Mpitsikilo 12 Nirahin̈y Ta Kanana
Tantara 38
Mpitsikilo 12 Nirahin̈y Ta Kanana
ZAHAVA hely baka rezay ndreky aviavy, baka iô ampongabendan̈itry maro be indesin’ny lelahy aby io. Maro maventy, tsy zen̈y? Mila aroe lahy vo mahavita mibata fahiny araiky. Boaka taia eky raha maro manjary be io? Ta Kanana. Alaiva onon̈o, Kanana an̈aran̈a tany nipitrahan’Abrahama ndreky Isaka, aviô Jakoba in̈y. Izikoa fa nisy mosary tan̈y, Jakoba ndreky ry havany jiaby nifindra ta Ejipta. Mosesy nitariky Israelita aby io himpody amy tany Kanana, 216 taon̈o tafaran’izen̈y. Irô iziô navy amy tany paiky. Kadesy ikahian̈a izio.
Olo ratsy fan̈ahy areriky mipetraka amy tany Kanana io. Ke Mosesy nan̈iraka 12 lahy handeha an̈y. Volan̈iny tamin-drô: ‘Indao zahava karakôry amaraozan’olo amy tany io, akôry hafataran̈an-drô. Zahava koa izikoa tany io tsara ndreky van̈ono raha atsabo. Aza adin̈a mitaondra vokatra boaka an̈y.’
Olo aby nirahan̈a nitsikilo aby in̈y koa fa tafimpody ta Kadesy, nivolan̈in-drô tamy Mosesy: ‘Tsara ankitin̈y tany io.’ Naboakan-drô Mosesy vokatra nindesin-drô boaka tan̈y. Folo tamin-drô nivolan̈a kara’ty: ‘Olo amy tany io zalahy maro maventy sady fatatra. Ho matin-drô atsika, izikoa mangala tanin-drô.’
Navozo Israelita aby io, koa fa naharen̈y zen̈y. Volan̈in-drô: ‘Sitrany fo zahay naty ta Ejipta tan̈y na maty amy tany paiky ty. Atsika hofoatin’ny ady, aviô vaditsika ndreky zanakatsika hitànan-drô atao andevo. Alô atsika hifidy olo vaovao solon’i Mosesy, hitariky atsika himpody Ejipta!’
Fa aroe tamy mpitsikilo 12 lahy io nahatoky Jehovah; irô nan̈ano raha beky olo mangin̈y. Josoa ndreky Kaleba an̈aran-drô io. Volan̈in-drô: ‘Anarô kaza mavozo. Tsy sarotro amitsika mahazo tany zen̈y, fôtony Jehovah miaraka amitsika.’ Fa olo tsy nijery raha nivolan̈in-drô. Ndray irô nila hamono Josoa ndreky Kaleba.
Neloko Jehovah, ke volan̈iny tamy Mosesy: ‘Tsisy nata araiky amin’olo 20 taon̈o manonga, hiditry amy tany Kanana io. Irô nahita fahagagan̈a jiaby nataoko ta Ejipta ndreky tamy tany paiky ty, kanefa irô mbala tsy mahatoky zaho fo. Hiriaria amy tany paiky ty irô, an̈atin’ny 40 taon̈o, zisk’irô jiaby maty. Josoa ndreky Kaleba fo hiditry amy tany Kanana io.’
Nomery 13:1-33; 14:1-38.
