Tantara 53

Vava Nataon’i Jefta

ANAO fa navy nivolan̈a tamin’olo fa pare han̈ano raha, baka iô hitanao fa sarotro atao raha io? Zen̈y navoa lelahy amy sary io, ke izy nalahelo. Izy mpitsara tsy navozovozo tamin’Israely. Jefta an̈arany.

Jefta io velon̈o, tamin’andra tsy nivavahan-drô Israelita aby io tamy Jehovah. Irô mbala nan̈ano raha ratsy ndreky koa. Jehovah amy zay nan̈ambela irô hampijalin’Amônita aby io. Zen̈y nahavy Israelita aby io nitarain̈y tamy Jehovah: ‘Mifôno zahay fa diso taminao ô. Mangataka vonjy zahay e!’

Olo aby io nanen̈iny nan̈ano raha ratsy. Irô nimpody nanompo Jehovah, ke zen̈y nahaizan̈a fa irô nanen̈iny ankitin̈y. Jehovah namonjy irô.

Olo nifidy Jefta, hiady tamin’Amônita aby io. Tian’i Jefta Jehovah hitatahy izy amin’ady io. Ke izy nan̈ano vava tamy Jehovah: ‘Zaho koa ataonao mandresy Amônita aby io, hamiako anao zay olo voanalohany miboaka amy tran̈onakahy, mitsena zaho boaka miady.’

Jehovah nan̈eky vava nataon’i Jefta zen̈y, ke nitatahy izy. Nandresy Jefta. Izikoa izy fa nody tan-tran̈o, hainao azôvy olo voanalohany niboaka nitsena izy? Zanany man̈angy, kanefa zanany araiky io fo. Jefta tafiafatra nivolan̈a: ‘Ah, zanako! Anao nan̈ano raha nampalahelo zaho eky e! Zaho fa nan̈ano vava tamy Jehovah, ke zaho tsy impody afara eky.’

Zanany man̈angy io koa fa naharen̈y vava nataon’ny babany, nalahelo koa. Izy baka tsy maintsy hiala babany ndreky kamaradiny jiaby. Silo an̈aran̈a tany andihanany. Diany an̈y hanompo Jehovah amy tabernakely, zisk’izy maty. Izy nivolan̈a tamy babany amy zay: ‘Izikoa anao fa nan̈ano vava tamy Jehovah, tàna fo vava nataonao.’

Zanaka Jefta amy zay nandeha ta Silo, nanompo Jehovah tamy tabernakely zisk’izy naty. Efatra andra isaka taon̈o, man̈angy israelita aby io mamangy izy, ke tsara fiarahan̈an-drô. Tian’olo zanaka Jefta, fôtony izy ten̈a tia manompo Jehovah.

Mpitsara 10:6-18; 11:1-40.