Man̈angy Aroe Tsy Navozovozo
Tantara 50
Man̈angy Aroe Tsy Navozovozo
ISRAELITA aby io koa fa sahiran̈a, nangataka vonjy tamy Jehovah. Jehovah nan̈eky, ke nan̈amia mpitariky tsy navozovozo. Mpitsara ikahian’ny Baiboly irô io. Josoa mpitsara voanalohany tamin’Israely, baka iô fan̈araka izy Otniela, Ehoda ndreky Samgara. Nisy man̈angy aroe koa nan̈ampy Israely. Debora ndreky Jaela an̈aran-drô.
Debora io mpaminan̈ivavy. Jehovah man̈ambara taminany raha mbala hoavy, izy amy zay mivolan̈a amin’olo raha nambaran’i Jehovah. Debora io koa mpitsara. Ambany vodin’ny kindro marikitry bongo fipitrahany. Ke olo man̈aton̈o izy iô, koa fa misy ra-manahiran̈a.
Tamin’andran’izen̈y, Jabina ampanjakan’i Kanana. Izy nanan̈a sarety findesin̈y miady 900. Maramilanany maro fatatra, ke maro Israelita nifaoriseny natao andevo. Sisera an̈aran̈a sefon’ny maramilan’i Jabina.
Andra araiky, Debora nan̈iraka olo hikaiky Baraka mpitsara. Izy koa fa navy, volan̈in’i Debora: ‘Jehovah nivolan̈a: “Mangalà 10 000 lahy anao, indesa amy Bongo Tabara. An̈y anao fanôjy Sisera. Ataoko zay raha hamparesy izy ndreky maramilanany.” ’
Volan̈in’i Baraka tamy Debora: ‘Anao koa pare hiaraka aminakahy, zaho mandeha.’ Debora nan̈eky handeha, kanefa volan̈iny: ‘Anao fo tsy hahazo voninahitry boaka amin’ady io, fôtony tan̈an’ny man̈angy ampiasain’i Jehovah hamono Sisera.’ Zen̈y edy raha niboaka.
Baraka nandeha tamy Bongo Tabara, beky fanôjy maramilan’i Sisera. Tiô fo, nisy rano be nalefan’i Jehovah, ke naro maramilan’i Sisera naty. Sisera koa fa nahita izen̈y, nialany saretinany, izy nilefa.
Tafaran’izin̈y, Sisera navy tamy tran̈olain’i Jaela. Jaela nan̈ano karibo an-tran̈o izy, baka iô nan̈amia ronono izy higiahiny. Sisera koa fa nahazo ronono in̈y, ti hoandry be zay, betibetiky izy fa nierotro. Jaela nangala meso marangitry, baka iô vangoeny tomboko meso lohan’ny lelahy ratsy fan̈ahy io. Baraka koa fa navy, naboakany izy fatin’i Sisera! Hitanao amy zen̈y fa raha jiaby nambaran’i Debora, niboaka ankitin̈y.
Farany, Ampanjaka Jabina nivonen’olo. Israelita aby io amy zay niadan̈a antsendriky.
Mpitsara 2:14-22, 4:1-24; 5:1-31.
