Tantara 46

Lakoro Vato Fatatran’i Jerikô

INO eky namparaongana lakoro vato fatatran’i Jerikô io? Izio karaha raha nilatsahan’ny baomby. Fa tamin’andra zen̈y mbala tsisy baomby; ndray basy mbala tsy nanan̈an’olo. Izio fahagagan̈a araiky hafa nataon’i Jehovah! Atsika hianatra raha nahavy zen̈y.

Tandrin̈esa baka raha nambaran’i Jehovah tamy Josoa. Volan̈iny: ‘Mindao anao ndreky lelahy mpandeha miady aminarô, mikodidin̈y tanàna io. Kodidìn̈a indraiky isan’andra izio, an̈atin’ny tsiaota andra. Indesa miaraka aminarô fiaran’ny fanekena. Mpisôron̈o fito mila mandeha alohan’ny fiaran’ny fanekena, mitsotro bankaora.

‘Amy andra fahafito, kodidìn̈a impito tanàna io. Tsofa ela oe bankaoranarô, baka iô olo jiaby iraha man̈ano kôrolahy. Amy zen̈y ho raongan̈a lakoro vato fatatra be io!’

Josoa ndreky olo jiaby tamin’Israely nan̈ano zay raha nivolan̈in’i Jehovah. Irô koa fa nandeha, kila olo nangin̈y. Tsisy olo nivolan̈a. Diam-bitin’olo mandeha, ndreky fiôn’ny bankaora fo raha ren̈y. Fahavalon’olon’i Jehovah ta Jerikô tao nangôrohôro. Hitanao tady mena mianton̈o amy lafenaitara io? Lafenaitaran-jôvy izio koa hainao? Nin’i Rahaba, fôtony izy nan̈ano zay raha nirahan’Israelita aroe in̈y. Izy ndreky ry havany jiaby tan̈aty tao niambin̈y.

Farany amy zay, tamin’andra fahafito, irô koa fa nikodidin̈y tanàna io impito, nampan̈ena bankaora, nan̈ano kôrolahy, raongan̈a lakoro vato fatatra in̈y. Josoa baka iô nivolan̈a kara’ty: ‘Vonia zay olo hitanarô amy tanàna, baka iô iroa môtro tanàna io. Iroa raha jiaby. Volafotsy, volamena, varahin̈y ndreky vỳ fo alaiva, atera amy tran̈olain’i Jehovah.’

Volan̈in’i Josoa tamin-drô’roe lahy in̈y: ‘Mindao amy tran̈on’i Rahaba an̈y, alaiva izy ndreky ry havany.’ Rahaba ndreky ry havany tsy naty, karaha raha nivolan̈in-drô’roe lahy taminany.

Josoa 6:1-25.