zahava amy zay baka! Jerosalema nay. Zay Israelita tsy naty tao amy zay, nindesin̈y natao gadra ta Babylona.

Io baka raha fa nivolan̈in’ny mpaminan̈in’i Jehovah aby in̈y, olo aby io koa tsy miova. Israelita aby io tsy nijery volan̈a mpaminan̈y aby zen̈y. Irô mbala nanompo sampy fo fa tsy nanompo Jehovah. Ke irô man̈eva sazin̈y tsarabe. Atsika mivolan̈a zen̈y, fôtony Ezekiela mpaminan̈in’i Jehovah man̈ambara amitsika raha ratsy jiaby nataon’Israelita aby io.

Hainao Ezekiela? Izy mbala an̈isan’ny tsaikilelahy aby nindesin’i Nebokadnezara ta Babylona, folo taon̈o talohan’i Jerosalema ravan̈a io. Nindesin̈y ta Babylona koa Daniela ndreky kamaradiny telo. Sadraka, Mesaka ndreky Abednego an̈aran-drô.

Tamin’Ezekiela mbala ta Babylona tan̈y, Jehovah nan̈aboaka izy raha ratsy jiaby nataon’olo tamy tempoly ta Jerosalema. Fahagagan̈a nan̈aboahan’i Jehovah zen̈y. Ezekiela ta Babylona, fa izy nataon’i Jehovah nahita raha jiaby tamy tempoly tao. Nampahinihiny raha hitan’Ezekiela!

Jehovah nivolan̈a tamin’Ezekiela: ‘Zahava raha mampangaroaro ataon’olo amy tempoly io. Zahava riba feno sarin’ny bibilava ndreky biby hafa aby io. Zahava amy zay Israelita aby mankôhoko amin-drô io!’ Hitan’Ezekiela raha jiaby zen̈y, ke nisoratany.

Jehovah amy zay nan̈ontany Ezekiela: ‘Hitanao raha ataon-drô sojaben’Israelita misitriky irỳ?’ Hitan’Ezekiela koa zen̈y. Misy 70 lahy irô, samy mankôhoko amy zan̈ahary tsy izy. Volan̈in-drô: ‘Jehovah tsy mahita atsika. Izy fa tsy mijery tanitsika ty.’

Jehovah amy zay nampizaha Ezekiela man̈angy maromaro amy varavaran̈a avaratra tempoly. Irô mipetraka manompo Tamoza, zan̈ahary tsy izy. Zahava koa lelahy aby amy fidiran̈a amy tempolin’i Jehovah io! Kadiriny 25 iô irô jiaby. Hitan’Ezekiela koa irô. Irô mitodiky manin̈ana, mankôhoko, mivavaka amy masoandra!

Jehovah nivolan̈a: ‘Olo aby io tsy man̈aja zaho foeky. Tsy vitan’irô man̈ano ratsy fo, fa sakin-drô koa mandeha amy tempolinakahy man̈ano raha jiaby zen̈y!’ Ke Jehovah nan̈ambara: ‘Ampahitako irô tsarabe helokonakahy. Zaho tsy hahinakinaka foeky, izikoa misy raha mahazo irô.’

Kadiriny telo taon̈o fo, tafaran’i Jehovah nampizaha Ezekiela raha jiaby in̈y, Israelita aby io tsy fan̈araka tamy Nebokadnezara, ampanjakan’i Babylona. Ke Nebokadnezara navy hiady amin-drô. Taon̈o araiky sy sasany tafaran’izen̈y, Babylonianin̈y aby io navy, namaky lakoro vato fatatran’i Jerosalema, baka iô nan̈ôro tanàna io. Ankamaraozan’olo tao naty, na nindesin̈y natao gadra ta Babylona.

Nan̈ino eky Jehovah nan̈ambela Israelita aby io navoa raha ratsy karaha zen̈y? Fôtony irô tsy nitandren̈y Jehovah, ndreky tsy nan̈araka lalàn̈any. Zen̈y mivolan̈a fa atsika mila man̈araka volan̈a Zan̈ahary fo.

Tamy voanalohany, nisy olo sasany nahazo lalan̈a nipetraka tamy tanin’Israely. Ampanjaka Nebokadnezara nan̈iraka Jiosy araiky, Gedalia an̈arany, han̈ara-maso olo aby io. Kanefa Israelita sasany namono Gedalia. Olo jiaby amy zay navozo tsao Babylonianin̈y aby io ho avy hamono irô koa. Ke nifaorisen-drô Jeremia hiaraka tamin-drô, baka iô irô nilefa ta Ejipta.

Koa fa niala tao olo aby io, tsisy olo eky tamy tanin’Israely. Tan̈atin’ny 70 taon̈o, tsisy olo foeky tamy tany io. Foan̈a tany io tamy zen̈y. Jehovah nampan̈anten̈a fa olonany aby io hampodiany afaka 70 taon̈o. Nan̈ano karakôry fo basy olon’ny Zan̈ahary aby io koa fa navy ta Babylona tan̈y? Alô zahavatsika.

2 Mpanjaka 25:1-26; Jeremia 29:10; Ezekiela 1:1-3; 8:1-18.