Tantara 40

Mosesy Mamepiky Vato

TELO-POLO sivy amby taon̈o zay lôso. Israelita aby io mbala tamy tany paiky tan̈y fo. Tan̈atin’ny fotoan̈a jiaby zen̈y, Jehovah nikarakara olonany. Izy nan̈amia irô mana. Rôndro nampiasainy hitaritan̈a irô, lera andra mangarazava, aviô môtro, koa fa alin̈y andra. Tan̈atin’izen̈y koa, lamban-drô tsy natriaka, kiraron-drô tsy robaka foeky.

Efa herin̈andra iziô nampa-40 taon̈o nialan-drô Ejipta. Israelita aby io nimpody nitoby ta Kadesy. Tamy tany io baka irô 40 taon̈o lôso zay, tamy mpitsikilo 12 nirahan̈a nizaha tany Kanana in̈y. Miriama anabavin’i Mosesy naty ta Kadesy tao. Karaha taloha in̈y fo, nisy ra-nanahiran̈a irô koa tao.

Tsisy rano baka tany nisy irô io. Ke irô nitarain̈y tamy Mosesy: ‘Tsy sitrany zahay naty. Ino fo ma nitondrasanao zahay niala Ejipta nandeha amy tany tsy manjary, tsisy raha maniry ty? Tsisy voavoan-draha mety hahanin̈y, tsisy rezay, tsisy ampongabendan̈itry. Ndray rano higiahan̈a tsisy.’

Mosesy ndreky Arona, koa fa nandeha tamy tabernakely tao nivavaka, volan̈in’i Jehovah tamy Mosesy: ‘Avoria alohanarô iô olo jiaby. Volàn̈a vato irỳ. Hisy rano hiboaka aminany iô, mahampy olo jiaby ndreky biby jiaby.’

Ke Mosesy namory olo, baka iô nivolan̈a kara’ty: ‘Tandrin̈esanarô ty, anarô tsy mahatoky Zan̈ahary io! Tianarô ma zahay ndreky Arona ampiboaka rano higiahanarô boaka amy vato ty?’ Nipipen’i Mosesy indroe aby tamy tongozonany vato in̈y, ke nisy rano be karaha sarôro niboaka tamy vato in̈y. Nahampy nigiahan’olo jiaby ndreky biby jiaby rano io.

Fa Jehovah neloko tamy Mosesy ndreky Arona. Mba hainao ino antony? Fôtony Mosesy ndreky Arona nivolan̈a fa irô nampiboaka rano boaka tamy vato in̈y. Kanefa, tsy irô aby nan̈ano izin̈y fa Jehovah. Ke Jehovah nivolan̈a fa hisaziny Mosesy ndreky Arona, fôtony tsy nan̈ambara ny marin̈y. Nambarany tamin-drô: ‘Anarô tsy mahazo mitariky olonakahy mandeha Kanana eky.’

Hiala Kadesy amy zay Israelita aby io. Irô koa fa nandeha refindrefiny, navy tamy Bongo Hora. Tamy tendron’ny bongo io, Arona naty. Izy tamy zen̈y 123 taon̈o. Tamy zen̈y, Israelita aby io nalahelo mare. Irô nitomoan̈y tan̈atin’ny 30 andra. Zanany, Eleazara, amy zay nanjary mpisôron̈obe tamy firenen’Israely.

Nomery 20:1-13, 22-29; Deoteronomia 29:4.