Tantara 19

Nanan̈a Zanaka Maro Jakoba

ZAHAVA tsaiky maro be io. Irô io zanaka Jakoba 12 lahy. Aviô izy mbala nisy zanaka man̈angy koa. Hainao an̈aran-drô jiaby? Atsika hianatra sasany amin-drô.

Lea niteraka Robena, Simeona, Levy ndreky Joda. Nalahelo mare Rahely koa fa nahita fa izy tsisy zanaka foeky. Ke Bila ampiasanany man̈angy nampanambadiny Jakoba, niteraka aroe lahy. Dana ndreky Naftaly an̈aran-drô. Nampanambadin’i Lea Jakoba koa Zilpa ampiasanany man̈angy, ke Zilpa niteraka Gada ndreky Asera. Tamy farany, Lea mbala niteraka aroe lahy koa, Isakara ndreky Zebolona.

Niteraka eky Rahely koa fa ela ny ela. Josefa nataony an̈arany. Mbala hianaratsika raha maro mikasiky Josefa, fôtony izy nanjary olo nalaza. Irô jiaby 11 lahy io, zanaka Jakoba tamin’izy nipetraka tamy Labana baban’i Rahely.

Jakoba nanan̈a zanaka man̈angy koa, fa araiky amin-drô fo voaton̈ono an̈aran̈a amy Baiboly. Dina an̈arany.

Navy andra hialan’i Jakoba Labana, himpodianany ta Kanana. Navoriny ry vadiny ndreky zanany, ôndrikôndriky ndreky bengy, aombinany jiaby, baka iô irô nan̈ano diabe.

Irô koa fa tsy ela ho avy ta Kanana, Rahely nipitihin-tsaiky. Irô tamy zen̈y mbala tan-dalan̈a hody. Rahely tamin’io sarôtiny fitirahan̈a, ke izy naty niteraka. Zanany fo, lelahy izio, velon̈o tsy nan̈ino. Benjamina nataon’i Jakoba an̈arany.

Tsy tsara adin̈atsika an̈aran̈a zanaka Jakoba 12 lahy, fôtony boaka amin-drô io niboahan’ny firenen’Israely. Boaka tamy zanaka Jakoba 10 lahy, ndreky zanaka Josefa aroe lahy nangalan̈a an̈aran̈a fokon’Israely 12. Tamy zen̈y Isaka mbala velon̈o. Misaora ravoravo izy nahita zafiny aby io. Atsika iziô hizaha raha nahazo Dina, zafiny man̈angy.

Genesisy 29:32-35; 30:1-26; 35:16-19; 37:35.