Tantara 14

Zan̈ahary Nitsapa Finoan̈an’Abrahama

HAINAO ino raha ataon’Abrahama iô? Misy meso amy tan̈any, karaha handeha hamono Isaka zanany edy izy io. Nan̈ino ma izy vôn̈ono mare han̈ano zen̈y? Atsika hizaha antsendriky karakôry nazahoan’Abrahama ndreky Saraha zanakan-drô lelahy io.

Alaiva onon̈o, Zan̈ahary nampan̈anten̈a irô fa hahazo zanaka lelahy irô. Karaha raha tsy marin̈y zen̈y, fôtony Abrahama ndreky Saraha efa natoe be. Ndray izy man̈ano zen̈y, Abrahama nino fa Zan̈ahary mahavita raha tsy vitan’olo. Ino amy zay raha niboaka?

Efa taon̈o araiky zay nivolan̈an’ny Zan̈ahary tamin’Abrahama fa izy amiany zanaka. Koa fa 100 taon̈o Abrahama, Saraha 90 taon̈o, irô nahazo zanaka lelahy. Isaka an̈arany. Zan̈ahary nitana vava nataony!

Izikoa fa be Isaka, Zan̈ahary nitsapa finoan̈an’Abrahama. Izy nikaiky: ‘Abrahama!’ Abrahama namaly: ‘Indriô zaho!’ Zan̈ahary nivolan̈a: ‘Hindesa zanakanao, Isaka, baka iô mandihana amy bongo araiky haboakako anao. Anao koa fa avy an̈y, zanakanao vonia, ataova sôron̈o.’

Misaora nalemy trôko Abrahama naharen̈y volan̈a aby zen̈y, fôtony zanany io tiany tsisy ambaka izy. Alaiva onon̈o, Zan̈ahary nivolan̈a tamin’Abrahama fa taranakanany hipetraka amy tany Kanana. Karakôry fo ampamety zen̈y izikoa Isaka naty? Tsy nazava tamin’Abrahama raha zen̈y, kanefa narehany fo zay raha nivolan̈in’ny Zan̈ahary.

Abrahama koa fa navy tamy bongo io tan̈y, nifiheziny tady Isaka, baka iô napetrany tan̈abo talatala namboariny. Koa fa vita raha jiaby zen̈y, nangala meso izy hamonoan̈a Isaka. Izy handenta Isaka in̈y, anjelin’ny Zan̈ahary nikaiky: ‘Abrahama, Abrahama!’ Abrahama namaly: ‘Indriô zaho!’

Zan̈ahary nivolan̈a: ‘Kaza ratravin̈y tsaiky io, kaza vonen̈a izy!’ ‘Iziô io zaho mahay fa anao ten̈a tia zaho sady manan̈a finoan̈a ankitin̈y, fôtony anao tsy niaro zanakanao taokana, taminakahy.’

Be finoan̈an’Abrahama Zan̈ahary! Izy nino fa tsisy raha tsy hain’i Jehovah, nata Isaka maty mbala vitan’i Jehovah fo mamelon̈o izy. Ndray izy man̈ano zen̈y, Zan̈ahary tsy tia Abrahama hamono Isaka. Zan̈ahary nan̈ano raha hisian’ny zanaka ôndrikôndriky voafandriky tan̈’alan-draha marikitry tiô. Izy nivolan̈a tamin’Abrahama fa ôndrikôndriky io atao sôron̈o, solon’ny zanany.

Genesisy 21:1-7; 22:1-18.