Tantara 31

Mosesy Ndreky Arona Tamy Farao Tan̈y

MOSESY koa fa nimpody ta Ejipta tan̈y, nambarany Arona rahalahiny fahagagan̈a jiaby in̈y. Mosesy ndreky Arona baka iô nan̈aboaka tamin’Israelita aby io fahagagan̈a jiaby zen̈y. Irô jiaby nan̈eky fa olon’i Jehovah ankitin̈y Mosesy ndreky Arona.

Nandeha tamy Farao tan̈y amy zay Mosesy ndreky Arona. Volan̈in-drô taminany: ‘Jehovah Zan̈aharin’Israely nivolan̈a: “Alifasa olonakahy an̈atin’ny telo andra, hanompo zaho amy tany paiky an̈y.” ’ Kanefa Farao namaly: ‘Zaho tsy mahay Jehovah zen̈y. Tsy imboako mandeha Israelita aby io.’

Farao neloko fôtony olo mila andra tsy iasan̈a anompoan̈a Jehovah. Nahay nifaoriseny hiasa mare fo irô. Nan̈adary tamy Mosesy Israelita aby io fôtony irô nijaly loatra, ke Mosesy nalahelo. Jehovah nivolan̈a taminany izy tsy mila miasa loha. Volan̈iny: ‘Zaho han̈ano raha ampandifasan’i Farao olonakahy.’

Nimpody tamy Farao tan̈y, Mosesy ndreky Arona. Irô nan̈ano fahagagan̈a. Tongozon’Arona natsipiny in̈y, nivadiky bibilava maventy. Nan̈atsipy tongozon-drô koa irô olon’i Farao mahay raha aby io. Tongozon-drô nivadiky bibilava koa. Kanefa, zahava! Bibilavan’olo aby io natelin̈y bibilavan’Arona. Mbala tsy nimboan’i Farao nandeha fo Israelita aby io.

Navy amy zay iziô lera, Jehovah hampianatra Farao. Hainao ino raha nataony? Jehovah nandefa antambo folo ta Ejipta.

Izikoa fa vita antambo sasany, Farao nampavy Mosesy, baka iô nivolan̈a: ‘Basy eky antambo, fa Israelita aby io himboako mandeha.’ Kanefa, izikoa fa nijanon̈o antambo in̈y, nivadiky koa Farao. Tsy nimboany nandeha koa olo aby io. Tafaran’antambo fahafolo amy zay, Farao nandefa Israelita aby io.

Hainao ino aby antambo folo io? Avadiha boky, atsika hianatra zen̈y.

Eksodosy 4:27-31; 5:1-23; 6:1-13, 26-30; 7:1-13.