Tantara 34

Karazan̈a Hanin̈y Vaovao

HAINAO raha alain’olo aby io? Izio malandy, baka iô matify karaha lagilasy. Izio tsy lagilasy, fa raha mety hahanin̈y fo.

Fanjava araiky zay Israelita aby io niala Ejipta. Irô iziô amy tany paiky. Hely fo raha mety nahanin̈y naniry tan̈y, ke irô nitarain̈y. Volan̈in-drô kara’ty: ‘Sitrany fo zahay nivonen’i Jehovah ta Ejipta tan̈y. Mba hainay an̈y misy hanin̈y jiaby tadiavinay.’

Ke Jehovah nivolan̈a: ‘Zaho handatsaka hanin̈y boaka an-dan̈itry.’ Zen̈y raha nataon’i Jehovah. Amarain’izin̈y, Israelita aby io koa fa nahita raha malandilandy tamy tany, irô nifampan̈ontany: ‘Ino ma io?’

Mosesy amy zay nivolan̈a: ‘Izio hanin̈y namian’i Jehovah anarô.’ MANA amy zay nataon-drô an̈arany. Sirony karaha mokary miaro antely in̈y.

Mosesy nivolan̈a tamin-drô: ‘Anarô mety mangala zay laninarô.’ Isaka maraindrain̈y, irô nangala zay lanin-drô. Izikoa fa manonga masoandra, mana io ravan̈a.

Mosesy baka tiô nivolan̈a kara’ty: ‘Tsisy olo mahazo mikajy mana.’ Sasany mbala tsy nan̈araka volan̈a fo. Hainao ino raha niboaka? Kiakan’andran’izin̈y, mana in̈y tsy mety nahanin̈y eky. Raha io feno ôlitry, baka iô nantsin̈y!

Jehovah nivolan̈a tamin’olo hangala mana indroen’ny falain-drô, tamin’andra fahatsiaota. Izy nivolan̈a fa amin’andra fahafito, izy tsy handatsaka mana boaka an-dan̈itry. Irô koa fa nangala mana hahanin̈y tamin’andra fahafito, raha io tsisy ôlitry, sady tsy nantsin̈y! Fahagagan̈a hafa koa zen̈y!

Tamin’Israelita aby io tamy tany paiky tan̈y, mana nataon’i Jehovah hanin̈in-drô.

Eksodosy 16:1-36; Nomery 11:7-9; Josoa 5:10-12.