Tantara 52

Gideona Ndreky Olonany 300 Lahy

MAN̈INO ma olo aby io? Irô io maramila israelita. Lelahy aby miôndriky io migiaka rano. Gideona mpitsara mitsangana marikitry irô io. Izy mizaha akôry ataon-drô migiaka.

Zahava tsara fa tsy miran̈a figiahan-drô io. Sasany, sora fa kalokalo hitosy rano. Kanefa araiky io oe nangala rano tamy tan̈anany fa tsy niôndriky, beky izy mahita raha jiaby. Ninany ten̈a mety, fôtony Jehovah nan̈iraka Gideona hifidy lelahy tsy mora rikian̈a, nata fa migiaka. Sisan’izay, nirahin’ny Zan̈ahary nalefa nody. Alô zahavatsika antony.

Sahiran̈a Israelita aby io, fôtony irô tsy nan̈araka volan̈a Jehovah. Olo ta Midiana tao faran-draha fatatra eky, ke nampijaly irô. Irô koa fa nangataka vonjy tamy Jehovah, Jehovah nitandren̈y.

Jehovah nan̈iraka Gideona hamory maramila, ke 32 000 lahy voavoriny. Kanefa, olo kadiriny 135 000 lahy hiady amin-drô. Jehovah nivolan̈a tamy Gideona: ‘Maro loatra olonao aby io.’ Nan̈ino ma Jehovah nivolan̈a zen̈y?

Fôtony irô koa maro ke mandresy, irô hieritreritry fa boaka amin’angôvon-drô fo nandrisian-drô. Ke mety hivolan̈a irô fa tsy mila vonjy boaka amy Jehovah eky. Zen̈y nahavy Jehovah nivolan̈a tamy Gideona kara’ty: ‘Iraha mody zay lelahy mavozo hiady.’ Izikoa Gideona fa nan̈ano zen̈y, 22 000 lahy nody. Maramila 10 000 fo tavela hiady tamy maramila 135 000.

Tandrin̈esa baka! Jehovah nivolan̈a: ‘Anarô mbala maro fo.’ Ke nirahiny Gideona hampigiaka lelahy aby io tamy ten̈arano, baka iô hampody zay olo niôndriky tan̈aty rano tao nigiaka. Jehovah nan̈amia toky: ‘Hataoko mandresy anao ndreky olonao aby io.’

Hiady amy zay irô iziô. Nizarain’i Gideona telo 300 lahy aby in̈y. Baka iô, irô jiaby samy namiany bankaora ndreky jiro an̈aty sajoa. Izikoa fa sasak’alin̈y, irô nikodidin̈y tobin’ny fahavalo. Tamy zen̈y, irô nampan̈ena bankaora ndreky namaky sajoa, boaka iô irô nandronton̈o: ‘Mesoben’i Jehovah ndreky nin’i Gideona!’ Fahavalo aby io koa fa nifoha, nialamboetry, fôtony navozo. Irô jiaby nilefa, ke Israelita aby io nandresy.

Mpitsara toko faha-6 ziska toko faha-8.