Tantara 17

Esao Ndreky Jakoba

TSY miran̈a foeky irô tsaiky aroe io, tsy zen̈y? Mba hainao an̈aran-drô io? Esao, araiky mitana lafilesy io. Jakoba, araiky mitana ôndrikôndriky io.

Esao ndreky Jakoba, zanak’Isaka ndreky Rebeka. Amban̈a irô io. Esao ten̈a tian’Isaka baban-drô, fôtony izy mahay mitifitry. Ke izikoa izy fa mahavoa, indesiny mody raha io, ataon-drô kabaka. Jakoba ten̈a tian’i Rebeka, fôtony izy tsara toetry.

Abrahama, dadilahin-drô mbala velon̈o tamy zen̈y. Misaora tian’i Jakoba mitandren̈y izy mitantara raha mikasiky Jehovah. Naty Abrahama izikoa fa 15 taon̈o Jakoba ndreky Esao. Abrahama tamy zen̈y 175 taon̈o.

Esao koa fa 40 taon̈o, nanambady. Aroe aby vadiny, man̈angy boaka amy tany Kanana. Nampalahelo Isaka ndreky Rebeka mare raha zen̈y, fôtony man̈angy aby io nivavaka tamy zan̈ahary tsy izy.

Andra araiky amy zay, nisy raha nampaneloko Esao mare tamy Jakoba. Efa lera tôkony an̈amezan’Isaka jôro zanany talan̈olo tamy zen̈y. Esao baka zôkizôky toizay Jakoba, ke Esao nan̈anten̈a mare hahazo jôro. Talohan’izen̈y, Esao efa nandafo fazahoan̈a jôro in̈y tamy Jakoba. Tamin’irô mbala tan̈aty kibo koa, Jehovah efa nivolan̈a fa Jakoba hahazo jôro. Zen̈y ankitin̈y raha niboaka. Jakoba nijoroen’Isaka fa tsy Esao.

Izikoa fa ren̈in’Esao raha zen̈y, izy neloko tamy Jakoba. Izy neloko loatra, ke nivolan̈a fa hivoneny Jakoba. Rebeka navozo mare, izikoa fa naharen̈y zen̈y. Volan̈iny tamin’Isaka vadiny: ‘Hahita raha atsika, izikoa Jakoba mangala man̈angy boaka amy tany Kanana koa.’

Zen̈y nahavy Isaka nikaiky Jakoba, baka iô nivolan̈a kara’ty taminany: ‘Kaza manambady man̈angy boaka amy tany Kanana. Sitrany anao mandeha amy Betoela dadilahinao amy tany Harana an̈y. Araiky amy zafiny, zanaka Labana, alaiva vady.’

Jakoba nan̈araka volan̈a babany, ke niaraka tamy zen̈y izy nandeha ta Harana, tany misy havan-drô.

Genesisy 25:5-11, 20-34; 26:34, 35; 27:1-46; 28:1-5; Hebreo 12:16, 17.