Bibilava Varahin̈y
Tantara 41
Bibilava Varahin̈y
BIBILAVA ankitikitin̈y ma miolon̈o amy kakazo io? Izio tsy bibilava. Izio namboarin̈y tamy varahin̈y. Jehovah nan̈iraka Mosesy han̈ano izio amy kakazo iô, beky olo jiaby mahita izio, ke tsy hofoaty. Irô aby amy tany io fo bibilava. Nikikerin-drô olo aby io, ke nanjary narary. Hainao ino nahavy zen̈y?
Izio boaka tamy raha nataon’Israelita aby io tamy Zan̈ahary ndreky Mosesy. Irô nimonomonon̈o kara’ty: ‘Andeha hivonen̈a amy tany paiky atỳ ma nitondrasanao zahay baka ta Ejipta tan̈y? Tany tsisy hanin̈y, tsisy rano. Zahay zalahy fa empaka mana ty!’
Kanefa mana io hanin̈y farany tsara. Jehovah nan̈ano fahagagan̈a nan̈amaizan̈a izio irô. Fahagagan̈a koa nan̈amaizan’i Jehovah rano irô. Kanefa irô tsy nankasitraka raha nataon’ny Zan̈ahary tamin-drô. Ke Jehovah nan̈asazy Israelita aby io, izy nandefa bibilava maro be io. Bibilava aby io nan̈ekitry, ke naro Israelita naty.
Farany amy zay, olo navy tamy Mosesy nivolan̈a: ‘Mifôno zahay fa diso, fôtony zahay nankaratsy Jehovah ndreky anao. Mba ivavaha kony Jehovah han̈adoso bibilava aby io ô.’
Ke Mosesy nivavaka nin-drô. Jehovah amy zay nan̈iraka Mosesy hiasa bibilava varahin̈y io. Izio nirahiny natao amy kakazo araiky mitsatoko, ke zay olo voakekitry bibilava, mila mizaha izio. Nataon’i Mosesy raha jiaby nivolan̈in’ny Zan̈ahary. Janga zay olo voakekitry bibilava, nizaha araiky varahin̈y in̈y.
Misy fianaran̈a azotsika boaka amy zen̈y. Atsika jiaby iziô karaha Israelita voakekitry bibilava aby in̈y. Atsika jiaby mety maty. Zahava fo olo mahaimatoe, marary, maty. Izio boaka tamin’Adama ndreky Eva, lelahy ndreky man̈angy voanalohany. Irô tsy nan̈araka volan̈a Jehovah, ke atsika jiaby taranakan-drô. Fa Jehovah nan̈ano raha, beky atsika velon̈o tsisy farany.
Jehovah nan̈iraka Jesosy Kristy zanany, navy tambony tany teto. Maro olo tsy tia raha nataon’i Jesosy. Irô nieritreritry fa izy ratsy fan̈ahy, ke izy nivonen-drô, nahanton̈o tamy kakazo araiky mitsatoko. Jehovah nan̈amia Jesosy hamonjy atsika. Izikoa atsika mizaha izy, dikan’izen̈y man̈araka raha nataony, mety hahazo fiain̈ana tsisy farany. Fa atsika mbala hianatra raha maro mikasiky zen̈y afara an̈y.
Nomery 21:4-9; Jaona 3:14, 15.
