Tantara 116

Fiain̈ana Tsisy Farany

INO boky vakin’ny tsaiky aby io? Boky miran̈a ninao io fo: Boky Misy Tantara Boaka amy Baiboly. Irô iziô mamaky tantara ianaranao io: “Fiain̈ana Tsisy Farany.”

Hainao raha ianaran-drô io? Voanalohany, atsika mila mahay Jehovah ndreky Jesosy Zanany, beky velon̈o tsisy farany. Baiboly mivolan̈a: ‘Kara’ty atao beky velon̈o tsisy farany: Mianara maomba Zan̈ahary marin̈y, ndreky Jesosy Kristy, Zanany nirahiny tambony tany.’

Karakôry ahaizatsika Zan̈ahary Jehovah, ndreky Jesosy Zanany zen̈y? Atsika mila mamaky Boky Misy Tantara Boaka amy Baiboly, rango amy voanalohany zisk’amy farany. Tantarain̈a ao raha maro mikasiky Jehovah ndreky Jesosy, tsy zen̈y? Tantarain̈a ao koa raha maro efa nataon-drô, ndreky mbala hataon-drô. Misy raha hafa koa tôkony hataotsika, fôtony izikoa mamaky boky ty fo, tsy mahampy.

Hitanao boky amy rapaka io? Baiboly izio. Tantara jiaby amy boky ty, boaka amy Baiboly. Iraha olo mamaky zen̈y aminao an̈aty Baiboly. Baiboly man̈ambara raha maro tôkony hatao, beky atsika man̈ano raha tian’i Jehovah ndreky mahazo fiain̈ana tsisy farany. Ke atsika mila zatra mianatra Baiboly.

Tsy mahampy mahay Jehovah ndreky Jesosy Kristy. Atsika mety hahay raha maro mikasiky irô ndreky raha nampianarin-drô, kanefa mbala tsy hahazo fiain̈ana tsisy farany fo. Hainao raha hafa mila hataotsika?

Atsika mila man̈araka raha ianaratsika. Azonao onon̈o Jodasy Iskariota? Izy an̈isan’ny apostolin’i Jesosy 12. Jodasy nahay raha maro mikasiky Jehovah ndreky Jesosy. Kanefa ino raha nahazo izy? Koa fa refindrefin̈y, izy nanjary tia ten̈a, baka iô Jesosy natakalony volafotsy 30 tamy fahavalo aby in̈y. Ke Jodasy tsy hahazo fiain̈ana tsisy farany.

Azonao onon̈o Gehazy, tamy Tantara 69 in̈y? Tiany hahazo lamba sasany ndreky vola tsy ninany. Ke izy navandy beky mahazo raha jiaby zen̈y. Izy nisazin’i Jehovah. Atsika koa hisazin’i Jehovah, koa tsy man̈araka lalàn̈any.

Nisy olo maro koa tsy nivadiky tamy Jehovah. Tiatsika han̈ano karaha irô in̈y, tsy zen̈y? Tiatsika han̈ano karaha Samoela mbala hely in̈y. Azonao onon̈o, tamy Tantara 55 in̈y, izy mbala efatra na dimy taon̈o fo, efa nanompo Jehovah tamy tabernakely. Anao koa, nata mbala hely, mahavita manompo Jehovah fo.

Atsika jiaby koa mila man̈ano karaha nataon’i Jesosy Kristy. Tamy Tantara 87, izy mbala hely efa nikoran̈a tamin’olo tamy tempoly tao mikasiky Babany an-dan̈itry an̈y. Atsika koa mila mikoran̈a amin’olo maro maomba Zan̈ahary Jehovah ndreky Jesosy Kristy, Zanany. Izikoa atsika man̈ano raha jiaby zen̈y, ho velon̈o tsisy farany ambony tany eto, lera Zan̈ahary han̈ano tany ty paradisa vaovao.

Jaona 17:3; Salamo 145:1-21.