Tantara 78

Tan̈ana Araiky Nanoratra Tamy Riba

NAN̈INO ma irô io? Olo aby io nan̈ano fetibe. Ampanjakan’i Babylona tamin’io nikaiky manam-pahifan̈a arivo. Boaka amy tempolin’i Jehovah ta Jerosalema, kôpy volamena ndreky volafotsy, ndreky bakôly nampiasain-drô io. Tiô fo, nisy tan̈ana araiky nanoratra tamy riba. Kila olo navozo.

Tamy zen̈y Belsazara zafin’i Nebokadnezara, nanjaka. Nikahiny olo fangalany sain̈y jiaby. Volan̈iny: ‘Zay mahavita mamaky soratra io, ke man̈ambara dikany aminakahy, hamiako kadô maro, baka iô izy hataoko fahatelon’olo hitaondra amy fanjakan̈a.’ Kanefa, irô tsisy nahavita namaky soratra io, ndreky nahay dikany.

Maman’ampanjaka koa fa naharen̈y raha maresaka, navy tamy tany fihinanan̈a tao. Volan̈iny tamin-drô: ‘Anarô kaza mavozo. Misy lelahy araiky amy fanjakan̈anao mahay zan̈ahary masin̈y aby io. Tamy dadilahinao Nebokadnezara mbala velon̈o, izy sefon’olo misain̈y tao. Daniela an̈arany. Mindao kahia izy, fa ambarany anao edy dikan’ny soratra aby io.’

Niaraka tamy zen̈y, Daniela nikahian-drô. Daniela koa fa navy, nivolan̈a fa tsy hangala kadô aby zen̈y. Baka iô izy nan̈azava antony nahavy Jehovah nan̈adoso fanjakan̈a tamy Nebokadnezara, dadilahin’i Belsazara. Volan̈in’i Daniela: ‘Izy niavon̈o loatra, ke nisazin’i Jehovah.’

Volan̈iny tamy Belsazara: ‘Hainao tsarabe raha jiaby nahazo Nebokadnezara zen̈y, fa anao mbala niavon̈o fo. Aia ke kôpy ndreky bakôly tamy tempolin’i Jehovah nataonao figiahan̈a. Anao tsy nan̈isy fôtiny Zan̈ahary niasa raha jiaby, fa zan̈ahary kakazo ndreky vato aby io fo najainao. Zen̈y nahavy Zan̈ahary nan̈ano tan̈ana nanoratra raha aby io.’

Volan̈in’i Daniela: ‘Kara’ty vakin’ny raha misoratra io: MENE, MENE, TEKELA ndreky OPARESINA.’

‘Dikan’ny MENE zen̈y, efa nikonten’ny Zan̈ahary andra anjakanao, ke hely tavela. Dikan’ny TEKELA, anao fa nipizen̈a tamy balansy, ke anao tsisy kôntiny. OPARESINA io ndreky, fanjakan̈anao hamian̈a Medianin̈y ndreky Persianin̈y.’

Daniela mbala nan̈azava fo, Medianin̈y ndreky Persianin̈y aby io fa nanafiky Babylona. Nazon-drô tanàna, Belsazara nivonen-drô. Alin̈’izin̈y fo, raha jiaby voasoratra tamy riba in̈y niboaka ankitin̈y! Nan̈ano karakôry amy zay Israelita aby io? Mbala ho hitatsika mikasiky zen̈y, fa alô antsendriky atsika hizaha raha nahazo Daniela.

Daniela 5:1–6:1.