Tantara 71

Zan̈ahary Mampan̈anten̈a Paradisa

MIRAN̈A amy raha hitanao amy sary io paradisa nivolan̈in’ny Zan̈ahary tamin’Isaia mpaminan̈y. Isaia velon̈o tafara helin’i Jona.

Dikan’ny paradisa zen̈y “zaridain̈y.” Mampahatsiaro anao raha nianaratsika taloha tan̈y raha zen̈y? Izio miran̈a zaridain̈y tsara be nataon’ny Zan̈ahary Jehovah nin’Adama ndreky Eva in̈y, tsy zen̈y? Ke tany jiaby ty iziô mbala ho paradisa?

Jehovah nan̈iraka Isaia mpaminan̈inany hanoratra mikasiky paradisa vaovao hamian̈a olon’ny Zan̈ahary. Volan̈iny: ‘Amboa dỳ ndreky zanaka ôndrikôndriky hiaraka hipetraka. Zanak’aomby ndreky zanaka lion hiaraka hihinan̈a, baka iô tsaiky madiniky hikarakara irô. Ndray bibilava masiaka tsy han̈ekitry tsaiky misaoma marikitry izy.’

Maro olo mety hivolan̈a kara’ty: ‘Aia koa ma raha zen̈y ho hisy. Letrizay fa jaly fo, tsisy andra mahafaka jaly io.’ Kanefa, iritrireta baka ty: Tany karakôry namian’ny Zan̈ahary Adama ndreky Eva in̈y?

Adama ndreky Eva napetraka Zan̈ahary tamy paradisa. Tsy fan̈arahan̈a volan̈a Zan̈ahary fo nampiala irô tao, nahavy irô natoe, baka iô naty. Zan̈ahary mampan̈anten̈a fa zay olo tia izy hamiany raha jiaby nanan̈an’Adama ndreky Eva in̈y.

Amy paradisa hoavy io, tsisy raha handratra ndreky handrobaka. Fiadan̈ana ankitin̈y amy zen̈y. Amy leran’izen̈y, olo jiaby salama vatan̈a ndreky ravoravo. Karaha raha tian’ny Zan̈ahary hatao tamy voanalohany in̈y fo zen̈y. Mbala hianaratsika karakôry hataon’ny Zan̈ahary, beky raha jiaby zen̈y hisy.

Isaia 11:6-9; Apokalypsy 21:3, 4.