Tantara 75

Tsaiky Lelahy Efatra Ta Babylona

AMPANJAKA Nebokadnezara namory Israelita mahay raha jiaby nindesiny ta Babylona. Irô koa fa navy tan̈y, izy nifidy zay farany zatôvo ndreky farany mahay. Efatra tamin-drô io hitanao amy sary io. Daniela mivolan̈a io, fa irô telo io nipitahan̈a an̈aran̈a hafa. An̈aran̈a babylonianin̈y zen̈y. Araiky Sadraka, araiky Mesaka, araiky Abednego.

Nebokadnezara nieritreritry hampianatra raha maro tsaikilelahy aby io, beky irô mahavita miasa amy tran̈on’ampanjaka. Afaka telo taon̈o, izy hifidy zay farany mahay amin-drô, han̈ampy izy lera misy ra-manahiran̈a. Tian’ampanjaka manjary matanjaka ndreky salama tsaikilelahy nampianarin̈y aby io. Ke izy nan̈amia beko ampiasanany, han̈amia irô hanin̈y maro tsara, ndreky divay miran̈a ninany.

Zahava amy zay Daniela. Hainao raha volan̈iny amin’Aspenaza, sefon’ampiasan’i Nebokadnezara io? Daniela nivolan̈a taminany fa izy tsy mila hanin̈y boaka amy latabatran’ampanjaka. Aspenaza navozo. Volan̈iny: ‘Ampanjaka kony nivolan̈a raha hahaninarô ndreky higiahanarô. Anarô koa tsy hitany salama karaha tsaikilelahy sasany, zaho hivoneny.’

Ke Daniela nandeha tamy mpiambin̈y araiky nirahin’Aspenaza hikarakara izy ndreky namany telo lahy. ‘Zahay mba mangataka folo andra fo sefo ô. Raha mahitso ndreky rano fo amia zahay. Koa fa tapitry folo andra, ampitovisa amin-drô mihina hanin̈’ampanjaka io zahay. Ho hitanao zay zatôvo aminay.’

Mpiambin̈y irô in̈y amy zay nan̈eky. Koa fa tapitry folo andra, Daniela ndreky kamaradiny telo aby in̈y salama toizay tsaikilelahy hafa. Mpiambin̈y in̈y koa fa nahita zen̈y, irô nambelany nihinan̈a raha mahitso fa tsy hanin̈’ampanjaka.

Tapitry telo taon̈o, tsaikilelahy jiaby nindesin̈y tamy Nebokadnezara. Hitany amy zay fa Daniela ndreky namany telo fo ten̈a mahay raha. Ke irô nitànany hiasa tamy tran̈onany tao. Ampanjaka koa fa man̈ontany raha sarotro Daniela, Sadraka, Mesaka ndreky Abednego, raha hain-drô impolon’ny raha hain’ny mpisôron̈o ndreky lelahy fangalany sain̈y.

Daniela 1:1-21.