Tantara 77

Irô Tsy Nety Nankôhoko

MISY raha azonao onon̈o mikasiky irô telo lahy io? Ia, irô io kamaradin’i Daniela tsy nety nihina raha tsy tsara tamin-drô in̈y. Sadraka, Mesaka ndreky Abednego, an̈aran̈a nikahian’ny Babylonianin̈y irô. Zahava amy zay irô iziô. Nan̈ino irô tsy nety nankôhoko tamy sary maventy be io, kanefa olo jiaby mankôhoko? Alô zahavatsika.

Tsiaronao Didy Folo, lalàn̈a nisoratan’i Jehovah in̈y? Voanalohany amy zio mivolan̈a: ‘Anarô tsy mahazo manompo zan̈ahary hafa, fa Zaho fo.’ Tsaikilelahy aby io nan̈araka lalàn̈a io, nata tsy mora tamin-drô nan̈ano zen̈y.

Nebokadnezara ampanjakan’i Babylona tamy zen̈y nikaiky olo hajain̈a maro han̈amia voninahitry sary natsangany io. Izy iô vo boaka nivolan̈a kara’ty tamin’olo jiaby: ‘Izikoa anarô fa maharen̈y fiôm-bankaora, valiha ndreky raha man̈ena, mila mankôhoko ndreky mivavaka amy sary volamena ty. Zay olo tsy mety mankôhoko ndreky mivavaka amy zio, hatsipy an̈aty lafaoro misy môtro mirehitry.’

Nebokadnezara koa fa naharen̈y fa Sadraka, Mesaka ndreky Abednego tsy nety nankôhoko, neloko mare. Irô nampaviany taminany. Irô nirahiny nankôhoko tamy sary io ndreky, beky tsy atsipy an̈aty lafaoro. Tsaikilelahy aby io natoky Jehovah. Volan̈in-drô tamy Nebokadnezara: ‘Zan̈ahary tompoenay mahavita mamonjy zahay. Ndray izy tsy mamonjy, zahay mbala tsy hankôhoko amy sary volamenanao io fo.’

Nahay neloko fo Nebokadnezara naharen̈y zen̈y. Nisy lafaoro narikitry tiô, ke izy nan̈amia beko: ‘Afanà lafaoro, ataova impiton’ny mahazatra!’ Nirahiny amy zay maramilanany farany fatatra namehy tady Sadraka, Mesaka ndreky Abednego, baka iô nan̈atsipy irô tan̈aty lafaoro. Nafana loatra lafaoro io, ke lelahy aby nan̈atsipy irô tao naty. Nan̈ano karakôry fo irô telo lahy natsipy tan̈aty tao?

Ampanjaka in̈y koa fa nizaha lafaoro in̈y, nivadiky navozo mare. Izy nan̈ontany: ‘Tsy telo lahy ma nifihezitsika, natsipy tan̈aty lafaoro tao?

Ampiasanany nivolan̈a: ‘Ia, telo.’

Ampanjaka amy zay nivolan̈a: ‘Efatra kony irô hitako mandehandeha an̈aty môtro io. Irô tsy mifehy, irô tsy may. Karaha zan̈ahary fahitako fahefatran-drô.’ Ampanjaka baka tiô nandeha narikitry varavaran̈a lafaoro in̈y, nivolan̈a mare: ‘Sadraka! Mesaka! Abednego! Miboaha anarô, mpanompon’ny Zan̈ahary Farany An̈abo!’

Irô koa fa tafiboaka, olo jiaby nahita fa irô tsy naratra foeky. Ampanjaka amy zay nivolan̈a: ‘Zan̈aharin’i Sadraka, Mesaka ndreky Abednego man̈eva ivavahan̈a! Izy nan̈iraka anjelinany hamonjy irô, fôtony irô tsy nety nankôhoko ndreky nivavaka, koa tsy tamy zan̈aharin-drô fo.’

Karaha zen̈y koa atsika, mila tsy mivadiky amy Jehovah, tsy zen̈y?

Eksodosy 20:3; Daniela 3:1-30.