Tafarany 4026 T.K.

“Bibilava” in̈y nankaratsy Jehovah. Izy nivolan̈a fa Jehovah tsy manan̈a zo hitondra sady tsy mahay mitondra foeky. Jehovah nan̈amia toky fa ho hisy “taranaka” hanorotoro bibilava na Satana io. (Genesisy 3:1-5, 15) Mbala nambelany Jehovah hifampitondra fo olombelon̈o fiheziny Satana.

1943 T.K.

Jehovah nivolan̈a fa baka amy taranaka Abrahama hiboahany “taranaka” io. —Genesisy 22:18.

Tafarany 1070 T.K.

Jehovah koa nampan̈anten̈a Davida Panjaka ndreky Solomona, fa baka amy taranakandro hiboahany “taranaka” nampan̈antinain̈y io. —2 Samoela 7:12, 16; 1 Mpanjaka 9:3-5; Isaia 9:6, 7.

29 T.A.K.

Jehovah nan̈ambara fa Jesosy “taranaka” nampan̈antinain̈y handova seziny panjaka Davida io. —Galatianina 3:16; Lioka 1:31-33; 3:21, 22.

 33 T.A.K.

Jesosy koa fa nivonen̈y, mira nandratra “taranaka” nampan̈antinain̈y io, tan̈atiny fotoan̈a hely, Satana. Jesosy nivilominy Jehovah, baka io nandeha tandan̈itry tan̈y. Nikeny Jehovah vidiny ain̈inany lavorary. Baka amy zen̈y mahavy taranaka Adama ho voafafa heloko ndreky ho velon̈o tsisy farany. —Genesisy 3:15; Asan’ny Apostoly 2:32-36; 1 Korintianina 15:21, 22.

Kadiriny taminy 1914 T.A.K.

Niroasiny Jesosy tambony tany tatỳ Satana, ke ten̈a efa hely fotoan̈a anan̈any. —Apokalypsy 12:7-9, 12.

Aminy hoavy

Higadrainy Jesosy an̈atiny 1000 taon̈o Satana, baka io hitorotoroeny lohanany. Ho tanteraka amy zay fikasan̈any Jehovah momba tany ty ndreky olombelon̈o. Ho hita tsarabe fa izy zaraiky fo mahay mitondra, baka io tsy ho hisy eky olo hankaratsy an̈aranany.—Apokalypsy 20:1-3, 10; 21:3, 4.