Ampanjaka Ratsy Fan̈ahy Ta Ejipta
Tantara 27
Ampanjaka Ratsy Fan̈ahy Ta Ejipta
LELAHY aby io midiresy olo miasa. Zahava ampiasa araiky irỳ, vangoen’ny lelahy io karavasy! Ampiasa aby io mbala havan’i Jakoba. Israelita ikahian̈a irô. Ejipsianin̈y lelahy aby midiresy irô miasa io. Israelita aby io nanjary andevon’Ejipsianin̈y. Karakôry eky nahavy zen̈y?
Tan̈atin’ny taon̈o taon̈o, havan’i Jakoba niadan̈a ta Ejipta tao. Josefa, sefo fan̈arakaraka Farao, nikarakara irô. Josefa amy zay naty. Farao vaovao koa nanjary ampanjakan’Ejipta. Izy tsy tia Israelita aby io foeky.
Farao ratsy fan̈ahy io nan̈ano Israelita aby io andevo. Olo nirahiny han̈ara-maso irô koa faran-draha ratsy fan̈ahy eky, sady tia mampijaly olo. Irô nidiresy Israelita aby io hiasa farany mare, han̈amboatra tanànan’i Farao. Israelita aby io mbala nahaimaro fo. Ejipsianin̈y aby io nanjary navozo, tsao Israelita aby io ho maro ndreky fatatra loatra.
Hainao raha nataon’i Farao? Volan̈iny tamy rasazy israelita aby io: ‘Tsy maintsy vonenarô zazamena lelahy vo teraka jiaby.’ Tsara fan̈ahy rasazy aby io. Irô tsy namono zazamena.
Ke Farao nikomandy olonany jiaby: ‘Samia mangala zazamena lelahy Israelita, baka iô irô vonia. Zazamena man̈angy fo kaza vonen̈a.’ Tsy raha farany ratsy edy zen̈y va? Zahavatsika karakôry tsy nampanaty zazamena lelahy araiky.
Eksodosy 1:6-22.