Tantara 23

Nôfin’i Farao

TAON̈O aroe zay lôso, Josefa mbala nigadra fo. Mpitaondra divay in̈y tsy honohono nahatsiaro izy foeky. Tandraraiky Farao nandry alin̈y, nan̈inôfy hafahafa, ke tiany hay dikan’ny nôfinany. Hitanao izy mandry io? Koa fa naraindrain̈y andra, izy nikaiky olo aby fangalany hevitry tao, baka iô nitantara nôfinany. Olo aby io tsisy nahay dikan’ny nôfinany.

Iziô mpitaondra divay in̈y vo nahatsiaro Josefa. Izy nivolan̈a tamy Farao: ‘Tamy zaho nigadra tan̈y in̈y, nisy lelahy araiky tao, mahay dikan’ny nôfy.’ Direkity nirahin’i Farao naboaka Josefa.

Nitantarain’i Farao tamy Josefa nôfinany: ‘Zaho nahita aombivavy fito, vaondraka. Aviô zaho nahita aombivavy fito, mahia be. Nahanin’aombivavy mahia aby io irô vaondraka aby in̈y.’

‘Tamy nôfinakahy faharoe, zaho nahita tahon’ny vary fito misy voany tsara. Baka iô zaho nahita tahon’ny vary fito, angafony areriky voany. Natelin̈y tahon’ny vary fito angafony io amy zay irô misy voany tsara in̈y.’

Josefa nivolan̈a tamy Farao: ‘Araiky fo dikan’ny nôfy aroe io. Fito taon̈o dikan’aombivavy fito vaondraka ndreky tahon’ny vary fito misy voany tsara. Aombivavy fito mahia ndreky tahon’ny vary fito angafony in̈y, fito taon̈o hafa koa. Ho treka hanin̈y amy tany Ejipta an̈atin’ny fito taon̈o. Aviô, an̈atin’ny fito taon̈o hafa koa, tsy hisy hanin̈y koa tsy hely fo.’

Josefa nivolan̈a tamy Farao: ‘Mifidiana olo mahay araiky, hamory hanin̈y an̈atin’ny fito taon̈o mampatreka hanin̈y. Amy zen̈y olo tsy mosary lera fito taon̈o tsisy hanin̈y an̈y.’

Tian’i Farao hevitry zen̈y. Josefa fo amy zay nifidiny hamory hanin̈y, ndreky han̈ano izy amy magazay. Josefa nanjary olo farany nalaza ta Ejipta, fan̈arakaraka Farao.

Valo taon̈o tafaran’izin̈y, efa tafiditry mosary tamy zen̈y, Josefa nahita lelahy maromaro navy. Hainao azôvy irô io? Zôkin’i Josefa folo aby in̈y foeky! Irô nirahin’ny baban-drô nandeha ta Ejipta, fôtony tsisy hanin̈y ta Kanana. Josefa nahay irô, fa irô tsy nahay Josefa. Hainao nan̈ino irô tsy nahay izy? Fôtony Josefa efa nahaibe, baka iô lamba nataony tsy nahaizan̈a izy.

Azon’i Josefa onon̈o amy zay nôfinany tamin’izy mbala hely in̈y, rahalahiny mankôhoko aminany. Tsiaronao anao namaky mikasiky izin̈y? Tamy zen̈y Josefa nahay fa Zan̈ahary nan̈iraka izy ta Ejipta, nisy antony tsara nahavy izy tan̈y. Ino raha iritriretinao fa hataon’i Josefa? Atsika iziô hizaha zen̈y.

Genesisy 41:1-57; 42:1-8; 50:20.