Tantara 33

Fitsakan̈a Ranomasin̈y Mena

NISY nino eky! Mosesy mitana tongozonany, nataony mahitsy an̈abon’ny Ranomasin̈y Mena iô. Israelita olo aby tafitsaka miaraka aminany io. Farao ndreky maramilanany jiaby dobo an̈aty ranomasin̈y. Atsika hizaha nino nahavy zen̈y.

Atsika nianatra fa koa fa vita antambo fahafolo in̈y, Farao nan̈iraka Israelita aby io hiala ta Ejipta. Kadiriny 600 000 iô lelahy israelita niala tao, baka iô nisy man̈angy ndreky tsaiky maro koa. Nisy koa olo hafa maro be, nanjary nivavaka tamy Jehovah. Irô koa niaraka tamin’Israelita aby io. Nindesin-drô niaraka tamin-drô koa ôndrikôndriky ndreky bengy, ndreky aombin-drô jiaby.

Talohan’ny nandeha, Israelita aby io nangataka lamba ndreky raha namboarin̈y tamy volafotsy ndreky volamena tamin’Ejipsianin̈y aby io. Ejipsianin̈y aby io baka navozo mare nahita antambo fahafolo in̈y. Ke zay raha nangatahin’Israelita aby io namian-drô.

Koa fa nandeha andra, Israelita aby io navy tamy Ranomasin̈y Mena. Tan̈y irô nangala kajo. Tamy lera jiaby zen̈y, Farao ndreky olonany nanen̈iny nandefa Israelita aby io. Volan̈in-drô: ‘Ndreky nambelatsika nandeha andevotsika!’

Tiô fo, Farao fa niova hevitry koa. Nataony pare nalaky sarety ndreky maramilanany. Lôso amy zay irô, nan̈ian̈a Israelita aby in̈y. Sarety findesin̈y miady 600 nindesin-drô, baka iô koa sarety jiaby ta Ejipta tan̈y.

Izikoa fa hitan’Israelita aby io Farao ndreky maramilanany avy afaran-drô, irô navozo mare. Irô baka fa tsisy tany ilifasan̈a eky. Ranomasin̈y Mena alohan-drô, baka iô Ejipsianin̈y aby io afaran-drô. Nataon’i Jehovah nisy zavon̈o matevin̈y nampisaraka Israelita ndreky Ejipsianin̈y. Ejipsianin̈y aby in̈y amy zay tsy nahavita nanafiky, fôtony irô tsy nahita Israelita aby io.

Jehovah amy zay nan̈iraka Mosesy hampahitsy tongozonany an̈abon’ny Ranomasin̈y Mena iô. Izikoa fa nataony zen̈y, Jehovah nandefa tsiko mare, boaka antin̈ana. Nisaraka aroe ranomasin̈y, karaha riba an̈ilan̈ila.

Israelita aby io amy zay nanampôno nitsaka, nan̈araka tany maiky in̈y. Irô tamy zen̈y maro, misy an-tapitrisany, baka iô koa bibin-drô jiaby niaraka tamin-drô. Kadiriny lera maro irô vo tafitsaka. Koa fa elaela, Ejipsianin̈y aby io nahatsinjo Israelita aby io. Hitan-drô fa mbala tan̈atin’ny filifasan̈a andevon-drô! Irô baka tiô niditry tamy ranomasin̈y tao koa, nan̈ian̈a Israelita aby io.

Irô koa fa tafiditry, nipoapoahan’ny Zan̈ahary laròn’ny saretin-drô jiaby. Navozo mare Ejipsianin̈y aby io. Irô baka iô niafatra: ‘Jehovah man̈ampy Israelita aby io miady amitsika. Alô atsika himpody!’ Efa tara loatra!

Tamy zen̈y Jehovah nan̈iraka Mosesy hampahitsy tongozonany an̈abon’ny Ranomasin̈y Mena, karaha hitanao amy sary io. Mosesy koa fa nan̈ano zen̈y, nitambatra ranomasin̈y in̈y, baka iô dobo tao Ejipsianin̈y aby io ndreky saretin-drô. Maramila jiaby nan̈araka Israelita aby io tan̈aty ranomasin̈y tao aby. Irô jiaby naty tao!

Ravoravo mare olon’ny Zan̈ahary tsy naty! Lelahy jiaby nihira kara’ty an̈anaovan̈a mersỳ Jehovah: ‘Jehovah nandresy. Izy nan̈atsipy sevaly ndreky olo nitenginy izy tan̈aty ranomasin̈y tao.’ Miriama anabavin’i Mosesy nangala ampongahelinany, baka iô man̈angy jiaby nan̈araka izy boaka afara samy mitana amponga. Irô nitsinjaka tan-karavoan̈a, nan̈araka hiran-drô lelahy aby in̈y: ‘Jehovah nandresy. Izy nan̈atsipy sevaly ndreky olo nitenginy izy tan̈aty ranomasin̈y tao.’

Eksodosy toko faha-12 ziska toko faha-15.