Tantara 36

Aomby Hely Volamena

ÀLAHABINY! Ino koa ma raha ataon’olo aby io? Irô kony mivavaka amy aomby hely volamena io! Nan̈ino koa ma irô nan̈ano zen̈y?

Mosesy koa fa nijanon̈o tan̈abon’ny bongo tan̈y, irô nivolan̈a: ‘Tsy haitsika raha nahazo Mosesy. Fa alô atsika han̈ano zan̈ahary araiky hitariky atsika amy tany zen̈y.’

‘An̈oain̈y’, hoy Arona rahalahin’i Mosesy. ‘Adosoa kavin̈inarô volamena jiaby, baka iô indesa aminakahy atỳ.’ Izikoa irô fa nan̈ano zen̈y, niravan̈in’Arona raha aby io, baka iô nan̈amboarany aomby hely volamena. Olo aby io amy zay nivolan̈a kara’ty: ‘Ty edy Zan̈aharitsika nitaondra atsika niala ta Ejipta!’ Nan̈ano fety be irô, baka iô nivavaka tamin’aomby hely volamena in̈y.

Jehovah koa fa nahita izin̈y, neloko farany mare. Volan̈iny tamy Mosesy: ‘Mindao malaky anao mijotso fa efa tsy izy loatra raha ataon’olo aby io. Adin̈an-drô lalàn̈a namiako irô jiaby in̈y, irô mankôhoko amy aomby hely volamena.’

Mosesy nijotso nalaky boaka tamy bongo tan̈y. Izy koa fa narikitry, ty raha hitany. Olo nihira ndreky nitsinjaka, nikodidin̈y aomby hely volamena in̈y! Nohon’i Mosesy neloko loatra, tafantrekiny vato fisaka aroe misy lalàn̈a in̈y, ke potipotiky. Nalainy amy zay aomby hely volamena in̈y, nitorotoroeny zisk’izy nanjary laposiera.

Nan̈ano raha ratsy olo aby io. Ke nirahin’i Mosesy lelahy sasany hangala mesobe. Volan̈iny: ‘Olo jiaby nankôhoko tamin’aomby hely volamena io, tsy maintsy vonen̈a.’ Nisy 3 000 lahy naty! Zen̈y mivolan̈a amitsika fa Jehovah zaraiky fo tôkony hivavahan̈a, tsy zen̈y?

Eksodosy 32:1-35.