Tantara 12

Tran̈o Maventy Tsisy Ambaka Izy Ta Babela

TAON̈O maro zay lôso. Zanaka Noa nanan-janaka. Irô koa fa be, niteraka maro. Tsy ela, naro olo tambony tany.

An̈atin’izen̈y, Nimroda zanaka zafin’i Noa. Izio lelahy ratsy fan̈ahy. Izy tia mamono olo ndreky biby. Izy tômpony fo nan̈ano izy ampanjaka, hikomandy olo jiaby. Zan̈ahary tsy tia Nimroda.

Tamy zen̈y, araiky fo fivolan̈anan’olo jiaby. Tadiavin’i Nimroda olo jiaby hipetraka an-tany araiky fo, amy zen̈y izy mahavita mikomandy irô. Hainao ino raha nataony? Nirahiny olo hiasa tanàna be, baka iô tran̈o maventy tsisy ambaka izy tan̈aty tao. Zahava baka irô amy sary io, miasa briky.

Zan̈ahary Jehovah tsy ravoravo tamy raha nataon-drô zen̈y. Tian’ny Zan̈ahary olo tsy hivory an-tany araiky, fa hameno tany. Olo aby io nivolan̈a: ‘Mavia anarô! Atsika hiasa tanàna be ndreky tran̈o maventy tsisy ambaka izy, tafony ataotsika mipaka lan̈itry, beky atsika malaza!’ Irô nitady voninahitrin-drô, fa tsy nan̈amia voninahitry Zan̈ahary.

Zen̈y nahavy Zan̈ahary nan̈ano raha tsy nampavita tran̈o be io. Hainao ino raha nataony? Zan̈ahary nan̈ano raha tsy nampiran̈a fivolan̈anan’olo. Kanefa taloha, araiky fo fivolan̈anan’olo jiaby. Mpiasa tran̈o aby io tsy nifankahazo koran̈a eky. Zen̈y nahavy an̈aran̈a tanàna io natao Babela, na Babylona, dikany “Tsy Fifankazahoan̈a.”

Nanampôno niala ta Babela amy zay olo. Lan̈iany olo niran̈a fivolan̈ana, nipetraka an-tany araiky.

Genesisy 10:1, 8-10; 11:1-9.