Tantara 30

Kakazo Nirehitry

ANDRA araiky Mosesy nandeha tamy bongo araiky, hitady ahitry ahanin’ôndrikôndrikinany. Horeba an̈aran̈a bongo io. Tan̈y izy nahita kakazo nirehitry, kanefa tsy nay!

‘Mampagaga zaka ty!’, hoy Mosesy tamy jerinany tao. ‘Atôn̈oko izio, beky zaho mahita tsarabe.’ Izy koa fa nan̈aton̈o, nisy fiô boaka tamy kakazo in̈y nivolan̈a: ‘Kaza man̈aton̈o eky anao. Adosoa kiraronao, fa tany masin̈y diavinao io.’ Zan̈ahary nampiasa anjely nikoran̈a tamy Mosesy, ke nitakofan’i Mosesy soranany.

Zan̈ahary baka tiô nivolan̈a: ‘Hitako olonakahy mijaly amy tany Ejipta an̈y, ke zaho han̈avotro irô. Anao hirahiko hitaondra irô boaka Ejipta.’ Jehovah hitaondra olonany amy tany araiky tsara. Kanana an̈aran’izio.

Mosesy nivolan̈a: ‘Olo karaha ataoko ty. Karakôry ahavitako zen̈y? Ohatra zaho iziô andeha an̈y. Israelita aby io han̈ontany zaho: “Azôvy ma nan̈iraka anao?” Ino raha hambarako irô?’

Zan̈ahary nivolan̈a tamy Mosesy: ‘Ty raha ambaranao irô: “JEHOVAH Zan̈aharin’Abrahama, Zan̈aharin’Isaka ndreky Zan̈aharin’i Jakoba, nan̈iraka zaho handeha aminarô atỳ; zen̈y an̈aranakahy mandrakizay.” ’

Mosesy namaly: ‘Irô koa tsy man̈eky fa anao nan̈iraka zaho ke?’

Zan̈ahary nivolan̈a: ‘Ino ma raha amy tan̈anao in̈y?’

‘Tongozo’, hoy Mosesy.

Zan̈ahary nivolan̈a: ‘Atsipia amy tany baka izio.’ Tongozo in̈y koa fa natsipin’i Mosesy, nivadiky bibilava. Jehovah baka tiô nan̈aboaka fahagagan̈a hafa tamy Mosesy. Nambarany: ‘Ampidira an̈aty lambanao baka tan̈anao.’ Izikoa fa nampidirin’i Mosesy tan̈aty lambanany tan̈anany, nivadiky malandy jiaka, karaha ronono! Karaha tan̈an’olo boka in̈y tan̈anany. Baka iô, Jehovah nan̈amia angôvo Mosesy, ke nan̈ano fahagagan̈a fan̈intelony Mosesy. Farany, izy nivolan̈a: ‘Izikoa anao man̈ano fahagagan̈a jiaby io, Israelita aby io hino fa zaho ankitin̈y nan̈iraka anao.’

Mosesy koa fa navy tan-tran̈onany tan̈y, nivolan̈a tamy Jetro: ‘Zaho io hirasa volan̈a aminao fa himpody amy tany Ejipta an̈y, hizaha karakôry nanin-dry havako an̈y. Ke ataova tsara tsodrano zaho.’ Jetro amy zay nan̈ano samy tsara Mosesy, baka iô Mosesy nimpody ta Ejipta.

Eksodosy 3:1-22; 4:1-20.