Tantara 11

Sobeha Voanalohany

MBA hainao raha voanalohany nataon’i Noa, izy ndreky vadiny ndreky ry zanany, koa fa tafiboaka tamy sambofiara? Izy nan̈ano sôron̈o amian̈a Zan̈ahary. Zen̈y raha ataony amy sary io. Noa nan̈ano sôron̈o biby, beky isaoran̈a Zan̈ahary nan̈avotro irô tamy safodrano in̈y.

Anao iziô mieritreritry fa namparavoravo Jehovah sôron̈o io? Ia. Zen̈y nahavy izy nivolan̈a tamy Noa fa tsy hamono olo amy safodrano eky.

Tsy ela naiky tany jiaby, Noa ndreky vadiny, ndreky ry zanany nanampôno fiain̈ana vaovao tambelan̈a sambofiara. Zan̈ahary nijôro irô. Nambarany: ‘Irarian̈a anarô hiteraka maro. Irarian̈a anarô hahay maro ziska tany jiaby feno olo.’

Koa fa mandeha andra, olo mety havozo izikoa haharen̈y raha mikasiky safodrano be in̈y, tsao mbala hisy koa safodrano karaha in̈y. Ke Zan̈ahary nan̈amia raha ahatsiaraovan’olo vava nataony fa izy tsy hanafotro tany jiaby eky. Hainao ino raha namiany ahatsiaraovan’olo zen̈y? Sobeha.

Matetiky, izikoa fa vita mahalen̈y, mipiriaka masoandra, misy sobeha amy lan̈itry. Sobeha aby io misy kolera maro tsara. Anao mba fa nahita sobeha? Hitanao araiky amy sary io?

Zan̈ahary nivolan̈a kara’ty: ‘Zaho man̈ano vava fa tsy safodrano eky hamono olo ndreky biby jiaby. Apetrako amy rôndro sobehanakahy. Ke izikoa fa miboaka sobeha, ho hitako izy, ho tsiaroko vava nataoko in̈y.’

Ke anao koa fa mahita sobeha, ino raha tôkony tsiaronao? Vava nataon’ny Zan̈ahary, tsy hamono olo amy safodrano karaha taloha in̈y eky.

Genesisy 8:18-22; 9:9-17.